ហេតុផល ៧យ៉ាង ដែលនិស្សិតទទួលបាននិទ្ទេស “C” គឺជាបុគ្គលជោគជ័យបំផុតក្នុងលោក
មិនមែនមិនលើកទឹកចិត្តលោកអ្នកមិនចង់ឱ្យសិក្សា ឬរៀនឱ្យពូកែនោះទេ ប៉ុន្តែនេះជាហេតុផលដែល Biz Khmer ដកស្រង់ពីអត្ថបទដែលចុះផ្សាយដោយគេហទំព័រ Lifehack។ ជាការពិត និងជាគំនិតដែលមនុស្សស្ទើរតែគ្រប់គ្នាមានជំនឿថា អ្នកដែលខិតខំសិក្សា និងទទួលបាននិទ្ទេសល្អ "A” នឹងទទួលបានការងារល្អបន្ទាប់ពីបញ្ចប់ការសិក្សា។ ចុះហេតុអ្វីបានជាថា និស្សិតទទួលបាននិទ្ទេស "C” ជាមនុស្សជោគជ័យបំផុតក្នុងលោក? ខាងក្រោមនេះជាហេតុផល៖
១) ពួកគេយល់ពីអ្វីដែលពួកគេចង់បានមុនអ្នកដទៃយល់៖ និស្សិតទទួលបាននិទ្ទេស "C” ច្រើនតែជាមនុស្សដែលមិនចំណាយពេលវេលាអត់ប្រយោជន៍។ ពួកគេមិនសូវផ្ដោតលើមុខវិជ្ជាគ្រប់មុខតាមសាលាតម្រូវនោះទេ តែពួកគេផ្ដោតទៅលើមុខវិជ្ជាដែលជាចំណង់ចំណូលចិត្តរបស់គេច្រើនជាង។ ឧទាហរណ៍ជាក់ស្ដែង លោក Steve Jobs អតីតស្ថាបនិកក្រុមហ៊ុន Apple គឺជាមនុស្សដែលមានគំនិតច្នៃប្រឌិតខ្ពស់បំផុតមួយរូបនៅក្នុងលោក តែលោកមិនបានបញ្ចប់ការសិក្សាពីមហាវិទ្យាល័យខ្ពង់ខ្ពស់ដូចអ្នកផ្សេងនោះទេ អ្វីដែលសំខាន់គឺលោកផ្ដោតទៅលើអ្វីដែលលោកពេញចិត្ត។
២) ពួកគេងាយទទួលបានឱកាសការងារ៖ និស្សិតទទួលបាននិទ្ទេស "C” មួយចំនួនធំសម្រេចចិត្តឆាប់ធ្វើការងារទោះបីរៀនមិនទាន់ចប់ក្ដី។ ពួកគេចង់រកចំណូលដើម្បីដោះស្រាយលើការចំណាយរបស់គេ ខណៈនិស្សិតពូកែ ឬនិស្សិតដែលទទួលបាននិទ្ទេសល្អ គឺខិតខំសិក្សាពោលគឺមិនធ្វើការនោះទេទាល់តែរៀនចប់។ នៅពេលនោះហើយដែលនិស្សិតទទួលបាននិទ្ទេស "C” ទទួលបានបទពិសោធន៍ល្អ ខណៈពេលដែលនិស្សិតពូកែបាត់បង់ឱកាស។ នៅក្នុងពិភពការងារជាក់ស្ដែង ក្រុមហ៊ុនគឺជ្រើសរើសអ្នកដែលមានបទពិសោធន៍ ឬនិយាយដោយសាមញ្ញថា "សញ្ញាឃើញ" មិនមែន "សញ្ញាបត្រ" តែមួយមុខនោះទេ។
៣) ពួកគេចូលចិត្តបង្កើតបណ្ដាញ ឬទំនាក់ទំនងចងមិត្ត៖ ច្បាស់ណាស់ថា អ្នកដែលទទួលបាននិទ្ទេស "C” ភាគច្រើនចូលចិត្តបង្កើតទំនាក់ទំនង នោះហើយគឺ ជាឱកាសដ៏សំខាន់សម្រាប់ពួកគេក្នុងការឈានទៅរកការបង្កើតទំនាក់ទំនងជាមួយមនុស្សមានវិជ្ជាជីវៈ និងបានរៀនសូត្រពីពួកគេ។
៤) ពួកគេដឹងពីវិធីសប្បាយ៖ មិនមែនគិតតែរៀន និងគិតតែធ្វើការនោះទេ តែពួកគេចេះពីវិធីសប្បាយ ពោលគឺធ្វើឱ្យជីវិតរបស់គេរីករាយ។ នៅពេលសិក្សា ពួកគេអាចឆ្លៀតមានកម្មវិធីតិចតួច ហើយនៅពេលដែលគេមានការងារមនុស្សជំពូកនេះចេះបែងចែកពេលវេលា និងមិនបំភ្លេចធ្វើឱ្យជីវិតគេរីករាយនោះទេ។ មនុស្សរីករាយច្រើនជោគជ័យជាងមនុស្សដែលសម្បូរទៅដោយបញ្ហា។ គេសប្បាយចិត្តគិតឃើញអ្វីល្អដើម្បីបោះជំហានទៅមុខ។
៥) ពួកគេចេះស្វែងរកដំណោះស្រាយសាមញ្ញបំផុត៖ ឧទាហរណ៍ជាក់ស្ដែងនៅក្នុងចំណុចនេះ គឺស្ថាបនិកក្រុមហ៊ុន Microsoft លោក Bill Gates។ លោកគឺជាបុគ្គលជោគជ័យបំផុតក្នុងលោកតែលោកមិនដែលយកកំណត់ត្រាសិក្សារបស់លោកមកបង្ហាញនោះទេ។ លោកជាមនុស្សបើកចិត្តទូលាយ មិនដូចបុគ្គលមួយចំនួននោះទេ ហើយលោកក៏មិនដែលមើលទៅលើសញ្ញាបត្រ ឬនិទ្ទេសជាចំណុចសំខាន់ក្នុងការជ្រើសរើសបុគ្គលិកដែរ។ លោកមានដំបូន្មានមួយឃ្លាថា ៖ «ខ្ញុំនឹងជ្រើសរើសមនុស្សខ្ជិលម្នាក់ឱ្យមកធ្វើការដ៏លំបាកមួយ។ ព្រោះថា បុគ្គលនោះនឹងចេះរកវិធីងាយស្រួលដើម្បីធ្វើវា»។
៦) ពួកគេបំពេញក្ដីស្រមៃឱ្យខ្លួនឯង៖ ការជោគជ័យរបស់មនុស្សភាគច្រើនគឺកើតចេញពីការធ្វើអ្វីដែលខ្លួនស្រលាញ់។ នៅពេលចូលរៀន អ្នកជ្រើសរើសមុខវិជ្ជា អ្នកអាចនឹងជ្រើសរើសខុសដោយមិនដឹងថាខ្លួនឯងចង់បានអ្វីឱ្យពិតប្រាកដ។ អ្នកដែលទទួលបាននិទ្ទេស "C” ច្រើនផ្ដោតជាសំខាន់ទៅលើការបំពេញក្ដីសុបិនរបស់ខ្លួន ហើយក៏មានអ្នកខ្លះសុខចិត្តបោះបង់ចោលនូវអ្វីម្យ៉ាងដែលខ្លួនគិតថា មិនមែនជាចំណែកនៃការបំពេញក្ដីសុបិនរបស់គេ។ ឧទាហរណ៍ជាក់ស្ដែងនៅ ក្នុងចំណុចនេះ គឺលោក Ricard Brandson បានបោះបង់ការសិក្សាចោលនៅវ័យ ១៥ឆ្នាំដើម្បីបំពេញក្ដីសុបិនរបស់ខ្លួន ខណៈបច្ចុប្បន្នលោកមានក្រុមហ៊ុនដ៏ធំមួយគឺ "Virgin”។
៧) ដឹងពីអ្វីដែលត្រូវខិតខំ៖ មិនមែនចេះតែខិតខំគ្រប់រឿងនោះទេ។ អ្នកដែលទទួលបាននិទ្ទេស "C” គឺដឹងពីធាតុផ្សំដើម្បីទទួលបានជោគជ័យ។ គេចាប់ផ្ដើមដោយគ្រាន់តែចង់បានប្រឡងជាប់ ប៉ុន្តែនៅពេលបញ្ចប់គឺរកលុយដើម្បីបង្កើតអាជីវកម្ម។ បើលោកអ្នកបញ្ចប់ថ្នាក់មហាវិទ្យាល័យទទួលបាននិទ្ទេសមិនល្អ កុំស្ដាយក្រោយ។ ជីវិតជាក់ស្ដែង (real life) និងមេរៀនជាក់ស្ដែង (real lessons) កើតឡើងនៅពេលដែលអ្នកចប់ពីសាលា៕
