ក្រុមហ៊ុនជួញដូរប្រេងធំបំផុតរបស់ពិភពលោកថា ១០ឆ្នាំទៀតទើបតម្លៃប្រេងអាចឡើងថ្លៃវិញ
តម្លៃប្រេងនឹងនៅតែបន្តធ្លាក់ចុះរហូតដល់ទៅ១០ឆ្នាំខាងមុខទៀត ដោយសារតែកំណើនយឺតយ៉ាវ នៃសេដ្ឋកិច្ចរបស់ប្រទេសចិន។ នេះបើយោងទៅតាម អ្នកជំនាញរបស់ក្រុមហ៊ុនVitol Group Bv ដែលជាក្រុមហ៊ុនជួញដូរថាមពលដ៏ធំបំផុត របស់ពិភពលោក។
លោកIan Taylor ជានាយកប្រតិបត្តិរបស់ Vitol Group Bv ប្រាប់សារព័ត៌មានBloombergថា៖« វាពិតជាពិបាកណាស់ ក្នុងការរង់ចាំការកើនឡើងនៃតម្លៃប្រេងនេះ។ តម្លៃប្រេងវាអាច នឹងកើនទៅដល់ពាក់កណ្ដាល៥០ដុល្លារ ក្នុងមួយបារ៉ែលសម្រាប់១០ឆ្នាំទៅមុខ»។
ក្រុមហ៊ុនVitol ធ្វើជំនួញប្រេងច្រើនជាង៥លានបារ៉ែលក្នុងមួយថ្ងៃ ដែលវាអាចគ្រប់គ្រាន់ដល់តម្រូវការ នៃប្រទេសអាល្លឺម៉ង់ បារាំង និង អេស្ប៉ាញ។
លោក Taylor បាននិយាយថា តម្លៃប្រេងនេះនឹងគ្មានថ្ងៃអាចលើស១០០ដុល្លារនោះទេ ដោយសារតែការផ្គត់ផ្គង់គឺវាច្រើនហួសហេតុពេកនៅពេលដែលសេដ្ឋកិច្ចពិភពលោកមានបញ្ហា។ លើសពីនេះទៅទៀតប្រទេសអ៊ីរ៉ងកំពុងតែវិលត្រលប់មកកាន់ជំនួញប្រេងវិញ ដែលធ្វើឲ្យផ្គត់ផ្គត់ប្រេងគឺសម្បូរនៅលើទីផ្សារ៕
ដោយ៖ ព្រំ សុវណ្ណកណ្ណិកា
