ក្រុមអ្នកស្រាវជ្រាវពីមហាវិទ្យាល័យ King's College ក្នុងទីក្រុងឡុងដុង បានបង្កើតកម្មវិធី (App) ទូរស័ព្ទ មានមុខងារពិសេសជា tool មួយអាចជួយដល់វិស័យវេជ្ជសាស្ត្របានមួយផ្នែក។ កម្មវិធីថ្មីដែលមានឈ្មោះ QUiPP នេះ នឹងជួយដល់ការងាររបស់វេជ្ជបណ្ឌិត ក្នុងការវិភាគដឹង អំពីកម្រិតហានិភ័យនៃការសម្រាលកូនមិនគ្រប់ខែ។
កម្មវិធី QUiPP មានលក្ខណៈពិសេស អាចប្រមូលទិន្នន័យផ្ទាល់ខ្លួន ដូចជា ស្ថានភាពនៃការមានផ្ទៃពោះ ដើម្បីមើលពីឱកាសរបស់ស្ត្រីក្នុងការសម្រាលបុត្រមុនរយៈពេល ៣៧សប្ដាហ៍។ ក្បូនដោះស្រាយរបស់កម្មវិធីនេះ ថែមទាំងប្រមូលយកព័ត៌មានគណនីអំពីស្បូន និងគភ៌ សារធាតុរាវពីក្នុងរន្ធយោនី ដែលពេទ្យចាប់ផ្ដើមធ្វើពិសោធន៍ នៅដំណាក់កាលពាក់កណ្ដាលដំបូងនៃរយៈពេលពពោះ ៩ខែ។
ផ្អែកតាមមហាវិទ្យាល័យ King's College ឱ្យដឹងថា កម្មវិធី QuiPP បំពេញមុខងារយ៉ាងល្អ ដើរតួនាទីជា tool សម្រាប់វិនិច្ឆ័យ។ គេបានធ្វើតេស្តទៅលើស្ត្រីចំនួន ១២៥០នាក់ ដែលមានហានិភ័យខ្ពស់ ប្រឈមនឹងការសម្រាលកូនមុនខែ ឬកើតមិនគ្រប់ខែ។ កម្មវិធីនេះ អាចត្រូវយកទៅប្រើដោយគ្រូពេទ្យ ដើម្បីកែលំអ លើប្រូបាប៊ីលីតេនៃការសម្រាលកូនមិនគ្រប់ខែ និងដើម្បីឱ្យមានសក្ដានុពលក្នុងការគ្រប់គ្រងព្យាបាលរបស់មន្ទីរព្យាបាលរោគ។
កម្មវិធីនេះ ឥឡូវអាចដំណើរការបាននៅលើប្រព័ន្ធប្រតិបត្តិការ iOS ហើយ។ យ៉ាងណា វាត្រូវការពេលវេលាខ្លះទៅមុខទៀត ដើម្បីវាយតម្លៃមុនពេល វាក្លាយជាកម្មវិធីផ្ដល់ដំណោះស្រាយគួរឱ្យទុកចិត្តក្នុងការរកឃើញហានិភ័យនៃការសម្រាលកូនមិនគ្រប់ខែ៕
