ចំណូលវិស័យធានារ៉ាប់រងនៅកម្ពុជា កើនឡើង១៦,៤ ភាគរយ នៅឆ្នាំ២០១៥
ចំណូលវិស័យធានារ៉ាប់រងនៅកម្ពុជា កើនឡើង១៦,៤ ភាគរយនៅឆ្នាំ២០១៥ បើធៀបឆ្នាំ២០១៤ ខណៈការធានារ៉ាប់រងផ្នែកអចលនទ្រព្យ និង អគ្គិភ័យនាំមុខគេ។ នេះបើយោងតាមរបាយការណ៍របស់សមាគមធានារ៉ាប់រងកម្ពុជាដែលចេញផ្សាយកាលពីម្សិលមិញ។
បុព្វលាភដុលឆ្នាំ២០១៥ គឺមានចំនួន ៦១,៦ លានដុល្លារ ដោយកាលពីឆ្នាំ២០១៤ គឺមានចំនួនត្រឹមតែ៥៣លានដុល្លារប៉ុណ្ណោះ។ ប៉ុន្តែយ៉ាងណាក៏ដោយ កំណើន១៦,៤ភាគរយនេះ គឺមានចំនួនតិចជាងកំណើនជាប្រចាំឆ្នាំក្នុងរយៈពេល៥ឆ្នាំចុងក្រោយ ដែលគិតជាមធ្យម២០ភាគរយ។
សូមបញ្ជាក់ថា វិស័យធានារ៉ាប់រងក្នុងប្រទេសកម្ពុជា ហាក់ដូចជានៅតែជារឿងថ្មីសម្រាប់ប្រជាជន ខណៈដែលប្រទេសជឿនលឿនបានប្រើប្រាស់សេវានេះជាយូរមកហើយ។ បច្ចុប្បន្ន សមាគមធានារ៉ាប់រងកម្ពុជា មានសមាជិកសរុបប្រមាណ ១១ ៕
ដោយ៖ អ៊ុន ភក្តី
