នៅពេលមានកំហុសណាមួយ ត្រូវធ្វើរឿងទាំង៣យ៉ាងនេះជាបន្ទាន់ ដើម្បីកុំឲ្យស្ថានការណ៍កាន់តែអាក្រក់!
រាល់ពេលដែលមនុស្សធ្វើអ្វីមួយ គឺជៀសមិនផុតពីការសាងកំហុសនោះទេ។ ការសាងកំហុស មិនទាន់ចាត់ទុកថា ជារឿងបរាជ័យនោះទេ ប៉ុន្តែការព្រងើយកន្តើយ និង បណ្ដោយឲ្យស្ថានការណ៍កាន់តែធ្ងន់ធ្ងរ គឺជាការបរាជ័យ។ ដើម្បីកុំឲ្យអ្វីៗកាន់តែអាក្រក់ លោកZig Ziglar អ្នកនិពន្ធដ៏ល្បីរបស់សហរដ្ឋអាមេរិក បានផ្តល់គន្លឹះ៣សំខាន់នៅពេលសាងកំហុសណាមួយ៖
១) ចាត់ទុកកំហុសជាផ្លូវមួយឆ្ពោះទៅកាន់ដំណោះស្រាយ៖ សូមកុំបណ្ដោយឲ្យកំហុស បំបាក់ទឹកចិត្តរបស់អ្នកឲ្យសោះ។ ត្រូវគិតថា គ្មាននរណាម្នាក់ចង់ខុសនោះទេ ប៉ុន្តែវាជារឿងជៀសមិនផុត ដូច្នេះហើយ បើជ្រុលជាខុសទៅហើយ គឺត្រូវតែគិតថា វាជាផ្លូវដែលអាចនាំទៅរកដំណោះស្រាយ ហើយកុំគេចវេះឲ្យសោះ។
២) ទទួលស្គាល់កំហុស៖ អ្នកគ្មានថ្ងៃអាចកែប្រែកំហុសបានឡើយ ដរាបណាអ្នកមិនទទួលស្គាល់ថា ខ្លួនឯងបានធ្វើខុស។ ដូច្នេះសូមកុំក្បត់ការពិតឲ្យសោះ។
៣) ត្រូវចងចាំថា រាល់ពេលដែលអ្នកព្រងើយកន្តើយជាមួយកំហុស គឺជារឿងអវិជ្ជមាន៖ រាល់ពេលដែលសាងកំហុស គឺមិនត្រូវនៅស្ងៀម ឬ ព្រងើយកន្តើយជាដាច់ខាត ពោលគឺត្រូវធ្វើយ៉ាងណាដោះស្រាយវាជាបន្ទាន់ ដើម្បីកុំឲ្យអ្វីៗកាន់តែធ្ងន់ធ្ងរ៕
ដោយ៖រតនា វិចិត្រ
