អតីតអ្នកដឹកនាំរឿងហូលីវូត លោក Scott Neesonដែលជួយកុមារកម្ពុជារើសសំរាមនៅស្ទឹងមានជ័យ មានប្រវត្តិរៀនអត់ចប់ថ្នាក់វិទ្យាល័យ
លោក Scott Neeson កើតនៅទីក្រុង Edinburgh ប្រទេសស្កុតឡែន។ នៅអាយុ៥ឆ្នាំ លោកនិងក្រុមគ្រួសារបានផ្លាស់ទៅនៅប្រទេសអូស្រ្តាលី។
Neesonបានចូលធ្វើការអោយក្រុមហ៊ុនមួយនៅទីក្រុងឧស្សាហកម្មមួយស្ថិតនៅភាគខាងត្បូងប្រទេសអូស្ត្រាលី ហើយគាត់មិនបានរៀនចប់ថ្នាក់វិទ្យាល័យនោះទេ។ ការងារដែល Neeson ធ្វើគឺផ្ដោតទៅលើវិស័យភាពយន្ត ដោយការខិតខំធ្វើការ Neeson បានឡើងតំណែងជានាយកគ្រប់គ្រងការចែកចាយភាពយន្តរបស់ក្រុមហ៊ុនភាពយន្ត 20th Century Fox នៅប្រទេសអូស្ត្រាលី នៅក្នុងឆ្នាំ១៩៨៦។
នៅឆ្នាំ១៩៩៣ ការងាររបស់គាត់បានផ្លាស់មក ទីក្រុងឡូអែនជឺលេសសហរដ្ឋអាមេរិក បន្ទាប់មកនៅឆ្នាំ២០០០ គាត់ក៏បានក្លាយជានាយករបស់ក្រុមហ៊ុនភាពយន្ត 20th Century Fox International។ នៅក្នុងតួនាទីនេះ គាត់បានដឹកនាំផលិតរឿងល្បីៗជាច្រើនដូចជា Titanic, Braveheart, Independence Day, X-Men និង Star Wars រួមទាំងខ្សែភាពយន្តជាង១០០ផ្សេងទៀតផងដែរ។
នៅឆ្នាំ២០០៣ Neeson បានលាឈប់ពីក្រុមហ៊ុនភាពយន្ត 20th Century Fox International ដោយចូលបម្រើការអោយក្រុមហ៊ុនភាពយន្ត Sony Picture Entertainment តែមុននឹងចូលបម្រើការអោយក្រុមហ៊ុនថ្មីនេះ Neeson បានចំណាយពេលវិស្សមកាលក្នុងការសិក្សាស្រាវជ្រាវខ្លីមួយរបស់ខ្លួនមកកាន់តំបន់អាស៊ី។
Neeson បានមកលេងប្រទេសក្នុងតំបន់អាស៊ីអាគ្នេយ៍ ដោយបានមកលេងប្រទេសកម្ពុជាផងដែរ។ អ្វីដែលគាត់ចាប់អារម្មណ៍ខ្លាំងបំផុតនោះ គឺការរស់នៅរបស់កុមារកម្ពុជានៅលើគំនរសំរាមនៅស្ទឹងមានជ័យ។ ស្ទឹងមានជ័យ គឺជាទីក្រុងសំរាម ប៉ុន្តែវាជាផ្ទះសម្រាប់កុមារក្រីក្រជាច្រើន ហើយភាគច្រើនជាកុមារកំព្រារស់នៅដោយសារការរើសអេតចាយ។
ស្ថានភាពរស់នៅរបស់កុមារក្រីក្រនៅស្ទឹងមានជ័យ បានធ្វើអោយ Neeson សម្រេចបង្កើតមូលនិធិកុមារកម្ពុជា (Cambodian Children’s Fund) ជួយដល់កុមារទាំងនោះ។ ពេលត្រឡប់ទៅធ្វើការអោយក្រុមហ៊ុន Sony Picture វិញ មិនដល់មួយឆ្នាំផង Neeson ក៏លាឈប់នៅឆ្នាំ២០០៤ ដើម្បីមានពេលមកជួយដល់កុមារនៅកម្ពុជា។
តាមរយៈការងារមនុស្សធម៌ នៅឆ្នាំ២០០៧ Neeson ទទួលបានពានរង្វាន់ “Q Prize” ដោយការទទួលស្គាល់ភាពជាអ្នកដឹកនាំរបស់លោកក្នុងការគាំទ្រ និង ឧបត្ថម្ភដល់កុមារ។នៅឆ្នាំដដែល Neeson ទទួលបានពានរង្វាន់ Rex Foundation Bill Graham ក្នុងការផ្ដល់ទីកន្លែងស្នាក់នៅ ការសិក្សា និងការចិញ្ចឹមកុមារនៅកម្ពុជា។ នៅឆ្នាំ២០១៣ គាត់បានទទួលពានរង្វាន់ប្រចាំឆ្នាំរបស់ប្រទេសអូស្ត្រាលី។ នៅឆ្នាំ២០១៤ Neeson ទទួលបានពានរង្វាន់មនុស្សធម៌ Rotary International’s The One ផងដែរ។
សូមបញ្ជាក់ថា ព្រះមហាក្សត្រខ្មែរ ព្រះបាទសម្ដេច នរោត្តម សីហមុនី ព្រះប្រទានសញ្ជាតិខ្មែរ ជូនដល់ លោក Scott Neeson រួចហើយ បន្ទាប់ពីលោក បានខិតខំជួយកុមារ នៅតំបន់ចាក់សំរាមស្ទឹងមានជ័យ អស់ជាច្រើនឆ្នាំមក។
ប្រែសម្រួល៖សុខា នីកា
ប្រភព៖ www.wsj.com
