ចង់ក្លាយជាមនុស្សអស្ចារ្យមែនទេ ? ដូច្នេះត្រូវចាប់ផ្ដើមពីការចេះសួរសំណួរត្រឹមត្រូវ
សុភាសិតចិនបុរាណមួយបានពោលថា៖ "អ្នកដែលសួរសំណួរនឹងក្លាយជាមនុស្សល្ងង់ត្រឹមតែ៥នាទីប៉ុណ្ណោះ តែបើអ្នកដែលមិនសួរអ្វីសោះនឹងក្លាយជាមនុស្សល្ងង់អស់មួយជីវិត"។ កុំថាឡើយអ្នករៀនចប់អស់ថ្នាក់នៅក្នុងសាលាក៏ដោយ ឬសូម្បីតែរហូតដល់ពេលអ្នកផុតដង្ហើមពីលោកនេះទៅក៏ដោយ ក៏អ្នករៀនមិនអស់ពីអ្វីៗនៅលើសកលលោកនេះដែរ។
ម្យ៉ាងទៀត ការឆ្ងល់ចោទសួរអាចជារឿងងាយស្រួលនរណាក៏អាចធ្វើបានដែរ បែបនេះអាចធ្វើឲ្យអ្នកគិតថាការសួរសំណួរគឺជារឿងមិនសូវសំខាន់ ប៉ុន្តែបើអ្នកដឹងថាវាសំខាន់ប៉ុណ្ណាវិញ ឆាកជីវិតរបស់អ្នកនឹងផ្លាស់ប្ដូរទាំងស្រុង។ រីឯរបៀបទទួលចំណេះពីសាលាឲ្យមានប្រសិទ្ធភាពក៏មិនខុសគ្នាដែរ។ ការរកឃើញអាថ៌កំបាំងពីពិភពលោកនេះចាប់ផ្ដើមដូចជា អ៊ីសាក់ ញូតុន សួរសំណួរថា៖ "ហេតុអ្វីផ្លែប៉ោមធ្លាក់ពីលើដើមឈើ ចុះហេតុអ្វីព្រះចន្ទមិនធ្លាក់មកលើផែនដីដែរទៅ ?" ។
ឯសូក្រាតវិញចោទសំណួរឡើងថា៖ "អ្វីទៅជាភាពយុត្តិធម៌ ?" ។ ការសួរសំណួរបែបទូទៅនិងទូលំទូលាយ តែបែបមូលដ្ឋាននិងមានភាពស៊ីជម្រៅបែបនេះ បានធ្វើឲ្យពួកគេចាត់ទុកជីវិតដូចជាបេសកកម្មមួយដែលត្រូវស្វែងរកចម្លើយ ដើម្បីស្រាយចម្ងល់នូវសំណួរមួយនេះ។ នៅពេលអ្នកដាក់សំណួរចោទសួរមកខ្លួនឯង ជីវិតអ្នកនឹងមានគោលដៅថាត្រូវធ្វើដូចម្ដេចដើម្បីស្វែងរកចម្លើយនោះ។ បើអ្នកជាសិស្ស មិនយល់ពីមេរៀនអ្វីមួយ អ្នកត្រូវតែហ៊ានចោទសួរគ្រូ។ កុំខ្លាចគេថាល្ងង់ មានតែអ្នកមិនហ៊ានសួរហើយថាឲ្យគេល្ងង់ប៉ុណ្ណោះ ទើបល្ងង់ពិតប្រាកដ។ នៅពេលសួរសំណួរបានត្រឹមត្រូវ អ្នកនឹងទទួលបានចម្លើយមួយដែលចាក់ចំកណ្ដាលបេះដូងរបស់អ្នក ដែលធ្លាប់តែជាចម្ងល់ឬភាពមិនច្បាស់លាស់មួយ ដែលរារាំងអ្នកមិនអាចឲ្យយល់ពីអ្វីផ្សេងទៀតដែលមានទំនាក់ទំនងនឹងវា ដែលពេលនោះហាក់ដូចជាទទួលបានពន្លឺដ៏ភ្លឺចិញ្ចាចនៅក្នុងបន្ទប់ដ៏ងងឹតសូន្យសុងដូច្នោះ។
នៅពេលអ្នកយល់ពីចំណុចស្នូលរបស់គំនិតណាមួយហើយ ដើម្បីអាចថែរក្សាទិន្នន័យទាំងនោះផ្ទុកនៅក្នុងការចងចាំរយៈពេលវែងបាន អ្នកត្រូវចេះបំបែកគោលគំនិតធំនោះឲ្យទៅជាបំណែកតូចៗ ហើយបន្ទាប់មកព្យាយាមផ្សារភ្ជាប់ទំនាក់ទំនងពីបំណែកនៃគំនិតមួយទៅបំណែកមួយទៀត ដើម្បីមើលឃើញពីរូបភាពធំដែលក្ដោបអត្ថន័យរបស់បំណែកទាំងនោះជាគំនិតតែមួយរួមគ្នា។ ដើម្បីឲ្យចំណេះដឹងដែលទទួលបានមកនៅតែដិតដាមជាប់នៅក្នុងការចងចាំបានយូរ ការប្រើប្រាស់ឧទាហរណ៍ប្រដូចប្រៀបធៀបរូបភាពនៃគំនិតស្មុគស្មាញ ឬមានលក្ខណៈបច្ចេកទេសណាមួយទៅនឹងរូបភាពនៃគំនិតមួយផ្សេងទៀត ដែលមានលក្ខណៈសាមញ្ញ ដែលអ្នកតែងតែឃើញវាក្នុងជីវិតប្រចាំថ្ងៃ ក៏មានប្រសិទ្ធភាពខ្ពស់បំផុតដែរ។ ព្រោះថានៅពេលអ្នកព្យាយាមស្រមៃក្នុងទម្រង់ជារូបភាពបែបនេះ ការចងចាំនឹងរឹតតែងាយស្រួល និងច្បាស់លាស់សម្រាប់អ្នកយកទៅប្រើប្រាស់វានៅពេលក្រោយបាន៕
ប្រែសម្រួល៖ ស្រីពៅ
ប្រភព៖ innovationmanagement & lifehack
