កំហុស ៤យ៉ាង អាចធ្វើឲ្យអ្នកជំពាក់បំណុលគេវ័ណ្ឌកដោយមិនដឹងខ្លួន!
បច្ចុប្បន្ន មានមនុស្សមួយចំនួនកំពុងលង់ខ្លួនជ្រៅ ទៅក្នុងបំណុលដែលដោះមិនរួច។ ការជំពាក់បំណុលវ័ណ្ឌកនេះ នឹងធ្វើឲ្យអ្វីៗត្រូវរលាយខ្ទេចខ្ទីតែមួយពព្រិចភ្នែកប៉ុណ្ណោះ។
ខាងក្រោមនេះ ជាហេតុផល៤យ៉ាង ដែលធ្វើឲ្យអ្នកធ្លាក់ចូលក្នុងបំណុលដោះមិនរួច៖
១) ចាយច្រើនជាងចំណូល៖ ការចាយវាយដែលមិនត្រូវខ្ទង់ ឬ ចាយខ្ជះខ្ជាយហួសហេតុពេល នឹងធ្វើឲ្យអ្នកមិនអាចសល់លុយ សម្រាប់ដោះស្រាយបញ្ហានៅពេលបន្ទាន់បាននោះទេ។ ដូច្នេះហើយ ក្នុងស្ថានភាពនេះ ប្រាកដជាត្រូវខ្ចីបំណុលគេមិនបាន ដើម្បីដោះស្រាយមួយគ្រាសិន ប៉ុន្តែបញ្ហានៅត្រង់ថា បើនៅតែបន្តចាយវាយមិនគិតទៀត នោះមិនត្រឹមតែមិនអាចយកលុយដែលខ្ចីគេនោះ មកដើម្បីដោះស្រាយបញ្ហានោះទេ គឺរឹតតែធ្វើឲ្យស្ថានភាពកាន់តែអាក្រក់ដោយសារតែ គ្មានលទ្ធភាពសងបំណុលគេរួច។
២) មិនព្យាយាមឲ្យអស់ពីលទ្ធភាពសិន តែបែរជាចូលចិត្តខ្ចីលុយគេ៖ មនុស្សមួយចំនួន ចូលចិត្តខាងខ្ចីលុយគេតែម្ដង ដោយមិនព្រមព្យាយាមដោះស្រាយបញ្ហាដោយខ្លួនឯងតាមលទ្ធភាពជាក់ស្ដែងសិននោះទេ។ ត្រូវចាំថា បំណុលមិនមែនជារបស់ងាយស្រួលក្នុងការដកខ្លួនចេញនោះទេ ដូច្នេះហើយបើមិនទាន់ចាំបាច់ខ្លាំងទេ សូមកុំទាន់សម្រេចចិត្តខ្ចីគេឲ្យសោះ។ អ្នកត្រូវតែប្រឹងឲ្យអស់ពីលទ្ធភាពរបស់ខ្លួនសិន ដើម្បីកុំឲ្យធ្លាក់ខ្លួនជ្រៅទៅក្នុងបំណុល។
៣) គ្មានផែនការច្បាស់លាស់៖ អ្នកខ្លះនៅពេលខ្ចីលុយពីនរណាម្នាក់ ឬ ពីធនាគារ គឺពួកគេគ្មានផែនការច្បាស់លាស់ ចំពោះប្រាក់កម្ចីទាំងនោះទេ ពោលគឺមិនដឹងថា គួរយកវាទៅរកស៊ី ឬ ចាត់ចែងយ៉ាងណាដើម្បីរកលុយឲ្យបានច្រើនជាងមុន។ ការខ្ចីលុយដោយគ្មានផែនការច្បាស់លាស់បែបនេះ វាងាយនឹងធ្វើឲ្យធ្លាក់ខ្លួនចូលក្នុងបំណុលវ័ណ្ឌកខ្លាំងណាស់។
៤) មិនយល់ច្បាស់អំពីគុណសម្បត្តិ និង គុណវិបត្តិរបស់ការខ្ចីលុយ៖ តាមពិតទៅ ក្នុងការរកស៊ី គឺជៀសមិនផុតពីការខ្ចីលុយពីធនាគារ ឬ គ្រឹះស្ថានមីក្រូហិរញ្ញវត្ថុនោះទេ ដើម្បីយកមកដំណើរការគម្រោង ឬ ពង្រីកអាជីវកម្ម ដែលនេះគឺជាគុណសម្បត្តិ។ ប៉ុន្តែវានឹងក្លាយទៅជា សត្រូវបំផ្លាញទ្រព្យសម្បត្តិ និង សុភមង្គលគ្រួសាររបស់អ្នកវិញ ប្រសិនបើអ្នកខ្ចីលុយមកដោយមិនប្រើប្រាស់ក្នុងផ្លូវដើម្បីរកប្រយោជន៍។ ដូច្នេះហើយដឹងឲ្យច្បាស់ អំពីគុណសម្បត្តិ និង គុណវិបត្តិរបស់វាជាមុនសិន មុនពេលសម្រេចចិត្តខ្ចីបំណុលគេ៕
ដោយ៖ អ៊ុន ភក្តី
