ទម្លាប់រវល់ៗ ៥យ៉ាងដែលលោកអ្នកត្រូវកម្ចាត់ចេញឱ្យបាន
លោកអ្នកគួរសម្លឹងមើលពីទម្លាប់របស់ខ្លួនមួយចំនួន ដែលត្រូវកម្ចាត់ចោលដើម្បីធានាបានយ៉ាងណា ឱ្យជីវិតកាន់តែប្រសើរឡើងពីមួយឆ្នាំៗទៅមួយឆ្នាំ។ ខាងក្រោមនេះគឺជាទម្លាប់មិនល្អមួយចំនួនដែលលោកអ្នកគួរកម្ចាត់ចោលឱ្យបាន។
១) កុំធ្វើឱ្យខ្លួនដិតជាប់តែវិប្បដិសារី៖ រឿងអតីតកាលគឺត្រូវចាត់ទុកជាមេរៀន ពោលគឺមិនត្រូវឱ្យកំហុសកើតឡើងម្ដងទៀតឱ្យសោះ។ ប៉ុន្តែរឿងដែលគួរធ្វើ គឺមិនត្រូវធ្វើខ្លួនឱ្យផុងជាប់នៅក្នុងវិប្បដិសារីដែលធ្វើឱ្យខ្លួនមិនអាចធ្វើអ្វីបានឱ្យសោះ។ ត្រូវរឹងប៉ឹងឡើង ហើយត្រូវដើរទៅមុខប្រកបដោយក្ដីសង្ឃឹម។ អតីតកាល ត្រូវចាត់ទុក ជាមេរៀនដែលត្រូវកែប្រែ។
២) ទម្លាប់ខ្ចីលុយគេ៖ មិនថាខ្ចីពីមិត្តភក្ដិ មិនថាខ្ចីពីអ្នកជិតខាង និងមិនថាខ្ចីពីធនាគារ លោកអ្នកគួរតែកម្ចាត់ចោលទម្លាប់ខ្ចីលុយបង្កើតបំណុលនេះឱ្យបាន។ បើខ្ចីគេ គឺត្រូវតែសង តាមលទ្ធភាពដែលអាចធ្វើទៅបាន ហើយបើខ្ចីដើម្បីរកស៊ី គឺត្រូវប្រាកដខ្លួនឯង មានប្រភពដើម្បីបង្វិលសង មិននាំឱ្យអ្នកឡុងចុងវ័ណ្ឌក។
៣) ទម្លាប់ខ្ជិលធ្វើការឬរកស៊ី៖ បើចង់មានបាន និងចង់មានមុខមានមាត់ក្នុងសង្គម ត្រូវតែកម្ចាត់ទម្លាប់ខ្ជិលធ្វើការ ឬខ្ជិលរកស៊ីនេះឱ្យបាន។ ទម្លាប់ខ្ជិលនេះ ក៏រាប់បញ្ចូលទាំងការគេងទ្រមក់ គេងថ្ងៃរាប់ម៉ោងផងដែរ។ ត្រូវដាក់ចិត្តធ្វើការ និងរកស៊ី បង្កើនប្រភពចំណូល រកលុយបានកាន់តែច្រើនតាមតែអាចធ្វើទៅបាន និងតាមវិធីសុច្ចរឹត។
៤) តែងតែរកលេសដាក់ខ្លួនឯង៖ ឈប់រកលេសដាក់ខ្លួនឯងទៀតទៅ។ គ្មានពាក្យថា យឺតពេលហើយ ចាស់ពេកហើយ ឬហត់នឿយពេកហើយក្នុងវចនានុក្រមនៃមនុស្សឧស្សាហ៍នោះទេ។ បើលោកអ្នកនៅតែជ្រើសរើសពាក្យទាំងបីឃ្លានេះ នោះហើយគឺជាលេសសម្រាប់ខ្លួនឯង ដែលធ្វើឱ្យអ្នកមិនអាចវិវឌ្ឍន៍ខ្លួនបានប្រសើរនោះទេ។
៥) កុំឱ្យភាពភ័យខ្លាចគ្របដណ្ដប់អ្នក៖ បើចង់រកស៊ី ឬចង់បោះជំហានទៅក្នុងពិភពការងារ កាន់តែលេចធ្លោ និងខ្ពង់ខ្ពស់ជាងមុន លោកអ្នកត្រូវតែបំបាត់ឱ្យបាននូវភាពភ័យខ្លាច។ ត្រូវធ្វើខ្លួនឱ្យរឹងប៉ឹង បោះជំហានទៅមុខប្រកបដោយថាមពល យុទ្ធសាស្ត្រ និងផែនការច្បាស់លាស់ នោះលោកអ្នកនឹងលែងភ័យក្នុងការដឹកនាំមាគ៌ាជីវិតរបស់លោកអ្នកឱ្យកាន់តែប្រសើរឡើង៕
ដោយ៖ រតនៈវិភូ
