សេចក្ដីរាយការណ៍ថា ក្រុមហ៊ុន Microsoft កំពុងចរចាទិញយកសមិទ្ធផល Developer បង្កើតក្ដារចុច SwiftKey ថ្មីៗនេះ ឥឡូវត្រូវបានក្រុមហ៊ុនសូហ្វ៊ែរយក្សនេះ អះអាងជាសាធារណៈហើយ។ ក្រុមហ៊ុនបានទិញយកសូហ្វ៊េរក្ដារចុចរហ័ស SwiftKey នេះក្នុងទំហំទឹកប្រាក់ ២៥០លានដុល្លារអាមេរិក ហើយបានបញ្ជាក់ទិសដៅអនាគតខ្លួនថា នឹងបន្តធ្វើការអភិវឌ្ឍក្ដារចុចពិសេសនេះ បង្កើតជា app សម្រាប់ Android និង iOS ជាបន្ត។
សូហ្វ៊ែរ keyboard ដូចជា SwiftKey និង WordFlow គឺត្រូវបានប្រើដើម្បីបង្កើនល្បឿនបញ្ចូលទិន្នន័យ (input) តួអក្សរបានរហ័សជាង Keyboard ទូទៅ។ វាមានមុខងារពិសេស ផ្ដល់បទពិសោធន៍ខ្ពស់ក្នុងការគូសវាសផ្គុំចេញពាក្យបានយ៉ាងលឿន ចំណេញពេលជាងក្ដារចុចមួយចំនួន។ អនុប្រធានផ្នែកស្រាវជ្រាវបច្ចេកវិទ្យាថ្មីលោក Harry Shum បានអះអាងទៅនឹងកិច្ចព្រមព្រៀងទិញលក់នេះលើ blog ផ្លូវការរបស់ក្រុមហ៊ុនកាលពីថ្ងៃពុធម្សិលមិញ បន្ទាប់ពីមានចចាមអារ៉ាមកាលពីថ្ងៃអង្គារ។
កាលពីខែតុលា ឆ្នាំទៅ SwiftKey បានប្រកាសចេញជំនាន់ក្ដារចុច alpha version ដែលឌីហ្សាញឡើងរឹតតែផ្ដល់ភាពងាយស្រួលដល់អ្នកប្រើ ក្នុងការវាយអក្សរបានរហ័សថែមទៀត ជាមួយមុខងារទស្សន៍ទាយ (predicting) ពាក្យដែលអ្នកចង់សរសេរពេញ។
នេះអាចជាមហិច្ឆតាថ្មីមួយទៀតរបស់ Microsoft ក្នុងការប្រមូលយកបទពិសោធន៍ពិសេសសម្រាប់បញ្ចូលក្នុងផលិតផលស្មាតហ្វូនខ្លួននៅពេលអនាគត។ លោក Shum បាននិយាយថា Microsoft គ្មានគម្រោងបញ្ឈប់ដំណើរការបង្កើត SwiftKey សម្រាប់ iOS និង Android នោះឡើយ តែបានសន្យាថា នឹងបន្តអភិវឌ្ឍថែមទៀត។
Microsoft មិនត្រឹមតែយកសូហ្វ៊ែររបស់ SwiftKey នោះទេ តែថែមទាំងប្រមូលយកបុគ្គលិករបស់ក្រុម Developer បង្កើតក្ដារចុចនេះថែមទៀត ឱ្យមកបម្រើការនៅក្នុងក្រុមហ៊ុន៕
