អត្ថបទថ្មីបំផុត
ទំព័រដើម > សេដ្ឋកិច្ច&អប់រំ > ហេតុអ្វី​បានជា​ប្រាក់​ដុល្លារ​អាមេរិក​ត្រូវបាន​ប្រើប្រាស់​យ៉ាង​ទូលំទូលាយ​នៅក្នុងប្រទេស​កម្ពុជា​?

ហេតុអ្វី​បានជា​ប្រាក់​ដុល្លារ​អាមេរិក​ត្រូវបាន​ប្រើប្រាស់​យ៉ាង​ទូលំទូលាយ​នៅក្នុងប្រទេស​កម្ពុជា​?

​ប្រាក់​ដុល្លារ​អាមេរិក គឺជា​រូបិយវត្ថុ​បរទេសមួយ​ប្រភេទ​ដែលមាន​ការនិយម​ប្រើប្រាស់​ជាទីបំផុត​ក្នុងប្រទេស កម្ពុជា​យើង​។ នៅក្នុង​អត្ថបទ​នេះ លោកអ្នក​នឹង​បាន​ស្វែងយល់​អំពី​ថា​តើ​មាន​មូលហេតុ​អ្វីខ្លះ​ដែលនាំឱ្យ​ប្រាក់​ដុល្លារ អាមេរិក​ត្រូវបាន​ប្រើប្រាស់​យ៉ាង​ទូលំទូលាយ​នៅក្នុង​ប្រទេស​កម្ពុជា​?

ការប្រើប្រាស់​ប្រាក់​ដុល្លារ​យ៉ាង​ទូលំទូលាយ​នៅក្នុង​ប្រទេស​កម្ពុជា បណ្តាលមកពី​កត្តា ៤ យ៉ាង​ បើ​ផ្អែក​តាម​ធនាគារ​ជាតិ​នៃ​កម្ពុជា។ កត្តា​ទាំង​​ ៤​យ៉ាង​នោះ​មាន​ កត្តា​ប្រវត្តិសាស្ត្រ កត្តានយោបាយ កត្តាសេដ្ឋកិច្ច និង​កត្តា​សង្គម ។ ក្នុងអំឡុង​របប​ខ្មែរក្រហម រូបិយវត្ថុ​ត្រូវបាន​លុប បំបាត់ចោល ពោលគឺ​គ្មាន​ទីផ្សារ គ្មាន​ពាណិជ្ជកម្ម និង​គ្មាន​សេរីភាព​គ្រប់យ៉ាង។​

​ក្រោយ​របប​ខ្មែរក្រហម​ត្រូវបាន​ផ្តួលរំលំ​នៅ​ថ្ងៃទី​៧ ខែមករា ឆ្នាំ​១៩៧៩ ប្រទេស​កម្ពុជា​បានចាប់ផ្តើម​ទទួល បាន​សន្តិភាព​មកវិញ ។ បន្ទាប់ពី​ធនាគារជាតិ​នៃ​កម្ពុជា​ត្រូវបាន​បង្កើតឡើង​សាជាថ្មី​នៅ​ថ្ងៃទី​១០ ខែ តុលា ឆ្នាំ ១៩៧៩​។ ធនាគារជាតិ​នៃ​កម្ពុជា​ក៏បាន​បោះផ្សាយ​ប្រាក់រៀល​ជាតិ​ឡើងវិញ​ផងដែរ​នៅ​ថ្ងៃ ទី​២០ ខែមីនា ឆ្នាំ​១៩៨០ ប៉ុន្តែ​ភាពជឿជាក់​និង​ជំនឿ​ទុកចិត្ត​របស់​សាធារណជន​មកលើ​ប្រាក់រៀល នៅមានកម្រិត និង ផុយស្រួយ​នៅឡើយ ក្រោយពី​សង្គ្រាម​ទើបត្រូវ​បានបញ្ចប់​ភ្លាមៗ។

​នៅ​ដើម​ទស្សវត្សរ៍​ឆ្នាំ​១៩៩០ អាជ្ញាធរ​បណ្តោះអាសន្នរ​បស់​អង្គការសហប្រជាជាតិ​ប្រចាំ​នៅ​កម្ពុជា (UNTAC) បានមក​កាន់​ប្រទេស​កម្ពុជា​ដើម្បី​រៀបចំ​ការបោះឆ្នោតជាតិ​ជា​លើកទីមួយ ។ ក្នុងអំឡុង​ពេលនោះ ប្រាក់ ដុល្លារ​យ៉ាងច្រើន​សន្ធឹក​សន្ធាប់​ត្រូវបាន​យកមកប្រើ​ប្រាស់ សម្រាប់​ការទូទាត់​ក្នុង​សេដ្ឋកិច្ចកម្ពុជា ។ ពេលនោះ​ហើយ ដែល​ប្រជាជន​កម្ពុជា ចាប់ផ្តើម​ស្គា​ល់ពី​តម្លៃ​របស់​ប្រាក់​ដុល្លារ ហើយ​បាន​ប្រើប្រាស់​កាន់តែ​ច្រើនឡើងៗ​ក្នុង​ប្រតិបត្តិ ការ​ពាណិជ្ជកម្ម និង ជំនួញ។​

លោក​ជំទាវ ជា សិរី អគ្គនាយិកា ធនាគារជាតិ​​នៃ​កម្ពុជា​បាន​ថ្លែង​កាល​ពី​កន្លង​ទៅ​ប្រាប់​គេហទំព័រ​ក្នុង​ស្រុក​ថា​ ៖«ដោយ​សារ​តែ​ប្រជាជន​កម្ពុជា​គាត់​មាន​បទ​ពិសោធន៍​កាល​ពី​ឆ្នាំ​១៩៧៥ លុយគាត់​តែ​ក្នុង​មួយ​ថ្ងៃ​បាត់​បង់​អស់​អាលីង លុយ​ដូច​ក្រដាស​អីចឹង ហើយ​សូម្បីតែ​មាន​ចោរ​នៅ​លើ​ផ្លូវ​ក៏​គ្មាន​អ្នក​រើស​ដែរ អីចឹង​ពេល​ហ្នឹង​ឃើញ​​លុយ​ដុល្លារ​ហូរ​ចូល​មក​ ជម្រើស​ដែល​ល្អ​បំផុត​សម្រាប់​គាត់​គឺ​គាត់​ត្រូវ​តែ​ទទួល​យក។ ដល់​អីចឹង​លុយ​រៀល​បាត់​បង់​​តម្លៃ»។

បើ​តាម​លោក​ជំទាវ​ ដោយ​សារ​តែ​ប្រជាជន​​ស៊ាំ​នឹង​ការ​ចាយ​លុយ​ដុល្លារ​ទៅ​ ធ្វើ​​ឱ្យ​ប្រជាជន​​នឹក​ឃើញ​តែ​លុយ​ដុល្លារ​រាល់​ការ​ចំណាយ​តូច​ធំ​ទាំង​អស់ ហើយ​យូរ​ៗ​ទៅ​ក៏​​ក្លាយ​ជា​ទម្លាប់​តែ​ម្ដង។​

ដោយ​ការរក្សាបាន​នូវ​ស្ថិរភាព​ និង​ការបើកចំហ​នៃ​សេដ្ឋកិច្ច សកម្មភាព​ពាណិជ្ជកម្ម ទេសចរណ៍ និង​វិនិយោគ បរទេស​បាន​កើន​ឡើងជា​បន្តបន្ទាប់ និង​បាន​ជំរុញ​ដល់​ការរីកចម្រើន​សេដ្ឋកិច្ច ។ ជា​លទ្ធផល ប្រាក់​ដុល្លារ​ទទួល បានការ​ពេញនិយម​កា​ន់​តែ​ច្រើន និង ត្រូវបាន​ប្រើប្រាស់​យ៉ាង​ទូលំទូលាយ​សម្រាប់​ស្ទើរ​គ្រប់​សកម្មភាព​ជំនួញ ជាពិសេស ប្រតិបត្តិការ​ដែលមាន​ទំហំ​ទឹកប្រាក់​ធំ និង នៅតាម​ទីប្រជុំជន​។​

​ការ​ប្រើប្រាស់​រូបិយប័ណ្ណ​ដុល្លារ​លើ​ទីផ្សារ​នៃ​ប្រទេស​កម្ពុជា​មាន​ប្រមាណ​​ជាង​ ៨០ % ដោយឡែក​ការ​ប្រើប្រាស់​រូបិយប័ណ្ណ​រៀល​​ប្រហែល​ ២០%។ ​

ទោះជា​យ៉ាងណាក៏ដោយ​ផ្អែក​តាម​ការ​ស្ទាបស្ទង់​មតិ​មួយចំនួន​បាន​បង្ហាញថា ប្រាក់រៀល​ជាតិ​ត្រូវបាន​ប្រើ ប្រាស់​យ៉ាងសកម្ម​នៅតាម​ទីជនបទ និង​ក្នុង​ប្រតិបត្តិការ​ដែលមាន​ទំហំ​ទឹកប្រាក់​តូច សម្រាប់​ជា​មធ្យោបាយ​ទូទាត់ សន្សំ និង ផ្តល់​ឥណទាន។ គួរកត់សម្គាល់​ផងដែរ​ថា តម្រូវការ​ប្រាក់រៀល​មានការ​កើនឡើង​ជា​បន្ត​បន្ទាប់ ក្នុង​រយៈពេល​ចុងក្រោយ​នេះ និង កំពុង​បន្ត​កើនឡើង​បន្ថែមទៀត ​បន្ទាប់​​​ពី​គ្រឹះស្ថាន​ឯកជន​មួយ​ចំនួន​ និង​ធនាគារ​ជាតិ​នៃ​កម្ពុជា​ បាន​និង​កំពុង​ជំរុញ​ឱ្យ​​​មាន​ការ​ចាយ​ប្រាក់​រៀលក្នុង​អាជីវកម្ម​៕​

​ដោយ​៖ ប៉ុ​ម ទូច​
​ប្រភព​៖ ធនាគារជាតិ​នៃ​កម្ពុជា​

ប្រសិន​ជា​អ្នក​ចូល​ចិត្ត​អត្ថបទ​នេះ​សូម​ជួយ​ Like & Shared

អត្ថបទពេញនិយម

​កម្រង​គំនិត​សំខាន់ៗ​របស់​ ឡៅ សឺ (​Lao Tzu)​​​ទស្សនវិទូ​របស់​ចិន​

មេរៀន​សំខាន់ៗ​ដែល​​អ្នក​អាច​រៀន​សូត្រ​ពី​​​​សម្រង់​សម្ដី​ទាំង​៨​​របស់​លោក ​Jack Ma មហាសេដ្ឋី​ចិន​​ ​

គន្លឹះ​សម្ងាត់​ទាំង ៦​ ដែល​ជួយ​អភិវឌ្ឍ​ចិត្ត​គំនិត​របស់​អ្នក​ឲ្យ​ដូច​មហា​សេដ្ឋី

គន្លឹះ​ដ៏​មុត​ស្រួច​ទាំង​៣​ក្នុង​ការ​កែ​ប្រែ​និង​អភិវឌ្ឍ​អ្នក​ឲ្យ​ក្លាយ​ទៅ​ជា​មនុស្ស​ថ្មី​មួយ​ទៀត

អត្ថបទពាណិជ្ជកម្ម​

វីង និង ឌី អេហ្វ អាយ សហការគ្នាផ្ដល់ការទូទាត់ ដោយពុំប្រើប្រាស់ក្រដាស់ប្រាក់ ដល់អតិថិជន និងអ្នកផ្គត់ផ្គង់របស់ខ្លួន

លោក ព្រាប សុវត្ថិ ដឹកដៃកូនប្រុសទំាង២នាក់ធ្វើកក្រើកឆាកតន្រ្តី Tiger Street Football Festival 2019នាវគ្គផ្តាច់ព្រ័ត្រទូទាំងប្រទេស

ក្រុមស្នងការដ្ឋាននគរបាលខេត្តព្រះសីហនុ “A” ឈ្នះជើងឯកនៃ Tiger Street Football Festival 2019 លើកទី៧ ទូទាំងប្រទេសជាលើកដំបូង

អេ អឹម ខេ ត្រូវបានទទួលស្គាល់ជាគ្រឹះស្ថានមីក្រូហិរញ្ញវត្ថុ ដែលជួយឱ្យជីវភាពប្រជាពលរដ្ឋក្រីក្រមានភាពប្រសើរឡើង

អានអត្ថបទតាមខែ

March 2019
M T W T F S S
« Feb    
 123
45678910
11121314151617
18192021222324
25262728293031