អ្នក​ទាំងអស់​គ្នា​ប្រហែល​ធ្លាប់​ឃើញ ឬ​ធ្លាប់​បាន​ប្រើ​ប៊ិច iPad ដែល​ជា​ប៊ិច Stylus ហើយ​ចំណែក​ប៊ិច Me-PEN Stylus នេះ​វិញ ប្រហែល​អាច​ធ្វើ​ឱ្យ​អ្នក​ចាប់អារម្មណ៍ ជាមួយ​មុខងារ​ពិសេស​អាច​ប្រើ​ធ្វើ​ជា​មេម៉ូរី​សម្រាប់​ផ្ទេរ​ឯកសារ​ចេញចូល​ជាមួយ​ទូរស័ព្ទ iPhone បាន។ ប៊ិច Me-Stylus នេះ​ត្រូវ​បាន​ឌីហ្សាញ​រូបរាង​ស្អាត​ទាន់សម័យ ធ្វើ​ពី​អាលុយម៉ីញ៉ូម និង​មាន​មុខងារ​ពិសេស​ពីរ​យ៉ាង។

Me-PEN stylus នេះ​ត្រូវ​បាន​បង្កប់​ដោយ​អង្គ​ចងចាំ ឬ​មេម៉ូរី​ទំហំ​ 16GB ឬ 32GB មាន​លក្ខណៈ​ដូច​ទៅ​នឹង Flash ដែល​អាច​ដក​ដោត​ជាមួយ​ទូរស័ព្ទ iPhone បាន ហើយ​ផ្ដល់​ភាព​ងាយស្រួល​ក្នុង​ការ​គ្រប់គ្រង​ថត​ឯកសារ​ថែមទៀត។

ស្មាតហ្វូន និង​ថេប្លេត​កំពុង​ក្លាយ​ជា​ឧបករណ៍​អេឡិចត្រូនិក​ដ៏​ពេញ​និយម​យ៉ាង​ខ្លាំង​ក្នុង​ពេល​បច្ចុប្បន្ន ប៉ុន្តែ​អ្នក​ប្រើ​អាច​ពិបាក​ក្នុង​ការ​រក្សា​ទិន្នន័យ​ច្រើន ព្រោះ​ឧបករណ៍​ទាំង​នោះ មាន​អង្គ​ចងចាំ​ត្រឹម​ដែន​កំណត់​មួយ​ប៉ុណ្ណោះ។ ដូច្នេះ​ប៊ិច Me-PEN stylus នេះ​នឹង​ដើរ​តួនាទី​សំខាន់​សម្រាប់​លោក​អ្នក​អាច​កូពី (copy) ឯកសារ​ខ្លះ​ចេញ​ពី iPhone នៅ​ពេល​ទូរស័ព្ទ​ពេញ​មេម៉ូរី ដើម្បី​ឱ្យ​អ្នក​អាច​ថតរូប និង​ដំឡើង​កម្មវិធី​ថែមទៀត​បាន។

យ៉ាងណា​ប៊ិច Me-PEN ពេល​នេះ​ស្ថិត​ក្នុង​គម្រោង Kickstarter នៅ​ឡើយ ដោយ​គេ​រង់ចាំ​មូលនិធិ​គ្រប់គ្រាន់ ដើម្បី​ផលិត​លក់​នៅ​លើ​ទីផ្សារ​ក្នុង​តម្លៃ​ចាប់ពី ៣៥ដុល្លារ​អាមេរិក​ពេល​ឆាប់ៗ​ខាង​មុខ៕