បំណងរបស់សាធារណជនមួយចំនួន ចំពោះអ្នកនៅតែប៉ែតតីទូរស័ព្ទ Nokia ស៊េរីមុនៗ ដោយយោងលើហេតុផលជាទូរស័ព្ទធន់ល្អ ចង់ឱ្យវាមានវត្តមានសាជាថ្មីនោះ ប្រហែលអាចក្លាយជាការពិត។ តាមសេចក្ដីរាយការណ៍ថ្មីៗនេះ ឱ្យដឹងថា ក្រុមហ៊ុន HMD អាចនឹងចេញលក់ទូរស័ព្ទថ្មីស្ថិតក្នុងសែស្រឡាយ N ថែមទៀតក្រៅពីស៊េរី X ហើយនោះ។
យោងតាមការបង្ហោះរបស់គណនីក្រុមហ៊ុន HMD លើបណ្ដាញសង្គម Weibo ឱ្យដឹងថា Nokia N-series ដែលមានកំណើតថ្ងៃទី២៧ ខែមេសា ឆ្នាំ២០០៥ ដែលគិតមកដល់ពេលនេះ មានអាយុកាល ១៣ឆ្នាំហើយនោះ នឹងត្រូវក្រុមហ៊ុនត្រួសត្រាយឡើងវិញ។ ពេលនោះ ក្រុមហ៊ុនបានបង្ហាញទូរស័ព្ទត្រកូល N ប្រើប៊ូតុងប៉ុន្មានម៉ូដែលរួមមាន Nokia N70, N90 និង N91។
បើតាមរូបភាព ដែលបង្ហើបចេញនៅលើបណ្ដាញសង្គម Weibo ឃើញវាជាម៉ូដែល Nokia N8 ដែលជាទូរស័ព្ទស៊េរី N ដ៏ពេញនិយមមួយ។ យើងមិនច្បាស់នៅឡើយថា ប្រសិន HMD ពិតជានឹងចេញ Nokia ស៊េរី N ជំនាន់ថ្មីមែន តើទូរស័ព្ទនឹងដំណើរការដោយប្រព័ន្ធប្រតិបត្តិការ Android ឬយ៉ាងណា៕
ដោយ៖ រឹទ្ធិរាជ
