នៅពេល Windows 10 ត្រូវបានប្រកាសចេញនៅថ្ងៃទី២៩ កក្កដា ឆ្នាំមុន វាជាប្រព័ន្ធប្រតិបត្តិការកុំព្យូទ័រល្អបំផុតដែលដាក់ចេញដោយ Microsoft។ មកដល់ពេលនេះ វាមានរយៈពេល ៦ខែហើយ ជាមួយការក្ដាប់ចំណែកទីផ្សារបាន ១០% ច្រើនជាង Windows XP និង Windows 8.1 ក្លាយជា OS ចំណាត់ថ្នាក់លេខ២ ដែលគេប្រើច្រើនបំផុតលើពិភពលោក ប៉ុន្តែឈរនៅពីក្រោយ Windows 7 នៅឡើយ។
របាយការណ៍បានពី NetMarketShare បង្ហាញថា Windows 10 នៅពេលនេះ បានក្ដាប់ចំណែកទីផ្សារសកលចំនួន ១១,៨៥% កើនឡើងពី ៩,៩៦% នៅខែធ្នូឆ្នាំ២០១៥ កន្លងទៅ។ រីឯ Windows XP វិញ ពេលនេះក្ដាប់ចំណែកទីផ្សារបានត្រឹម ១១,៤២% ខណៈ ដែល Windows 8.1 មានត្រឹម ១០,៤%។ ក្នុងនោះគេសង្កេតឃើញ Windows 7 ជាប្រព័ន្ធប្រតិបត្តិការដែលរក្សាបានចំណែកទីផ្សារធំជាងគេនៅឡើយគឺមានរហូតដល់ ៥២,៤៧%។
ក្រុមហ៊ុន Microsoft បានបញ្ជាក់កាលពីខែមុនថា Windows 10 មានកំណើនអ្នកប្រើយ៉ាងរហ័ស។ វាត្រូវបានគេដំឡើងប្រើនៅលើកុំព្យូទ័រប្រមាណ ៧៥លានគ្រឿងទៅហើយសម្រាប់តែរយៈពេល ៤សប្ដាហ៍ដំបូង។ លុះរយៈពេល ១០សប្ដាហ៍ វាត្រូវបានគេដំឡើងនៅលើម៉ាស៊ីនប្រមាណ ១១០លានគ្រឿងថែមទៀត។
នៅក្នុងខែធ្នូ កន្លងទៅ Windows 10 ដំណើរការនៅលើកុំព្យូទ័រប្រមាណ ២០០លានគ្រឿង ដែលនេះជាលទ្ធផលវិជ្ជមានសម្រាប់គម្រោងរបស់ Microsoft ដែលត្រូវការឱ្យ OS ខ្លួនគ្របដណ្ដប់លើម៉ាស៊ីន ១ពាន់លានគ្រឿងនៅរយៈពេល ២ ទៅ ៣ឆ្នាំ ខាងមុខ។
សូមបញ្ជាក់ថា សម្រាប់លោកអ្នកកំពុងប្រើ Windows 7 និង 8.1 គឺនៅមានរយៈពេល ៦ខែទៀតក្នុងការ upgrade ឡើង Windows 10។ Microsoft ទើបបានប្រកាសថ្មីៗនេះថា អង្គប្រតិបត្តិ (CPU) ថ្មីនឹងអាចប្រើបានតែជាមួយ Windows ជំនាន់ចុងក្រោយនេះប៉ុណ្ណោះ៕
