គ្មានលុយចាប់ផ្ដើមអាជីវកម្មមែនទេ កុំបារម្ភ សាកមើលវិធី ៣យ៉ាងខាងក្រោមនេះ
ការពិតណាស់មានមនុស្សមិនតិចទេដែលចង់ផ្ដើមអាជីវកម្មប៉ុន្តែតែងមានសំណួរមួយលេចមុខជានិច្ច គឺបានលុយមកពីណា? សាកល្បងគន្លឹះទាំង ៣ខាងក្រោមនេះមើលមើល៍ថា តើអាចជួយអ្នកបានកម្រិតណាដែរ?
- ចាប់ផ្ដើមធ្វើអ្វីម្យ៉ាងងាយៗ៖ អ្នកគួរសាកចាប់ផ្ដើមអាជីវកម្មណាដែលងាយៗ។ អាជីវកម្មងាយៗត្រង់នេះ គឺចង់សំដៅទៅលើផលិតផលដែលផលិតនៅក្នុងតំបន់ណាមួយ ហើយលោកអ្នកមិនចាំបាច់ទិញយកមកស្ដុកនោះទេ ពោលគឺអាចចាប់ផ្ដើមតាមរយៈការលក់តាមទីផ្សារអនឡាញ (Online) ជាមុនសិន។ ទីផ្សារអនឡាញនៅកម្ពុជាហាក់ចាប់ផ្ដើមមានប្រជាប្រិយបន្តិចម្ដងៗហើយ ជាក់ស្ដែងដូចជា Little Fashion កំពុងទទួលបានជោគជ័យខ្លាំង។ ផលិតនៅក្នុងតំបន់របស់អ្នកអាចនឹងមិនទាន់មានទីផ្សារ ខណៈទីផ្សារបច្ចុប្បន្នអាចនឹងត្រូវការ។ ម្យ៉ាងវិញទៀត ផលិតផលនៅក្នុងតំបន់ងាយនឹងទទួលបានប្រជាប្រិយភាពប្រសិនបើគុណភាព និងតម្លៃអាចទទួលយកបាន។ សាកគិតទៅមើលថាតើអ្នកចាប់ផ្ដើមលក់អ្វី?
- ទិញទំនិញណាដែលងាយលក់ចេញវិញ៖ វិធីម្យ៉ាងទៀតដែលលោកអ្នកអាចចាប់ផ្ដើមអាជីវកម្មបាន គឺគិតទៅលើមុខទំនិញណាដែលងាយនឹងលក់ចេញវិញ។ ប្រការនេះវាអាចធានាបាននូវលំហូរសាច់ប្រាក់ សម្រាប់ទូទាត់ការចំណាយទៅលើការទិញទំនិញដំបូង និងចំណាយទៅលើប្រតិបត្តិការផ្សេងៗ។ លោកអ្នកគួរតែសិក្សាផងដែរអំពីគូប្រកួតទៅលើទំនិញប្រភេទនេះ ប្រសិនបើវាមានការប្រកួតប្រជែងខ្លាំង នោះលោកអ្នកនឹងប្រឈមនឹងការលក់មិនដាច់ និងមិនអាចបង្វិលលុយទាន់។
- លក់សេវាកម្មផ្ទាល់របស់អ្នក៖ បើគ្មានជម្រើសលក់ផលិតផលអ្វីនោះទេ លោកអ្នកគួរសាកល្បងពិនិត្យមើលការលក់សេវាកម្មវិញម្ដង។ ការជ្រើសរើសសេវាកម្ម គឺនឹងជួយអ្នកមិនឱ្យចំណាយថ្លៃដើមច្រើន។ សេវាកម្មមានច្រើនប្រភេទ ប៉ុន្តែអ្នកគួរចាប់ផ្ដើមជាមួយអ្វីដែលជាបទពិសោធន៍ និងចំណង់ចំណូលចិត្តរបស់អ្នក។ ការពិត សេវាកម្មមួយចំនួនមិនចាំបាច់ជួលការិយាល័យ ឬបុគ្គលិកនោះទេ ពោលគឺលោកអ្នកអាចធ្វើ និងផ្ដល់សេវាកម្មដោយខ្លួនឯងផ្ទាល់ដូចជាអ្នកកួកជេជាដើម។ ដូច្នេះសូមសម្លឹងមើលមើល៍មានអ្វីដែលលោកអ្នកអាចចាប់ផ្ដើមបាន?
ដោយ៖ រតនៈវិភូ
