ហេតុអ្វីចាំបាច់ត្រូវមានភាពស្មោះត្រង់ចំពោះអតិថិជន (Customer Loyalty)?
នៅក្នុងទីផ្សារអាជីវកម្ម មិនចំពោះថាលោកអ្នកកំពុងដឹកនាំក្រុមហ៊ុនដ៏ធំសម្បើមមួយ ឬ អាជីវកម្មតូចតាចមួយយ៉ាងណានោះទេ ភាពស្មោះត្រង់នឹងអតិថិជន (Customer Loyalty)ពិតជាមានតម្លៃណាស់។ ការវិនិយោគពេលវេលាយ៉ាងច្រើន និង ថាមពលលើការលើកកម្ពស់ភាពស្មោះត្រង់ទៅនឹងអតិថិជន គួរតែជាសមាសភាគមួយដ៏សំខាន់រាល់យុទ្ធសាស្ត្រទីផ្សារអាជីវកម្មទាំងអស់។ វាត្រូវបានអ្នកជំនួញ សហគ្រិន ជាពិសេសក្រុមអ្នករកស៊ីអះអាងថា ជាកត្តាមួយដ៏សំខាន់ក្នុងការជំរុញឲ្យអតិថិជនកាន់តែជាវផលិតផល ឬ សេវាកម្មរបស់ខ្លួនក្នុងចំនួនមួយដ៏ច្រើននៅក្នុងចំណែកទីផ្សារ។ ដូច្នេះហើយបានជានៅទីនេះ មានហេតុផលសំខាន់ៗជាច្រើនដែលការកសាងភាពស្មោះត្រង់ទៅនឹងអតិថិជនមានតម្លៃយ៉ាងធំធេងធ្វើឲ្យអាជីវកម្មទាំងអស់អាចបោះជំហានទៅមុខកាន់តែជោគជ័យ ព្រមទាំងអាចទទួលបានភាពជឿជាក់ និងការគាំទ្រអតិថិជនកាន់តែច្រើនទៀតផង។
១) ជំរុញកំណើននៃការលក់ តាមន័យអាជីវកម្ម ភាពស្មោះត្រង់ទៅនឹងអតិថិជន នឹងជំរុញឲ្យមានកំណើននៃការជាវលើសេវាកម្ម ឬ ផលិតផលរបស់លោកអ្នកម្តងហើយម្តងទៀត។ ទោះបីជាអាជីវកម្មរបស់លោកអ្នកជាប្រភេទអាជីវកម្មអ្វីនោះទេ នេះលោកអ្នកអាចកត់សម្គាល់ឃើញដោយខ្លួនឯងថា លោកអ្នកអាចលក់ផលិតផល ឬ សេវាកម្មរបស់លោកអ្នកកាន់តែច្រើនជាមួយអតិថិជនម្នាក់ពេញមួយឆ្នាំ ប្រសើរជាងលក់ជូនអតិថិជនទើបនឹងចូលថ្មីចំនួន ១០ អ្នកទៀតផង។ នេះនឹងធ្វើឲ្យ Brand Name ឬ ឈ្មោះម៉ាកផលិតផលរបស់អ្នកចូលជ្រែកទីផ្សារបន្តិចម្តងៗ។
២) បង្កើនប្រាក់ចំណូលបន្ថែម នេះជាចំណុចមួយមិនអាចប្រកែកបាន ព្រោះថានៅពេលដែលលោកអ្នកកសាងទំនាក់ទំនងយ៉ាងស្អិតល្មួតជាមួយអតិថិជនដោយភាពស្មោះត្រង់ វានឹងបង្កភាពងាយស្រួលដល់លោកអ្នកនៅក្នុងការលក់ជូនផលិតផល ឬ សេវាកម្មក្រុមហ៊ុនរបស់លោកអ្នក។ ប្រការនេះ វានឹងធ្វើឲ្យការលក់របស់លោកអ្នកមានកំណើនកាន់តែខ្ពស់ ហើយនៅពេលការលក់មានកំណើនកាន់តែខ្ពស់ហើយនោះ វាគ្មានអ្វីត្រូវឆ្ងល់នោះឡើយដែលថា លោកអ្នកនឹងមិនអាចទទួលបានប្រាក់ចំណូលបន្ថែមកាន់តែច្រើននោះ។
៣) ងាយស្រួលក្នុងការពង្រីកអាជីវកម្មបន្ថែម លោកអ្នកអាចសាកគិតបន្តិចទៅមើល៍ថា នៅពេលដែលលោកអ្នកមានអតិថិជនជឿជាក់ច្រើនហើយនោះ តើវាផ្ដល់ភាពងាយស្រួលអ្វីខ្លះដល់ការធ្វើអាជីវកម្មថ្មីៗរបស់លោកអ្នក។ កាលពីមុនលោកអ្នកអាចលក់ត្រឹមតែម៉ូតូ តែថ្ងៃនេះលោកអ្នកបានពង្រីកអាជីវកម្មបន្ថែមបើកលក់រថយន្តបន្ថែមទៀត ឬ ក៏ពង្រីកសេវាកម្មជួសជុលរថយន្តជាដើម។ តើនេះវាមិនលំបាកណាស់មែនទេដើម្បីផ្សព្វផ្សាយមុខរបរថ្មីនេះនៅកាន់តែអតិថិជនថ្មីចាស់របស់លោកអ្នក? ចំណុចនេះហើយដែលមិនត្រឹមតែធ្វើឲ្យអាជីវកម្មចាស់របស់លោកអ្នកកាន់តែរីកដុះដាលប៉ុណ្ណោះទេ តែថែមទាំងផ្តល់ឱកាសយ៉ាងងាយស្រួលអាចពង្រីកសេវាកម្មថ្មីទៀតផង ដូចគេនិយាយថា ព្រួញមួយបាញ់បានសត្វពីរនោះអី!
៤) ជួយការពារលោកអ្នកពីគួរប្រជែងដោយស្វ័យប្រវត្តិ វាមិនមែនជារឿងងាយស្រួលនោះទេដើម្បីឲ្យអាជីវកម្មរបស់លោកអ្នកបោះជំហានទៅមុខ ត្បិតអីលោកអ្នកអាចនឹងប្រឈមមុខបញ្ហាជាច្រើន ហើយបើមានគូប្រជែងច្រើនទៀតនោះ គឺវាជាបញ្ហាលំបាកមួយ។ ប៉ុន្តែសូមកុំភ្លេចថា ភាពស្មោះត្រង់របស់លោកអ្នកទៅកាន់អតិថិជនជាច្រើននៅពេលកន្លងមកអាចធ្វើឲ្យពួកគេជួយការពារអ្នកដោយស្វ័យប្រវត្តិបាន។ ការរួមចំណែករបស់អតិថិជនរបស់អ្នកនៅទីនេះគឺថា ពួកគេអាចបង្ហាញភាពជឿជាក់ឥតងាករេ ជួយផ្សព្វផ្សាយដល់អតិថិជនផ្សេងទៀត ជាពិសេសនៅក្នុងស្ថានភាពមួយដែលមានទីផ្សារថ្មីថ្មោងចូលមកដល់។ រវាងអ្នកលក់ និងអ្នកទិញ ជានិច្ចកាលអ្នកលក់នឹងរីករាយ និង ចូលចិត្តអួតសរសើរ ព្រមទាំងជួយផ្សព្វផ្សាយណែនាំពីក្រុមហ៊ុនរបស់លោកអ្នកបន្ត នៅពេលដែលលោកអ្នកបានផ្ដល់សេវាកម្ម ឬ ផលិតផលល្អដល់ពួកគេប្រកបដោយភាពស្មោះត្រង់។
៥) ទទួលបានដំបូន្មានល្អៗ និង ភាពស្មោះត្រង់មកវិញពីអតិថិជន នេះជាចំណុចសំខាន់មួយទៀតដែលគ្រប់ក្រុមហ៊ុនអាជីវកម្មទាំងអស់ចង់ដឹងបំផុតពីអតិថិជនអ្នកប្រើប្រាស់។ ក្រុមហ៊ុនខ្លះបានដាក់លក់សាកល្បង ហើយក៏មានក្រុមហ៊ុនខ្លះទៀតបានស្រាវជ្រាវស្ទាបស្ទង់ទីផ្សារជាមុន មុននឹងសម្រេចដាក់លក់ផលិតផលសេវាកម្មខ្លួនចូលទៅកាន់ទីផ្សារ។ យ៉ាងណាមិញសម្រាប់លោកអ្នក គោលដៅដែលចង់បានបំផុតនៅទីនេះ គឺកុំឲ្យលក់ទៅវាខាតដើមនិង កែលំអចំណុចខ្វះខាតឲ្យបានល្អនេះឯង។ ប៉ុន្តែអ្វីដែលគួរកត់សម្គាល់នោះគឺថា អតិថិជនទាំងនោះមិនប្រាកដថា អាចជួយផ្ដល់គំនិតយោបល់ដោយស្មោះត្រង់ និង គ្រប់ជ្រុងជ្រោយមកឲ្យលោកអ្នកនោះឡើយ ហើយក៏មានអតិថិជនខ្លះទៀតមិនខ្វល់ពីការរកស៊ីរបស់អ្នកទៅទៀត ព្រោះប្រហែលជាពួកគេមានបទពិសោធន៍មិនល្អដោយសារលោកអ្នកចូលចិត្តរកស៊ីលក់ជើងខ្លួនឯងផងក៏មិនដឹង។ មកដល់ពេលនេះធ្វើឲ្យគេនឹកឃើញថា ភាពស្មោះត្រង់ទៅកាន់អតិថិជនពិតជាមានសារសំខាន់ ដោយហេតុថា ការកសាងភាពស្មោះត្រង់របស់លោកអ្នកចំពោះពួកគេ ដូចជា ផ្តល់ជូនផលិតផលសេវាកម្មមានគុណភាពខ្ពស់ តម្លៃសមរម្យ មិនបន្លំបោកប្រាស់ រួមទាំងអាចជួយស្វែងរកដំណោះស្រាយឲ្យពួកគេបានយ៉ាងមានប្រសិទ្ធភាពនឹងអាចធ្វើឲ្យអតិថិជនទាំងនេះមានទំនុកទុកចិត្ត និង បង្ហាញភាពពេញចិត្តពេញថ្លើមប្រាប់កំហុសខុសឆ្គងរបស់លោកអ្នកបានដោយមិនបាច់ភ័យព្រួយ។
៦) កាត់បន្ថយការចំណាយ គេបានរកឃើញថា ការចំណាយក្នុងការផ្សព្វផ្សាយ (Promotion) ដើម្បីទាក់ទាញអតិថិជនថ្មីៗ លោកអ្នកត្រូវចំណាយប្រាក់ច្រើនលើការផ្សព្វផ្សាយ បញ្ចុះតម្លៃ រង្វាន់លើកទឹកចិត្ត អប់រំ និង ណែនាំពីផលិតផល ឬ សេវាកម្មរបស់លោកអ្នកជាដើម។ ប៉ុន្តែ នេះមិនប្រាកដថា អតិថិជនថ្មីៗទាំងនោះជឿជាក់ និង ជួយគាំទ្រផលិតផល ឬសេវាកម្មរបស់លោកអ្នកនោះឡើយ។ យុទ្ធសាស្ត្រនេះ ត្រូវបានគេរកឃើញថា បានចំណាយខ្ពស់ជាងការចំណាយលើអតិថិជនស្នូលរបស់លោកអ្នកទៅទៀត ពោលគឺអតិថិជនដែលលោកអ្នកស្គាល់ចិត្តថ្លើមគ្នាយ៉ាងស៊ីជម្រៅនៅពេលកន្លងមកពី ៦ ទៅ ៧ ដងឯណោះ។ ម្ល៉ោះហើយការផ្តោតលើភាពស្មោះត្រង់ទៅនឹងអតិថិជន គឺជាជួយឥទ្ធិពលមួយលើអនាគតជោគវាសនាអាជីវកម្មរបស់លោកអ្នកឲ្យលូតលាស់បានល្អប្រសើរមិនថា អតិថិជនចាស់ ឬ ថ្មីនោះទេ ឲ្យតែគោលជំហរដ៏ល្អនេះបានក្លាយជាក្រមសីលធម៌រកស៊ីដ៏សំខាន់ក្នុងអាជីវកម្មរបស់លោកអ្នក៕
