ហេតុផលសំខាន់ៗ៤យ៉ាង ដែលអ្នកមិនគួរឆាប់រៀបការនៅវ័យក្មេងពេកនោះទេ!
មនុស្សភាគច្រើន នៅពេលដែលជួបដៃគូដែលខ្លួនពេញចិត្ត គឺតែងប្រាថ្នាចង់រៀបការឲ្យបានឆាប់ ដើម្បីអាចសាងសុភមង្គលរួមគ្នា។ ប៉ុន្តែយ៉ាងណាក៏ដោយ ភាពជាក់ស្តែងនៃជីវិតជាប្តីប្រពន្ធ គឺមិនមែនជារឿងងាយស្រួលនោះឡើយ ដោយត្រូវប្រឈមនឹងបញ្ហារាប់មិនអស់ ទម្រាំអាចរស់នៅជាមួយគ្នាបានយូរអង្វែង។ ជាមួយគ្នានោះ អ្នកដែលចង់រៀបការនៅវ័យក្មេងពេក គឺអាចនឹងប្រឈមបញ្ហាច្រើនជាង ដូច្នេះហើយ មិនគួរប្រញាប់រៀបការពេកនោះទេ ព្រោះ៖
- មិនទាន់មានមុខរបរ ឬ ការងារច្បាស់លាស់៖ ត្រូវចាំថា ជីវិតប្តីប្រពន្ធមិនមែនមានសភាពផ្អែមល្ហែមដូច ក្នុងខ្សែភាពយន្តរហូតនោះទេ ព្រោះនៅពេលរៀបការហើយ អ្នកនឹងមានកាតព្វកិច្ចជាច្រើន ដើម្បីជួយឲ្យគ្រួសារថ្មីនេះឆ្ពោះទៅរកជីវភាពល្អ។ ចំពោះមនុស្សដែលមានវ័យក្មេងមិនទាន់មានការងារ ឬ មុខរបរច្បាស់លាស់ ហើយប្រញាប់រៀបការនោះ នឹងមានអារម្មណ៍ថាស្តាយក្រោយមិនខាន ព្រោះគ្មានប្រភពចំណូលច្បាស់លាស់សម្រាប់ទ្រទ្រង់គ្រួសារ។ សម្រាប់អ្នកដែលមានដើមកំណើតពីគ្រួសារធូរធារ គឺអាចទទួលបានការទំនុកបំរុងពីឪពុកម្តាយ ប៉ុន្តែអ្នកដែលមានប្រភពពីគ្រួសារក្រីក្រវិញ គឺមានតែខ្លួនទីពឹងខ្លួនប៉ុណ្ណោះ ដោយត្រូវរស់នៅក្នុងជីវភាពក្រីក្រតកូនចៅក៏ថាបាន។
- មិនទាន់ចាស់គំនិត៖ មនុស្សដែលមានវ័យក្មេង ភាគច្រើនធ្វើអ្វីក៏ដោយគឺផ្អែកតាមអារម្មណ៍របស់ខ្លួនប៉ុណ្ណោះ ដោយមិនទាន់ចេះគិតវែងឆ្ងាយនោះឡើយ ដូច្នេះហើយគំនិតក្មេងខ្ចីបែបនេះ តែងបង្កបញ្ហាទាស់ទែងគ្នាញឹកញាប់ក្នុងគ្រួសារ។ ស្ថានភាពនេះ គឺពិតជាពិបាកឲ្យគ្រួសារថ្មីទទួលបានសេចក្ដីសុខណាស់។
- ខកខានសន្សំបទពិសោធន៍ជីវិតឲ្យបានច្រើន៖ ក្រោយពេលរៀបការហើយ គឺមិនដូចជា មនុស្សដែលនៅទំនេរនោះទេ ព្រោះអ្វីៗត្រូវគិតដល់គ្រួសារមុនគេ។ សម្រាប់មនុស្សដែលឆាប់រៀបការពេក ធ្វើឲ្យពួកគេមិនទាន់បានឆ្លងកាត់បទពិសោធន៍ជីវិតច្រើននោះទេ ជាពិសេសមិនទាន់អាចស្វែងយល់ថា ខ្លួនជាមនុស្សប្រភេទណា ចូលចិត្តអ្វី មានចំណុចខ្លាំងអ្វី និង ចង់ក្លាយជាមនុស្សប្រភេទណានោះទេ។
- មិនទាន់ចេះរៀបចំផែនការគ្រួសារ៖ ដើម្បីឲ្យគ្រួសារមួយទទួលបានការរីកចម្រើន និង ជួបតែរឿងល្អៗនោះ ទាល់តែស្វាមីនិងភរិយា ជាមនុស្សដែលយល់ដឹងរាក់ជ្រៅ និង ចេះរៀបចំផែនការគ្រួសារច្បាស់លាស់។ ប៉ុន្តែសម្រាប់ ប្តីប្រពន្ធវ័យក្មេង គឺពិតជាពិបាកឲ្យពួកគេមានគំនិតបែបនេះណាស់ ជាហេតុនាំឲ្យគ្រួសារមានសភាពច្របូកច្របល់ និង មិនអាចដឹកនាំគ្រួសារឆ្ពោះទៅកាន់វិធីជោគជ័យបានដោយងាយ។
ដោយ៖ អ៊ុន ភក្តី
