នៅ​សមាជ​ទូរស័ព្ទ​ពិភពលោក MWC កន្លង​ទៅ​ថ្មីៗ​នេះ ក្រុមហ៊ុន Sony បាន​បង្ហាញ​ចេញ​ស្មាតហ្វូន​ស៊េរី​ថ្មី Xperia XZ2។ ខណៈ​ដែល​ស្មាតហ្វូន​ភាគច្រើន​នាពេល​បច្ចុប្បន្ន​ត្រូវ​បាន​ឌីហ្សាញ​បន្ថយ​សាច់​គែម​អេក្រង់​កាន់តែ​ស្ដើង និង​មាន​លក្ខណៈ​កោង​នោះ ចំណែក Sony ក៏​បាន​ធ្វើការ​ផ្លាស់ប្ដូរ​មួយ​គឺ​បាន​ដក​រន្ធ​កាស headphone jack ចេញ​ពី​​ស្មាតហ្វូន​ស៊េរី​ក្រោយ​របស់​ខ្លួន​។ ពេល​នេះ​ក្រុមហ៊ុន​បាន​ពន្យល់​ពី​មូលហេតុ​របស់​ខ្លួន​នៅ​ពី​ក្រោយ​ការ​ដក​រន្ធ​កាស ដែល​វា​ហាក់​ជា​ការ​ដើរ​តាម​គន្លង​លក្ខណៈ​នៃ iPhone 7 របស់ Apple ។ https://youtu.be/tCBPCcjTEu0 នៅ​ក្នុង​ព្រឹត្តិការណ៍ MWC 2018 ​របស់ Sony Mobile ក្រុមហ៊ុន​ជប៉ុន​នេះ ត្រូវ​បាន​សាធារណជន​សួរ​ទៅ​កាន់​ខ្លួន​ថា តើ​ហេតុអ្វី​បាន​ជា​ដក​រន្ធ​កាស Jack ​នៅ​លើ​ស្មាតហ្វូន​ថ្មី​ទាំង​ពីរ Xperia XZ2 និង XZ2 Compact ។ ចម្លើយ​គឺ​ថា ជា​ការ​ពិត​ណាស់ គឺ​ដើម្បី​បង្កើត​ការ​រចនា​ដ៏​ល្អ​ឥត​ខ្ចោះ។ ក្រុមហ៊ុន Sony បាន​លើកឡើង​ថា ៖ “នេះ​គឺ​ជា​ផ្នែក​មួយ​នៃ​ការ​ផ្លាស់ប្ដូរ​រចនាបថ​ជុំវិញ​ទូរស័ព្ទ។ ក្នុង​គោល​បំណង ដើម្បី​បង្កើត​រចនាបថ​រូបរាង​ទូរស័ព្ទ​ឱ្យ​បាន​ស្អាត អ្នក​រចនា​របស់​យើង​ត្រូវការ​ដក​រន្ធ​កាស​ចេញ។ លើស​ពី​នេះ​ទៀត យើង​ដឹង​ពី​តម្រូវការ​ចង់​បាន​នៅ​លើ​ទីផ្សារ ដែល​កំពុង​ចាប់អារម្មណ៍​ខ្លាំង​លើ​កាស​ឥតខ្សែ​ជាង​កាស​ប្រើ​ខ្សែ"។ https://youtu.be/2YmHUbzYg04 យ៉ាងណា ការ​ឌីហ្សាញ​ដក​រន្ធ​កាស​នៅ​លើ​ស្មាតហ្វូន Sony ថ្មី​នេះ ហាក់​ដូច​ជា​ចម្លែក​ខុស​គេ​បន្តិច ខណៈ​សូម្បី​តែ​ស្មាតហ្វូន​កំពូល​របស់ Samsung ​គឺ Galaxy S9 និង S9+ ​នៅ​តែ​រក្សា​រន្ធ​កាស​ដ៏​មាន​អាយុកាល​ជា​យូរ​មក​ហើយ​នេះ​ដដែល។ ប៉ុន្តែ​អ្នក​ក៏​អាច​ប្រើ​ដុំ​តំណ adapter ​សម្រាប់​ប្រើ​ជាមួយ​កាស​ខ្សែ​បាន ហើយ adapter នោះ​គាំទ្រ​បច្ចេកវិទ្យា Hi-Res Audio របស់ Sony ​ផង​ដែរ៕ ​ដោយ៖ រឹទ្ធិរាជ ប្រភព៖ techspot