លោក​អ្នក​ច្បាស់​ជាង ចង់​ឱ្យ​ទូរស័ព្ទ​របស់​ខ្លួន សាក​ថ្ម​ឆាប់​ចូល​រហ័ស មិន​ថា ស្មាតហ្វូន Android ឬ​មួយ​ទូរស័ព្ទ iPhone នោះ​ទេ។ ព្រោះ ងាយស្រួល​ចំពោះ​អ្នក​មមាញឹក​នឹង​កិច្ចការ​ច្រើន កុំ​ឱ្យ​ខាត​ពេល​ព្រោះតែ​រង់ចាំ​ទូរស័ព្ទ​សាក​ថ្ម​ឡើង​យឺត។ យ៉ាងណា អ្នក​ជំនាញ​បាន​បង្ហាញ​គន្លឹះ​ដ៏​សាមញ្ញ​ខ្លះៗ ដើម្បី​បង្កើន​ល្បឿន​សាកថ្ម​ទូរស័ព្ទ iPhone ឆាប់​ឡើង​ភាគរយ (%) ជាជាង​ការ​សាកថ្ម​តាម​វិធី​ធម្មតា។

១. បើក​មុខងារ Airplane Mode៖ បើក Airplane គឺ​មាន​ន័យ​ថា ទូរស័ព្ទ​របស់​អ្នក នឹង​កាត់ផ្ដាច់​ពី​តំណភ្ជាប់​សេវា​ទូរស័ព្ទ ហើយ​ក៏​ជៀសវាង​ខ្ជះខ្ជាយ​ថាមពល​ថ្ម ពេល​កំពុង​សាក ដែល​នាំឲ្យ​ការ​សាកថ្ម​ចូល​យឺត។ សូម​បញ្ជាក់​ថា ការ​បើក Airplane នឹង​ធ្វើឲ្យ​អ្នក​ដទៃ​អាច​ខល ឬ​ផ្ញើ​សារ​ចូល​ទូរស័ព្ទ​នោះ​បាន​ទេ ក៏​ជា​កត្តា​រួមផ្សំ​ដើម្បី​សន្សំសំចៃ​ការ​ប្រើ​ថាមពល​មួយ​ផ្នែក ដើម្បី​សាក​ថ្ម​ឆាប់​ចូល​ផង​ដែរ។

២. ដោះ​ស្រោម iPhone ចេញ៖ ការ​ប្រើ​ស្រោម​ហ៊ុមព័ទ្ធ ក្នុង​បំណង​ដើម្បី​ការពារ​ស្នាម​ឆ្កូត និង​ការ​ជ្រុះ​ធ្លាក់​បណ្ដាល​ឱ្យ​បែក ប៉ុន្តែ​វា​នឹង​ធ្វើឲ្យ​ទូរស័ព្ទ​ឆាប់​ឡើង​កម្ដៅ និង​ងំ​មិន​ងាយ​ចុះ​ត្រជាក់។ នេះ​ក៏​ជា​ហេតុ​មួយ​ធ្វើឲ្យ​ខ្ជះខ្ជាយ​ថាមពល​មួយ​ផ្នែក​ដែរ។ ពេល​កំពុង​សាកថ្ម អ្នក​គួរតែ​រក្សា​វា​ឱ្យ​ស្ថិត​នៅ​សីតុណ្ហភាព​ត្រជាក់​ល្មម ហើយ​គួរ​តែ​ដោះ​ស្រោម​ទូរស័ព្ទ​ចេញ​បណ្ដោះ​អាសន្ន ប្រសិន​ចង់​សាកថ្ម​ឆាប់​ចូល​លឿន។

៣. ប្ដូរ​ពី​ការ​ប្រើ​ដុំ​សាក iPhone ទៅ​ជា​ដុំ​សាក iPad៖ ចំណុច​ចុងក្រោយ​នេះ ប្រសិន​លោក​អ្នក​មាន​ឆ្នាំង​សាក iPad ក៏​អាច​ប្រើ​ដើម្បី​មក​សាក​ថ្ម iPhone បាន​ផងដែរ។ កុំ​បារម្ភ​ថា ខ្លាច​ដុំ​សាក​ខុស​គ្នា ប៉ុន្តែ​វា​មិន​ប៉ះពាល់​ដល់ iPhone នោះ​ឡើយ។ នេះ​បើ​តាម​ការ​អះអាង​របស់​អ្នក​ជំនាញ។ ការ​ប្រើ​ដុំ​សាក iPad គឺ​អាច​បញ្ចូល​ថាមពល​ថ្ម បាន​រហ័ស​មួយ​កម្រិត​ផង​ដែរ? សាកល្បង​អនុវត្ត​ម្ដង​មើល៍ តើ​បាន​ផល​យ៉ាងណា​ដែរ?

ដោយ៖ រឹទ្ធិរាជ
ប្រភព៖ businessinsider