អាកាសធាតុនៅកម្ពុជា នឹងចុះត្រជាក់ជាថ្មីចាប់ពីថ្ងៃទី៧ ដល់ ទី៩ខាងមុខ
អាកាសធាតុត្រជាក់នៅកម្ពុជា នឹងកើតមានម្ដងទៀត ចាប់ពីថ្ងៃទី៧ ដល់ ទី៩ ខែកុម្ភៈខាងមុខ រហូតដល់១៥អង្សាសេ។ នេះបើតាមសេចក្ដីជូនដំណឹងរបស់ នាយកដ្ឋានឧតុនិយមនៃក្រសួងធនធានទឹក និងឧតុនិយម ។
អាកាសធាតុត្រជាក់នេះ បណ្ដាលមកពីសម្ពាធបរិយាកាសខ្ពស់ លើប្រទេសចិនដែលកំពុងបង្កើនឥទ្ធិពលសាជាថ្មីទៀតមកលើប្រទេសកម្ពុជា។ ក្នុងនោះខេត្តមណ្ឌលគិរី រតនគិរី ព្រះវិហារ ឧត្តរមានជ័យ និង បន្ទាយមានជ័យ នឹងមានសីតុណ្ហភាពអប្បបរមាពី ១៥ ទៅ ១៧អង្សាសេ និង អតិបរមា២៦ ទៅ ២៨អង្សាសេ ។
ដោយឡែកខេត្ត បាត់ដំបង ប៉ៃលិន សៀមរាប និង ស្ទឹងត្រែង នឹងមានសីតុណ្ហភាពអប្បបរមាពី១៧ ទៅ ១៩អង្សាសេ និង អតិបរមា ពី ២៨ ទៅ ៣០អង្សាសេ។ ជាមួយគ្នានោះ នាយកដ្ឋានឧតុនិយមក៏បានណែនាំឲ្យប្រជាពលរដ្ឋមានការប្រុងប្រយ័ត្ន និង យកចិត្តទុកដាក់ចំពោះសុខភាពផងដែរ៕
ដោយ៖ អ៊ុន ភក្តី
