អត្ថបទថ្មីបំផុត
ទំព័រដើម > នីតិវិធី​អាជីវកម្ម > ចំណុច​សំខាន់ៗ​នៃ​កុងត្រា​ទិញ​លក់​អចលនទ្រព្យ​ដែល​អ្នកទិញ​គួរតែ​យកចិត្តទុកដាក់

ចំណុច​សំខាន់ៗ​នៃ​កុងត្រា​ទិញ​លក់​អចលនទ្រព្យ​ដែល​អ្នកទិញ​គួរតែ​យកចិត្តទុកដាក់

​កុងត្រា ឬ​កិច្ចសន្យា គឺជា​ឯកសារ​មួយ​ប្រភេទ​ដែល​ត្រូវបាន​ធ្វើឡើង​រវាង​គូភាគី​ដើម្បី​កំណត់​អំពី​សិទ្ធិ និង កាតព្វកិច្ច​របស់​គូភាគី​ទាំងនោះ​។ កុងត្រា​អាច​ធ្វើជា​លាយលក្ខណ៍អក្ស​រ ឬ​ដោយ​ផ្ទាល់មាត់​ក៏បាន​។ ក៏ប៉ុន្តែ ចំពោះ កុងត្រា​ទិញ​លក់​អចលនទ្រព្យ ត្រូវតែ​ធ្វើឡើង​ជា​លាយ​លក្ខ​អក្សរ បើ​មិន​ដូច្នេះ​ទេ គូភាគី​នៃ​កុងត្រា​នោះ​នឹងមិន​អាច អះអាង​អំពី​សិទ្ធិ​របស់ខ្លួន​ចំពោះ​តតិយជន (​ភាគី​ទី​បី​)​បានឡើយ​។ លើសពីនេះទៅទៀត ដោយហេតុថា​កុងត្រា​គឺ ជា​តឹកតាង​ដែល​គូភាគី​អាច​ប្រើប្រាស់​ដើម្បី​អះអាង​នូវ​សិទ្ធិ និង កំណត់​អំពី​ទំហំ​នៃ​ករណីយកិច្ច​របស់ខ្លួន គូភាគី ជាពិសេស​អ្នកទទួល​សិទ្ធិ​គួរតែ​ពិនិត្យ​ឱ្យបាន​ល្អិតល្អន់​លើ​ខ្លឹម​សារសំខាន់ៗ​មួយចំនួន មុននឹង​ចុះហត្ថលេខា​លើ កុងត្រា​ទិញ​លក់​អចលនទ្រព្យ ដើម្បី​ជៀសវាង​នូវ​បញ្ហា​មួយចំនួន ដែលនាំឱ្យ​ខូច​ផលប្រយោជន៍​របស់ខ្លួន​។ នៅក្នុង អត្ថបទ​នេះ លោកអ្នក​នឹង​បាន​ស្វែងយល់ថា​តើ​ចំណុច​ណាខ្លះ​នៃ​កុងត្រា​លក់​ទិញ​អចលនទ្រព្យ ដែល​អ្នកទិញ​គួរ តែ​ផ្តោត​យកចិត្តទុកដាក់ និង ពិនិត្យ​ឱ្យ​ល្អិតល្អន់​មុននឹង​ចុះហត្ថលេខា​?

​ ​ខាងក្រោម​នេះ គឺជា​ចំណុច​សំខាន់ៗ​នៃ​កុងត្រា​ទិញ​លក់​អចលនទ្រព្យ​ដែល​អ្នកទិញ​គួរតែ​យកចិត្តទុកដាក់ និង ពិនិត្យ​ឱ្យ​ល្អិតល្អន់ មុននឹង​សម្រេចចិត្ត​ចុះហត្ថលេខា​៖
១) សិទ្ធិ​របស់​អ្នកលក់​លើ​អចលនទ្រព្យ​
​ ​ជាការ​ពិតណាស់ បុគ្គល​មួយ​អាច​ចាត់ចែង (​លក់​) អចលនទ្រព្យ​ណាមួយ​បាន​លុះត្រាតែ​បុគ្គល​នោះ​មាន សិទ្ធិ (​សិទ្ធិ​កាន់កាប់ ឬ កម្មសិទ្ធិ​) លើ​អចលនទ្រព្យ​នោះ​។ ដូច្នេះហើយ វា​គឺជា​ការចាំបាច់​ណាស់ ដែល​អ្នកទិញ គួរ​គប្បី​ធ្វើឱ្យ​ប្រា​ដក​ដ​ថា អ្នកលក់​គឺជា​បុគ្គល​ដែលមាន​សិទ្ធិ​ពេញលេញ ក្នុង​ការលក់​អចលនទ្រព្យ​នោះ​។​ជាការ ពិតណាស់ យើង​អាច​កំណត់ថា​បុគ្គល​មួយ​ជា​ម្ចាស់​សិទ្ធិ​លើ​អចលនទ្រព្យ​នោះបាន ដោយ​ផ្អែកលើ​ការពិនិត្យ​មើល ប្លង់​នៃ​អចលនទ្រព្យ​នោះ​ដោយ​ផ្ទៀងផ្ទាត់​ជាមួយនឹង​អត្តសញ្ញាណប័ណ្ណ​របស់​អ្នកលក់ ថា​តើ​អត្តសញ្ញាណ​នៅក្នុង ប្លង់ និង នៅក្នុង​អត្តសញ្ញាណប័ណ្ណ គឺជា​មនុស្ស​តែមួយ​ដែរឬទេ​។ លើសពីនេះទៅទៀត ក្នុងករណី​ដែល​អចលន ទ្រព្យ​នោះ គឺជា​ទ្រព្យ​រួម​ប្តី​ប្រពន្ធ ដូច្នេះ​ភាគី​អ្នកលក់​ត្រូវតែ​ជា​ប្តី​និង​ប្រពន្ធ​។ មានន័យថា ទោះបីជា​ប្តី​មាន​សិទ្ធិ​នៅ លើ​អចលនទ្រព្យ​នោះ​ក៏ដោយ ក៏​ការផ្ទេរកម្មសិទ្ធិ​លើ​អចលនទ្រព្យ​នោះ​មិនអាច​ធ្វើទៅ​បានដែរ ដោយហេតុថា អចលនទ្រព្យ​នោះ​មិនមែនជា​កម្មសិទ្ធិ​ផ្តាច់មុខ​របស់​ប្តី​។
២) អចលនទ្រព្យ​ដែលជា​កម្មវត្ថុ​នៃ​ការលក់​ទិញ​
​ ​ការបញ្ជាក់​អំពី​អចលនទ្រព្យ​ដែលជា​កម្មវត្ថុ​នៃ​ការលក់​ទិញ​នៅក្នុង​កុងត្រា ឬ​កិច្ចសន្យា ដោយមាន​រៀបរាប់ អំពី​អ​សយ​ដ្ឋា​ន និង ទំហំ​អចលនទ្រព្យ​ច្បាស់លាស់ ដោយ​ភ្ជាប់​មកជា​មួយ​នូវ​ប្លង់​នៃ​អចលនទ្រព្យ​នោះ គឺជា​ការណ៍ មួយ​ដ៏​សំខាន់ ដើម្បីឱ្យ​ប្រាកដថា តើ​អ្នកលក់​កំពុង​លក់​អចលនទ្រព្យ​មួយណា នៅឯណា មាន​ទំហំ​ប៉ុន្មាន​? បន្ថែម លើ​នេះ​ទៅទៀត ការបញ្ជាក់​អំពី​អត្តសញ្ញាណ​នៃ​អចលនទ្រព្យ​នោះ នឹង​នាំឱ្យ​អ្នកទិញ​អាចធ្វើ​ការស្រាវជ្រាវ​ចំ​គោល ដៅ និង មាន​ប្រសិទ្ធិភាព ទៅលើ​អចលនទ្រព្យ​ដែលជា​កម្មវត្ថុ​នៃ​ការលក់​ទិញ​នោះ ដើម្បី​ឱ្យដឹង​ច្បាស់​ថា តើ​អចលន ទ្រព្យ​នោះ​មាន​ជាប់​បន្ទុក (​ការដាក់​បញ្ចាំ ឬ​សិទ្ធិ​នានា​) ឬ​មាន​បណ្តឹង​នៅ​តុលាការ​ដែរ​ទេ ឬក៏​តើ​អចលនទ្រព្យ នោះ​អាចធ្វើ​លទ្ធកម្ម (​ទទួល​ការផ្ទេរ​) កម្មសិទ្ធិ ឬ​សិទ្ធិ​កាន់កាប់​ដែរ ឬទេ​?
៣) បែបបទ​នៃ​ការបង់ថ្លៃ​លក់​ទិញ​
​ ​ជាការ​ពិតណាស់ ថ្លៃ​លក់​ទិញ​គឺជា​ផ្នែក​ដ៏​សំខាន់បំផុត​មួយ​នៃ​កុងត្រា​លក់​ទិញ​អចលនទ្រព្យ ដោយហេតុថា កុងត្រា ឬ​កិច្ចសន្យាលក់​ទិញ​អចលនទ្រព្យ នឹងត្រូវ​ចាត់ទុកជា​មោ​ឃៈ​ប្រសិនបើ​កុងត្រា ឬ​កិច្ចសន្យា​នោះ​មិនមាន ចែង​អំពី​ថ្លៃ​លក់​ទិញ នេះ​បើតាម​បញ្ញត្តិ​នៃ​ច្បាប់​ភូមិបាល​ឆ្នាំ​២០០១​។ លើសពីនេះទៅទៀត គូភាគី​នៃ​កុងត្រា ឬ​កិច្ចសន្យា គួរតែ​កំណត់ឱ្យ​បានច្បាស់លាស់​អំ​ពី​របៀប​នៃ​ការទូទាត់​ថ្លៃ​លក់​ទិញ ដូចជា ត្រូវ​បង់ថ្លៃ​លក់​ទិញ​ទាំង អស់ ឬក៏​ធ្វើការ​កក់​នូវ​ចំនួន​ណាមួយ ហើយ​បង់​នៅទីណា ដោយ​មធ្យោបាយ​ណា​។​ល​។ ការធ្វើ​បែបនេះ គូភាគី នឹង​អាច​ប្រើប្រាស់​សិទ្ធិ និង អនុវត្ត​ករណីយកិច្ច​បាន​យ៉ាង​រលូន មាន​សុវត្ថិភាព និង ប្រសិទ្ធិភាព​។
៤) កាតព្វកិច្ច​ពន្ធដារ​
​ ​ក្រៅ​អំពី​ការបង់​សេវា​រដ្ឋបាល​នៅ​អង្គភាព​សុរិយោដី ដើម្បី​ធ្វើការ​ផ្ទេរកម្មសិទ្ធិ​ពី​អ្នកលក់​មក​អ្នកទិញ គូភាគី គួរតែ​កំណត់ឱ្យ​បានច្បាស់លាស់​នៅក្នុង​កុងត្រា នូវ​កាតព្វកិច្ច​បង់ពន្ធ​ប្រថាប់ត្រា ៤% នៃ​តម្លៃ​លក់​ទិញ ថា​តើ​អុ្ន​ក ណា​ជា​អ្នក​បង់ពន្ធ​ប្រថាប់ត្រា​នោះ​។ ការណ៍​នេះ​នឹង​ជួយ​ឱ្យ​ប្រតិបត្តិការ​នៃ​ការផ្ទេរកម្មសិទ្ធិ ឬ​សិទ្ធិ​កាន់កាប់​លើ អចលនទ្រព្យ អាចធ្វើ​ទៅបាន​ដោយ​រលូន និង គ្មាន​ជម្លោះ​។
៥) ទម្រង់​នៃ​កុងត្រា
​ ​យោងទៅលើ​ក្រមរដ្ឋប្បវេណី​ឆ្នាំ ២០០៧ និង ច្បាប់​ភូមិបាល​ឆ្នាំ ២០០១ កុងត្រា ឬ​កិច្ចសន្យាលក់​ទិញ អចលនទ្រព្យ ត្រូវតែ​ធ្វើ​ឡើងជា​លាយលក្ខណ៍អក្ស​រ​តាម​ទម្រង់​លិខិតយថាភូត (​លិខិត​ដែល​ធ្វើឡើង​តាម​រូបមន្ត ច្បាប់ ដោយសារ​ការី )​។ ប៉ុន្តែ​ផ្អែកទៅលើ​ច្បាប់​ស្តីពី​ការអនុវត្ត​ក្រមរដ្ឋប្បវេណី​ឆ្នាំ ២០១១ លិខិតយថាភូត គឺជា លិខិត​ដែល​មន្ត្រី​មាន​សមត្ថកិច្ច​ធ្វើឡើង​ដើម្បី​អនុវត្ត​នូវ​នីតិវិធី​នៃ​ការចុះបញ្ជី​អចលនទ្រព្យ​។ ជារួម​មក ត្បិត​ថា​គូភាគី អាចធ្វើ​នូវ​កុងត្រា​តាម​ការ​ព្រមព្រៀងគ្នា (​លិខិតឯកជន​) ក៏ប៉ុន្តែ​ដើម្បី​អាច​ចុះបញ្ជី​ផ្ទេរកម្មសិទ្ធិ​បាន គូភាគី​តម្រូវឱ្យ ធ្វើលិខិត​តាម​ទម្រង់​ច្បាប់​មួយទៀត ដែល​យើង​ហៅថា “​លិខិត​លក់​ផ្តាច់ – Vente Definitive”​។ លិខិត​លក់​ផ្តាច់​នេះ គឺជា​លិខិត​ដែល​ត្រូវបាន​ធ្វើឡើង​ដោយ​មន្ត្រី​សុរិយោដី ដែលមាន​តម្លៃ​ស្មើនឹង​លិខិតយថាភូត​ដែល​ធ្វើឡើង​ដោយ សារការី​៕
ដោយ៖ ប៉ុម ទូច​

ប្រសិន​ជា​អ្នក​ចូល​ចិត្ត​អត្ថបទ​នេះ​សូម​ជួយ​ Like & Shared

អត្ថបទពេញនិយម

បើ​ចង់​ទន្ទេញ​មេរៀន​​ឲ្យ​ឆាប់​ចាំ​ ​និង ​មិន​ងាយ​ភ្លេច​ ​គួរ​សាកល្បង​​​វិធី​ងាយៗ​ទាំងនេះ​!​

ហាម​និយាយ​​ពាក្យ​ទាំង​ «៤​» ឃ្លា​នេះ​​​ប្រសិន​បើ​អ្នក​ធ្វើ​ការ​ជា​អ្នក​លក់​ (sales)!

បើ​​​ចង់​ក្លាយ​ជា​អ្នក​គ្រប់គ្រង​ ​ឬ ​អ្នកដឹកនាំ​ដ៏​អស្ចារ្យ​ម្នាក់​ ត្រូវ​ជម្រុះ​​ចំណុច​អាក្រក់​​ទាំង​៦​នេះ​សិន​ ​!​

ទម្លាប់​អាក្រក់​​ទាំង ​៥​យ៉ាង​​ ដែល​ធ្វើ​អោយ​​អ្នកងើបមុខមិនរូចពី​ក្រ​ ទោះ​បី​ជា​មាន​ប្រាក់​ចំណូល​​សមរម្យ​ក៏​ដោយ​​

អត្ថបទពាណិជ្ជកម្ម​

ឱកាសបង្ហាញ​សមត្ថភាព​និង​គំនិត​ច្នៃប្រឌិត​ផ្នែក​អាជីវកម្ម​សម្រាប់​​យុវជន​បានមក​ដល់​ហើយ​!

​គុយទាវ​បាក់​សៀក​ពិសេស​ឈ្មោះ​ធម្មតា តែ​រសជាតិ​ឆ្ងាញ់​មិនធម្មតា​ទេ ​ធានាថា​ឆ្ងាញ់​បោស​ចាន !

everjobs បង្ហាញ​ពី​ជំនាញ​មួយចំនួន​ដែល​​ចាំ​បាច់​​ក្នុងតួនាទី​គ្រប់គ្រង​ (Management) នៅក្នុង​ប្រទេស​កម្ពុជា​​

វត្តមានគម្រោងបុរីល្បីៗជាច្រើននៅក្នុងពិព័រណ៍អចលនទ្រព្យកម្ពុជាលើកទី២

អានអត្ថបទតាមខែ

September 2017
M T W T F S S
« Aug    
 123
45678910
11121314151617
18192021222324
252627282930