ហេតុផល ៥យ៉ាងដែលលោកអ្នកគួរចាប់ផ្ដើមអាជីវកម្មឆ្នាំ២០១៦ នេះបើមិនដូច្នោះទេនឹងស្ដាយក្រោយ
ឆ្នាំ២០១៦ នេះជាឆ្នាំដែលលោកអ្នកគួរចាប់ផ្ដើមបើកអាជីវកម្មមួយដោយខ្លួន ដោយផ្អែកទៅលើហេតុផល ទាំង ៥យ៉ាងខាងក្រោមនេះ។ ជឿឬមិនជឿ នេះគ្រាន់តែជាពន្លឺ និងជាទុនគំនិតសម្រាប់លោកអ្នកតែប៉ុណ្ណោះ។ ហេតុផលទាំង ៥យ៉ាងនោះគឺ៖
១) សហគមន៍សេដ្ឋកិច្ចអាស៊ានចាប់ផ្ដើមហើយ
សហគមន៍សេដ្ឋកិច្ចអាស៊ានត្រូវបានប្រទេសទាំង ១០ជាសមាជិកព្រមព្រៀងបង្កើតកាលពីចុងឆ្នាំ២០១៥ ក្នុងកិច្ចប្រជុំនៅប្រទេសម៉ាឡេស៊ីកាលពីពេលថ្មីៗកន្លងទៅនេះ។ បើលោកអ្នកមិនបង្កើត ឬចាប់ផ្ដើមអាជីវកម្មរបស់អ្នកនៅឆ្នាំនេះ តើពេលណា? ហើយបើអ្នកមិនចាប់ផ្ដើមទេ? តើទុកឱ្យអ្នកណា? ច្បាស់ណាស់ថា នាពេលអនាគតដ៏ខ្លីខាងមុខ ស្ថានភាពអាជីវកម្មនឹងកាន់តែមានការប្រកួតប្រជែងឡើងៗ ហើយបើលោកអ្នកអាចចាប់ផ្ដើមពីឥឡូវ អាចនឹងមានឱកាសឈរជើងនៅលើទីផ្សារបានប្រសិនបើអ្នកមានយុទ្ធសាស្ត្រទីផ្សារត្រឹមត្រូវនៅឆ្នាំនេះ។
២) ធនាគារនៅកម្ពុជាកាន់តែអនុគ្រោះនិងផ្ដល់អត្រាប្រាក់ប្រកួតប្រជែង
ធនាគារពាណិជ្ជកម្ម ក៏ដូចជាគ្រឹះស្ថានមីក្រូហិរញ្ញវត្ថុនៅកម្ពុជាបាននិងកំពុងផ្ដោតទៅលើទីផ្សារអាជីវកម្មខ្នាតតូច និងមធ្យម ដែលផ្ដល់នូវអត្រាការប្រាក់ប្រកួតប្រជែងក្នុងកម្រិតដ៏គួរឱ្យចាប់អារម្មណ៍មួយ។ ដូច្នេះ បើលោកអ្នកមានផែនការ និងយុទ្ធសាស្ត្រច្បាស់លាស់ ហើយមានដើមទុនខ្លះ។ តើលោកអ្នកនៅចាំអីទៀត?
៣) គ្មានពេលណាដែលប្រសើនោះទេ
ការចាប់ផ្ដើមបង្កើតអាជីវកម្មគឺដូចជាការយកកូនអីចឹងដែរ។ ប្រសិនបើលោកអ្នករង់ចាំទាល់តែដល់ពេលដែលលោកអ្នកចាត់ទុកថាជាពេលវេលាល្អបំផុត នោះប្រហែលជាអាចនឹងហួសពេលក៏អាចថាបាន។ មានមនុស្សមិនតិចទេដែលកាន់តែទម្លាប់ខ្លួន និងគំនិតធ្វើការឱ្យគេ។ លោកអ្នកកាន់តែធ្វើការឱ្យគេយូរ កាន់តែលែងមានគំនិតប្រថុយក្នុងការរកស៊ី ដូច្នេះគ្មានពេលណាដែលប្រសើនោះទេ គឺចាប់ផ្ដើមឥឡូវនេះទៅ។
៤) អ្នកនឹងក្លាយជាមនុស្សកាន់តែរីករាយ
យកតាមការសិក្សា ដែលធ្វើឡើងនៅក្រៅប្រទេសមួយដែលមានឈ្មោះថា GOBankingRates បានអះអាងថា មនុស្សដែលមានអាជីវកម្មផ្ទាល់ខ្លួនគឺសប្បាយ និងផ្ដល់តម្លៃដល់ខ្លួនឯងច្រើនជាងមនុស្សធ្វើការឱ្យគេ។ បើទោះបីជាអ្នកនោះមានក្រុមហ៊ុនតូចក្ដី ក៏មានអារម្មណ៍សប្បាយដែរ។ ជាពិសេសគឺមិនទទួលរងនូវសម្ពាធការងារ ហើយផលិតភាព និងការច្នៃប្រឌិតនឹងកាន់តែវិវឌ្ឍន៍ប្រសើរឡើងផងដែរ។
៥) អ្នកនឹងក្លាយជាអ្នកមាន
ចាប់ផ្ដើមអាជីវកម្មឆ្នាំនេះ លោកអ្នកនឹងមានឱកាសក្លាយជាអ្នកមាន។ នៅពេលបោះជំហានធ្វើអាជីវកម្មកាន់តែយូរលោកអ្នកនឹងបែកគំនិតបង្កើតអាជីវកម្មផ្សេងៗទៀតដែលអាចរកចំណូលបានច្រើន ហើយនេះជាគោលដៅតែមួយគត់ដែលអាចធ្វើឱ្យលោកអ្នកក្លាយជាអ្នកមានបាន។ ដូច្នេះគួរចាប់ផ្ដើមពីថ្ងៃនេះ៕
ដោយ៖ រតនៈវិភូ
