កិច្ចការមានប្រយោជន៍៦យ៉ាង ដែលអ្នកត្រូវធ្វើនៅចុងសបា្តហ៍ដើម្បីឲ្យជីវិតកាន់តែប្រសើរ!
មនុស្សម្នាក់ៗ បន់ឲ្យតែដល់ចុងសបា្តហ៍ ដើម្បីបានសម្រាកឲ្យបានធូរស្រាលកម្លាំង ដោយសារធ្វើការអស់រយៈពេលជាច្រើនថ្ងៃមកហើយ។ សម្រាប់ថ្ងៃចុងសបា្តហ៍គឺជា ថ្ងៃសម្រាកប៉ុន្តែបើអ្នកមិនធ្វើអ្វីដែលមានប្រយោជន៍ នោះអ្នកនឹងគ្មានទទួលបានផលអ្វីឡើយ។ ដូច្នេះហើយ អ្នកគួរតែធ្វើអ្វីដែលល្អៗដើម្បីជួយឲ្យជីវិតរបស់លោកអ្នក កាន់តែមានជីវិតប្រសើរឡើង។
១) គេងឲ្យបានគ្រប់គ្រាន់ ប៉ុន្តែកុំច្រើនហួសហេតុ៖ ការគេងគឺពិតជាសំខាន់ខ្លាំងណាស់សម្រាប់មនុស្សទូទៅ ជាពិសេសអ្នកដែលធ្វើការច្រើនក្នុងមួយថ្ងៃៗ ដូច្នេះហើយគេអាចយកពេលចុងសបា្តហ៍ដើម្បីជួសជុលការគេងមិនគ្រប់កន្លងមក។ ត្បិតការគេងសំខាន់ ប៉ុន្តែបើអ្នកគេងច្រើនហួសហេតុពេក វានឹងផ្តល់ផលអាក្រក់សម្រាប់សុខភាពវិញមិនខាន។ ដូច្នេះហើយ ត្រូវគេងឲ្យបានគ្រប់គ្រាន់ ប៉ុន្តែកុំច្រើនហួសប្រមាណពេក ព្រោះវាមិនត្រឹមតែផ្តល់ផលអាក្រក់សម្រាប់រាងកាយនោះទេ អ្នកក៏ខាតបង់ក្នុងការធ្វើកិច្ចការផ្សេងៗទៀតផងដែរ។
២) ដើរកម្សាន្ត៖ ពេលចុងសបា្តហ៍ចូលមកដល់ អ្នកគួរតែលៃលក ដើរកម្សាន្តទៅកន្លែងណាមួយដើម្បីឲ្យអារម្មណ៍របស់អ្នកស្រស់ថ្លា និង ជម្រះភាពស្មុគស្មាញក្នុងចិត្តកន្លងមក។ ការដើរកម្សាន្ត ក៏ជួយឲ្យជួបអ្វីដែលល្អៗ ដើម្បីមានគំនិតក្នុងការធ្វើការតទៅទៀត។ ដូច្នេះហើយ គួរឆ្លៀតពេលដើម្បីធ្វើកិច្ចការនេះតាមតែអាចធ្វើទៅបាន។
៣) ចំណាយពេលជាមួយមនុស្សដែលយើងស្រលាញ់៖ មិនថាគ្រួសារ ឬ មនុស្សដែលយើងស្រលាញ់នោះទេ អ្នកត្រូវតែឆ្លៀតពេលនៅជាមួយពួកគេឲ្យបានច្រើន ដើម្បីពង្រឹងមនោសញ្ចេតនា ព្រោះវាជាសុភមង្គលមួយដែលពិបាកស្វែងរក។
៤) ធ្វើលំហាត់ប្រាណ៖ មនុស្សភាគច្រើនប្រហែលជាមិនបានហាត់ប្រាណនោះទេ ដោយសារតែរវល់ខ្លាំងជាមួយការងារ។ ប៉ុន្តែនៅពេលថ្ងៃចុងសបា្តហ៍ចូលមកដល់ អ្នកគួរតែហាត់ប្រាណដើម្បីជួយឲ្យសុខភាពផ្លូវកាយ និង ផ្លូវចិត្តរបស់អ្នកប្រសើរឡើងវិញ។
៥) អានសៀវភៅ៖ ការអានសៀវភៅ គឺពិតជាសំខាន់ខ្លាំងណាស់ ព្រោះវាផ្តល់នូវចំណេះដឹងជាច្រើនដែលមិនអាចកាត់ថ្លៃបាន។ ប្រសិនបើអ្នករវល់ជាមួយការងារខ្លាំងនៅពេលធម្មតានោះ អ្នកគួរតែលៃលកដើម្បីអានសៀវភៅណាមួយដែលពេញចិត្តនៅចុងសបា្តហ៍ សម្រាប់ពង្រឹងចំណេះដឹងរបស់អ្នក។
៦) រៀបចំផែនការសម្រាប់ថ្ងៃចន្ទ៖ មិនមែនឲ្យតែដល់ថ្ងៃសៅរ៍ និង អាទិត្យ អ្នកត្រូវតែសម្រាកលែងខ្វល់ពីការងារអ្វីទាំងអស់នោះទេ។ មានន័យថា អ្នកត្រូវតែឆ្លៀតពេលសមស្របណាមួយ ដើម្បីគិតគូរអំពីគម្រោង និង ផែនការសំខាន់ៗ សម្រាប់ថ្ងៃចន្ទ ដែលជាថ្ងៃចាប់ផ្តើមការងារនោះ។ ការធ្វើបែបនេះ គឺពិតជាសំខាន់ ព្រោះវាជួយឲ្យអ្នក មានទំនុកចិត្ត និង គោលដៅច្បាស់លាស់ នៅពេលដើមសបា្តហ៍ចូលមកដល់៕
ដោយ៖ អ៊ុន ភក្តី
