អ្នកនឹងទទួលបានប្រយោជន៍សំខាន់ៗ៦យ៉ាងនេះ ប្រសិនបើរស់នៅក្បែរដើមឈើ
តើអ្នកមានអារម្មណ៍បែបណានៅពេលដែលអ្នកបានឈរជិតដើមឈើ ឬមួយក៏ផ្ទះរបស់អ្នកនៅកន្លែងដែលសម្បូរដើមឈើ? តើការរស់នៅជិតដើមឈើ ពិតជាអាចជួយសុខភាពផ្លូវការ និងផ្លូវចិត្តរបស់អ្នកបានឬ? មានការសិក្សាជាច្រើនបានបញ្ជាក់ថាការរស់នៅជិតដើមឈើ ឬនៅជិតព្រៃឈើគឺពិតជាឱសថដ៏ល្អបំផុត។ ខាងក្រោមនេះជាអត្ថប្រយោជន៍ទាំង៥យ៉ាងពីការរស់នៅជិតដើមឈើ៖
១)ជួយសម្រួលការដកដង្ហើម៖ តើអ្នកដឹងទេថានៅសហរដ្ឋអាមេរិក ដើមឈើទាំងអស់បានជួយកាត់បន្ថយការបំពុលខ្យល់រហូតទៅដល់១៧,៤លានតោនក្នុងកំឡុងពេលតែមួយឆ្នាំប៉ុណ្ណោះ? ដើមឈើមានសារប្រយោជន៍យ៉ាងខ្លាំងព្រោះថា ស្លឹករបស់វាបានជួយស្រូបយកជាតិពុលដែលនៅក្នុងខ្យល់ដែលជាតិពុលទាំងនោះអាចបង្កជាជំងឺផ្លូវដង្ហើមបានផងដែរ។ រីឯប្រទេសឥណ្ឌាវិញ បានសម្រេចដោះស្រាយបញ្ហាបំពុលអាកាស ដោយការដាំដើមឈើចំនួន២ពាន់លានដើម។ វាមិនត្រឹមតែជួយបង្កើននូវគុណភាពខ្យល់ និងសុខភាពរបស់ប្រជាពលរដ្ឋប៉ុណ្ណោះទេ ប៉ុន្តែវាថែមទាំងបានផ្ដល់ការងារទៅដល់មនុស្សប្រមាណ ៣០០ ០០០នាក់ទៀតផង។
២) អត្រារស់រានមានកម្រិតខ្ពស់៖ លោក Geoffrey Donovanអ្នកជំនាញផ្នែកព្រៃឈើបាននិយាយថា បើសិនជាយើងបន្តកាប់ព្រៃឈើចំនួនមួយលានដើមក្នុងរយៈពេល១០ឆ្នាំនោះ វានឹងមានការប៉ះពាល់យ៉ាងធ្ងន់ធ្ងរដល់សុខភាពព្រមទាំងជីវិតមនុស្សសត្វ និងរុក្ខជាតិទាំងឡាយ។ ការបាត់បង់ដើមឈើរឹតតែច្រើន ធ្វើឲ្យជីវិតមនុស្សមានគ្រោះថ្នាក់រឹតតែខ្លាំង។ ដូចនេះហើយ ផ្ទុយពីការកាប់ដើមឈើយើងគួរតែព្យាយាមថែរក្សាក៏ដូចជាដាំឡើងវិញបន្ថែម។
៣) ជួយឲ្យអ្នកឆាប់ជាពីជំងឺ៖ បើសិនជាអ្នកស្គាល់នរណាម្នាក់ដែលទើបតែវះកាត់ ឬទើបឆ្លងកាត់ការព្យាបាលនៅមន្ទីរពេទ្យ អ្នកគួរតែណែនាំឲ្យគេសម្រាកនៅបន្ទប់ណាដែលមានទេសភាពល្អ ឬក៏មានដើមឈើនៅក្បែរជាដើម។ អ្នកជំងឺដែលនៅតែក្នុងបន្ទប់បិទឈឹង ត្រូវការពេលសម្រាកយូរជាងអ្នកដែលនៅក្នុងបន្ទប់ដែលពេញដោយទេសភាពល្អៗ។
៤) កាត់បន្ថយការបារម្ភ ការធុញថប់៖ តាមទិន្នន័យជាច្រើនបានឲ្យដឹងថាអ្នកដែលមានដើមឈើច្រើនជុំវិញផ្ទះ ហាក់បីដូចជាស្រស់ស្រាយជាងអ្នកដែលមិនសូវមានដើមឈើជិតផ្ទះ ហើយមើលទៅពួកគេដូចជាមានសុខភាពល្អច្រើន។
៥) មានដំណេកល្អ៖ អ្នកឯកទេសសុខភាពជាច្រើនបានឲ្យដឹងថាមូលហេតុដែលអ្នកជំងឺរអ៊ូរទាំពីដំណេករបស់ខ្លួនគឺមកពីបរិយាកាសជុំវិញខ្លួនមិនសូវល្អ ធ្វើឲ្យពួកគាត់សម្រាកមិនលក់ឬមិនគ្រប់គ្រាន់។ ដូច្នេះអ្នកគួរតែពិនិត្យមើលឡើងវិញទាំងបរិយាកាសក្នុងបន្ទប់និងក្រៅបន្ទប់៕
ប្រែសម្រួល៖ តូច ម៉ាយ៉ារស្មី
ប្រភព៖ www.lifehack.org
