មូលហេតុ៣យ៉ាងបញ្ជាក់ថា សេវាកម្មបម្រើអតិថិជន (Customer service) ជាចំណុចស្លាប់រស់របស់អាជីវកម្ម
ភាគច្រើនណាស់ សម្រាប់ក្រុមហ៊ុន មិនថាតូចមិនថាធំ តែងតែមើលរំលង ការផ្ដល់សេវាល្អ ចំពោះអតិថិជនរបស់ពួកគេ។ ក្រុមហ៊ុនតូចៗ ខ្លះ មិនសូវជាដឹងពីវិធី ក្នុងការផ្ដល់សេវាកម្មឲ្យភ្ញៀវឲ្យបានល្អ ឯក្រុមហ៊ុនដែលធំៗ វិញតែងព្រងើយកន្តើយនឹងភ្ញៀវ ដោយសារគេមានភ្ញៀវ មិនចេះខ្វះទៅ ហើយ។ ហេតុនេះអ្នកគប្បីដឹងថាមូលហេតុសំខាន់ ដែលអ្នកត្រូវខ្វល់ខ្វាយពីការផ្ដល់សេវាកម្មដល់អតិថិជនអ្នក?
១) ភ្ញៀវនឹងចងចាំសេវាដែលអ្នកផ្ដល់ឲ្យជារៀងរហូត៖ អតិថិជននឹងចងចាំអ្នកជារៀង រហូត ដោយសារតែសេវាកម្មល្អ របស់អ្នកទៅកាន់ពួកគេ។ អ្នកប្រហែលជាឆ្ងល់ហើយ ហេតុអ្វីពួកគេអាចចាំពីសេវាកម្មអ្នកច្បាស់ម្ល៉េះ។ តាមពិតទៅពួកគេមិនត្រឹមតែជាវ ផលិតផលអ្នកទេ ពួកគេទាក់ទង និយាយ និងសហការ ជាមួយអ្នក។ ដូចនេះ អ្នកត្រូវប្រាកដថា បុគ្គលិកក្នុងក្រុមហ៊ុនអ្នកត្រូវផ្ដល់សេវាកម្មដល់អតិថិជនឲ្យបានល្អ ក្នុងនោះគួរមាន កុំបង្កបញ្ហាជាមួយភ្ញៀវ ផ្ដល់អ្វីដែលពួកគាត់ចង់បាន ត្រូវយល់ច្បាស់ពីផលិតផលខ្លួន មានទំនួលខុសត្រូវខ្ពស់។
២) បើសេវាបម្រើភ្ញៀវមិនល្អហើយ ពួកគេក៏គិតថាផលិតផលអ្នកមិនល្អដែរ៖ ដូចនេះសេវាកម្មល្អ គឺពិតជាសំខាន់។ បើសេវាមិនល្អ អតិថិជន ក៏គិតថាផលិតផលអ្នកមិនល្អដូចគ្នា។ ដូចនេះអ្វីដែល អ្នកគួរគិតដំបូងគេ គឺសេវាល្អ រីឯផលិតផល គឺទី២។
៣) បង្ហាញថាអ្នកខ្វាយខ្វល់ពីអតិថិជនខ្លួន៖ អតិថិជន គឺជាទ្រព្យរបស់អ្នក។ បើអ្នកបង្ហាញពីការខ្វល់ខ្វាយ និងយកចិត្តទុកដាក់ហើយនោះ ទ្រព្យអ្នកនឹងមិនទៅណា ហើយទ្រព្យថ្មីៗ នឹងកាន់តែកើនឡើង ហូរចូលមិនចេះដាច់ហើយ៕
ប្រែសម្រួល៖ ព្រំ សុវណ្ណកណ្ណិកា ប្រភព៖ www.business2community.com
