បាត់ខ្លួនមហាសេដ្ឋីមានជាងគេលេខ ១៧ចិនម្នាក់ទាំងមិនដឹងមូលហេតុ
ប្រធានក្រុមប្រឹក្សាពិបាល ដែលជាមហាសេដ្ឋីដ៏ល្បីនៃក្រុមហ៊ុន Fosun Group បានបាត់ខ្លួនមិនទាន់អាចទាក់ទងបានទេរហូតមកដល់ពេលនេះ។ នេះបើតាមការចុះផ្សាយដោយទស្សនាវដ្ដី Caixin ដកស្រង់បន្តដោយ Bloomberg។
លោក Guo Guangchang អាយុ ៤៨ឆ្នាំមិនត្រូវបានគេទាក់ទងបានទេរហូតមកដល់ពេលនេះ។ លោកជាប្រធានក្រុមហ៊ុនមេ Fosun Group ដែលជាម្ចាស់ក្លឹប Mediterranee SA និងបានទិញភាគហ៊ុននៅក្រុមហ៊ុន Cirque du Soleil Inc.។ លោកមានអាជីវកម្មជាច្រើនទៀតនៅក្នុងវិស័យធានារ៉ាប់រង អចលនទ្រព្យ ឱសថសាស្ត្រ និងមុខទំនិញផ្សេងទៀត។
មិនទាន់មានការអធិប្បាយយ៉ាងណានោះទេ ជុំវិញការបាត់ខ្លួននេះ។ សូមបញ្ជាក់ថា លោក Guo ជាមហាសេដ្ឋីមានទ្រព្យសម្បត្តិច្រើនជាងគេទី១៧ នៅប្រទេសចិន។ លោកមានទ្រព្យសម្បត្តិសរុបប្រហែល ៥,៦ពាន់លានដុល្លារ៕
ដោយ៖ រតនៈវិភូ
