ត្រូវចងចាំគន្លឹះសំខាន់ៗទាំង៥នេះ បើអ្នកចង់បង្កើតជំនួញមួយ ដែលអាចទាញយកអតិថិជនយ៉ាងលឿន!
ការធ្វើអាជីវកម្ម មិនស្រួលដូចការគិតនោះទេ ព្រោះការលំបាកជាក់ស្តែងវាខុសពីការគិតទុក។ យ៉ាងណាក៏ដោយ បើអ្នកចេះតែចង់ធ្វើ តែខ្លាចបរាជ័យនោះ វាគ្មានថ្ងៃអាចធ្វើឲ្យក្តីស្រមៃក្លាយជាការពិតបានឡើយ។ ដូច្នេះបើចង់រកស៊ី ត្រូវតែតស៊ូធ្វើវា។ តែបើចង់ជោគជ័យក្នុងការរកស៊ីដំបូង ដោយអាចទាញយកអតិជនបានយ៉ាងលឿននោះ ត្រូវចងចាំគន្លឹះសំខាន់ៗខាងក្រោម៖
១) កំណត់ទីផ្សារគោលដៅឲ្យច្បាស់៖ មុនពេលចាប់ផ្តើមបង្កើតអាជីវកម្មណាមួយ អ្នកត្រូវដឹងឲ្យច្បាស់ថា តើនរណាជាទីផ្សារ និង អតិថិជនគោលដៅរបស់អ្នក( ជាយុវវ័យ អ្នកសិក្សា ក្រុមហ៊ុន ឬ អ្នកម៉ៅការដំណង) ។ កាលណាអ្នកបានកំណត់ជាស្រេចហើយ នោះអ្នកអាចចាប់ផ្តើមដំណើរការអាជីវកម្ម ដោយដើរឆ្ពោះទៅកាន់គោលដៅរបស់អ្នកបានយ៉ាងងាយស្រួលហើយ។
២) ផលិតផល ឬ សេវាកម្មដែលមានលក្ខណៈពិសេស៖ ប្រសិនបើអ្នកចង់ឲ្យអាជីវកម្មថ្មីរបស់អ្នក ឆាប់ទាញយកអតិថិជនបានយ៉ាងរហ័សនោះ អ្នកត្រូវតែគិតឲ្យបានច្បាស់ថា គួរបង្កើតផលិតផល ឬ សេវាកម្មបែបណា ដែលមានលក្ខណៈប្លែកពីក្រុមហ៊ុនដទៃ។ កាលណាអ្នកចម្លងតាមតែអ្វីដែលក្រុមហ៊ុនមុនៗ ធ្វើនោះគឺប្រាកដណាស់ថា មិនងាយនោះឡើយ ព្រោះក្រុមហ៊ុនរបស់អ្នកគឺមកក្រោយគេនៅក្នុងទីផ្សារ។
៣) ត្រូវផ្ដោតលើគុណភាព៖ ការបង្កើតនូវផលិតផល ឬ សេវាកម្មថ្មីអាចនឹងឆាប់ទាញយកចំណាប់អារម្មណ៍ របស់មនុស្សទូទៅ ប៉ុន្តែវាមិនស្ថិតស្ថេរទេ បើគុណភាពមិនល្អ។ ដូច្នេះហើយ ការផ្ដោតលើគុណភាពគឺជារឿងសំខាន់ណាស់ ព្រោះអតិថិជន គឺជាអ្នកទិញ ដូច្នេះគេត្រូវតែពិនិត្យ និង ស្វែងរកអ្វីដែលល្អសម្រាប់ការប្រើប្រាស់របស់ពួកគេ។
៤) តម្លៃសមរម្យ៖ ត្រូវចាំថា របស់ថ្មីមិនត្រូវ ដាក់លក់ក្នុងតម្លៃស្មើ ឬ ថ្លៃជាងផលិតផលចាស់ៗនោះទេ ទោះបីគុណភាពល្អប្រហាក់ប្រហែលគ្នាក៏ដោយ ព្រោះថា ការដាក់តម្លៃឲ្យទាបជាងគូរប្រជែងបន្តិចនេះ គឺជាការបើកផ្លូវមួយក្នុងការដើរចូលក្នុងទីផ្សារឲ្យបានឆាប់រហ័ស។ បើមិនអាចប្រើតម្លៃទាបជាងគេទេ អ្នកអាចប្រើវិធីផ្សេងៗទៀតដើម្បីទាញយកការចាប់អារម្មណ៍ ដូចជា ការបញ្ចុះតម្លៃក្នុងរយៈពេលណាមួយ ការបន្ថែមផលិតផល ឬ សេវាកម្មក្នុងរយៈពេលកំណត់ច្បាស់លាស់ណាមួយជាដើម។
៥) ត្រូវពង្រឹងផ្នែកទីផ្សារ៖ ទោះបីជាផលិតផលរបស់អ្នកល្អប៉ុណ្ណាក៏ដោយ ប៉ុន្តែអតិថិជនមិនងាយនឹងស្គាល់ឡើយ បើអ្នកមិនផ្សព្វផ្សាយឲ្យគេបានដឹងយ៉ាងទូលំទូលាយទេ។ ការធ្វើទីផ្សារនេះ គឺសំខាន់ខ្លាំងណាស់ អ៊ីចឹងហើយបានជាក្រុមហ៊ុនធំៗ គេតែងជ្រើសរើសអ្នកជំនាញផ្នែកទីផ្សារដើម្បីធ្វើយ៉ាងណាឲ្យផលិតផលរបស់ពួកគេអាចទៅដល់ភ្នែករបស់មនុស្សភាគច្រើនបាន៕
ដោយ៖ អ៊ុន ភក្តី
