លោក John C Maxwell បង្ហាញពីលក្ខណៈពិសេសទាំង៥យ៉ាងរបស់មនុស្សដែលចេះប្រើពេលវេលាយ៉ាងឆ្លាតវៃ
Jonh C Maxwell គឺជាកវីនិពន្ធម្នាក់នៅសហរដ្ឋអាមេរិកដែលភាគច្រើនគាត់និពន្ធសៀវភៅ ដែលទាក់ទងនឹងភាពជាអ្នកដឹកនាំ។ គាត់បានបង្ហាញថាពេលវេលាគឺមានសារៈសំខាន់ណាស់សម្រាប់អ្នករាល់គ្នា។ លក្ខណៈមនុស្សទាំង៥យ៉ាងដែលបង្ហាញថាគេកំពុងតែប្រើប្រាស់ពេលវេលាឆ្លាតវៃរួមមាន៖
១) មនុស្សដែលមានបំណងច្បាស់លាស់៖ នៅពេលអ្នកមានគោលបំណងក្នុងជីវិត អ្នកនឹងចង់ប្រើប្រាស់ពេលវេលាដ៏ត្រឹមត្រូវសម្រាប់អនុវត្តកិច្ចការទាំងនោះអោយជោគជ័យ។ អ្នកមិនអាចឈានទៅដល់ចំណុចកំពូលបានទេ ប្រសិនបើគ្មានគោលដៅច្បាស់លាស់។
២) មនុស្សដែលផ្ដល់តម្លៃទៅលើអ្វីមួយ៖ អ្នកដែលប្រើប្រាស់ពេលវេលាបានត្រឹមត្រូវគឺតែងតែផ្ដល់តម្លៃទៅលើកិច្ចការណាដែលគេបានចំណាយពេលវេលាទៅលើវា។ ប្រសិនបើអ្នកមិនចេះផ្ដល់តម្លៃទៅលើអ្វីមួយដែលអ្នកធ្វើនោះទេ វាហាក់ដូចជា មនុស្សម្នាក់គ្មានគោលដៅហើយរសាត់អណ្ដែតដោយគ្មានកោះត្រើយពិតប្រាកដ។
៣) មនុស្សដែលចេះដឹងពីភាពខ្លាំងរបស់ខ្លួនឯង៖ លោក Jim Sundberg ដែលជាកីឡាករអាជីពខាងផ្នែកBaseball នៅសហរដ្ឋអាមេរិកបាននិយាយថា៖ «អ្នកគួរចេះស្វែងរកភាពប្លែកពីគេរបស់អ្នកហើយ អប់រំខ្លួនឯងដើម្បីអភិវឌ្ឍវា»។ ដូច្នេះអ្នកគួរប្រើប្រាស់ពេលស្វែងរកភាពខ្លាំងរបស់អ្នក ហើយអនុញ្ញាតអោយវាអាចដឹកនាំអ្នកដោយជោគជ័យ។
៤) មនុស្សដែលចេះជ្រើសរើសសុភមង្គល៖ អ្នកត្រូវស្វែងរកពេលវេលាខ្លះ ដើម្បីសម្រាកកម្សាន្តសប្បាយក៏ដូចជាបន្ធូរអារម្មណ៍។ អ្នកនឹងប្រើប្រាស់ពេលវេលាបានត្រឹមត្រូវប្រសិនបើអ្នកចេះចំណាយពេលវេលាជាមួយគ្រួសារមិត្តភ័ក្ដិដើម្បីបង្កើនភាពសប្បាយរីករាយនៅក្នុងជីវិត។
៥) មនុស្សដែលចេះចាត់ចែងការងារ៖ អ្នកនឹងមិនខាតបង់ពេលវេលាទេប្រសិនបើ អ្នកចេះចាត់ចែងការងារហើយមានគម្រោងការក្នុងការធ្វើអ្វីមួយច្បាស់លាស់នោះ៕
ដោយ៖ ព្រំសុវណ្ណកណ្ណិកា
