បច្ចេកវិទ្យា​​​ដែល​ផលិត​ឡើង​ដោយ​ស្នាដៃ​​​កូន​ខ្មែរ​ក្រោម​ការ​ជួយ​ជ្រោម​ជ្រែង​ពី​ក្រុម​​អ្នក​ជំនាញ​បរទេស​បាន​​​ឈ្នះ​ពាន​​លំដាប់​អន្តរជាតិ​មួយ​ពី​កម្មវិធី​ CES 2016 Innovation Award ដែល​​ធ្វើ​ឡើង​នៅ​ទីក្រុង​ Las Vegas សហរដ្ឋ​អាមេរិក​កាល​ពី​ពេល​ថ្មី​ៗ​​កន្លង​ទៅ​នេះ។ ​នេះ​បើ​តាម​ការ​ចុះ​ផ្សាយ​​ដោយ​គេហទំព័រ​ stuff-cambodia.com។ ​ក្រុម​វិស្វករ​វ័យ​​ក្មេង​​​ដែល​ធ្វើ​ការ​នៅ​​​​មូលនិធិ​មនុស្សធម៌​​ Golden West ​ដែល​ស្ថិត​នៅ​​ទីក្រុង​ភ្នំពេញ​បាន​បង្កើត​គំនិត​ច្នៃ​ប្រឌិត​​ឧបករណ៍​សម្រាប់​ដោះ​គ្រាប់​មីន​​ដែល​មិន​ទាន់​ផ្ទុះ​​ដោយ​ប្រើ​បច្ចេកវិទ្យា​ម៉ាស៊ីន​ព្រីន​ 3D។ ​តាម​ការ​ចុះ​ផ្សាយ​របស់​ប្រភព​ខាង​លើ​ គម្រោង​នេះ​ គឺ​ជា​ផ្នែក​មួយ​នៃ​គម្រោង​​ផលិត​ឧបករណ៍​ហ្វឹកហាត់​សាកល្បង​ដោះ​គ្រាប់​មិន​ទាន់​ផ្ទុះ​ដែល​ហៅ​កាត់​ថា​ AOTM គាំទ្រ​ដោយ​​អង្គការ​ក្រៅ​រដ្ឋាភិបាល​មួយ​នៅ​សហរដ្ឋ​អាមេរិក​ ព្រម​ទាំង​សហការ​ជា​មួយ​សមាជិក​មួយ​ចំនួន​ពី​​​វិទ្យាស្ថាន​ Massachusetts Institute of Technology (MIT) របស់​សហរដ្ឋ​អាមេរិក​ និង​សាកលវិទ្យាល័យ​ Technology and Design របស់​ប្រទេស​សិង្ហបុរី។ គំនិត​ផ្ដួចផ្ដើម​របស់​ក្រុម​វិស្វករ​កម្ពុជា​នេះ​ នឹង​អាច​​យក​ទៅ​ប្រើ​ប្រាស់​នៅ​ទូទាំង​ពិភពលោក​សម្រាប់​ហ្វឹកហាត់​សាកល្បង​ដោះ​គ្រាប់​មិន​ទាន់​ផ្ទុះ។ គម្រោង​នេះ​​បាន​ឈ្នះ​រង្វាន់​ផ្នែក​ «បច្ចេកវិទ្យា​ដែល​ធ្វើ​ឱ្យ​ពិភពលោក​មាន​ភាព​ល្អ​ប្រសើរ»​ ក្នុង​​ចំណោម​​គំនិត​​បង្កើត​ថ្មី​​ជា​ច្រើន​ទៀត​ដែល​​ឈ្នះ​បាន​ពាន​នៅ​ក្នុង​កម្មវិធី​ខាង​លើ៕ ដោយ៖ រតនៈ​វិភូ​ ​