Skype ជាកម្មវិធីភ្ជាប់ទំនាក់ទំនងគ្នា ដោយការផ្ញើសារ និងខលមើលមុខគ្នាឃើញ សន្ទនាគ្នាបាន (video chat និង voice call) កំពុងពេញនិយមនាពេលបច្ចុប្បន្ន។ យ៉ាងណា ប្រិយមិត្តអាចមិនទាន់បានស្វែងយល់អស់នៅឡើយអំពីមុខងារមួយចំនួន ជាក់ស្ដែងលក្ខណៈពិសេស ១០យ៉ាងខាងក្រោម៖
១) រូបបង្ហាញអារម្មណ៍សម្ងាត់ (Secret emotion)
រូបបង្ហាញអារម្មណ៍លើកម្មវិធី Skype សាមញ្ញៗ អ្នកអាចរើសយកមកប្រើបានដោយចុចលើរូបមុខញញឹម (Smiley) ដែលស្ថិតនៅផ្នែកកំពូលខាងលើនៃប្រអប់សារ (message box) ប៉ុន្តែនៅមានរូបបង្ហាញអារម្មណ៍ជាច្រើនទៀតដែលអ្នកអាចប្រើនៅ។ ដើម្បីប្រើរូបទាំងនោះបាន អ្នកត្រូវវាយបញ្ចូលពាក្យដែលត្រូវនឹងនិមិត្តសញ្ញា ឬស្គាល់នូវនិមិត្តសញ្ញាដែលប្រើផ្គួបគ្នាដើម្បីផ្គុំចេញជារូបផ្សេងៗគ្នា ជាក់ស្ដែងដូចជារូបខាងក្រោមនេះ។
២) ចែករំលែក screen (Share screen)
នៅក្នុងកម្មវិធី Skype លោកអ្នកមិនចាំបាច់ប្រើកម្មវិធីថត screen វីដេអូ (screen capture video) ដើម្បី share ជាមួយ friend នោះទេ តែអ្នកអាចប្រើមុខងារ Share screen នៅលើកម្មវិធី Skype ដោយផ្ទាល់បាន។
៣) ប្ដូរពុម្ពអក្សរ និងទំហំ (Change text font and Size)
ជាលក្ខណៈដើម default កម្មវិធីពុម្ពអក្សររបស់កម្មវិធី Skype គឺ Tahoma និងមានទំហំ 8pt ប្រសិនអ្នកចង់ប្ដូរទម្រង់ format នេះ អ្នកអាចចូលទៅ Tools → Options → IM & SMS → IM appearance រួចហើយចុចលើ Change font ជាការស្រេច។
៤) ចែករំលែកបញ្ជីទំនាក់ទំនង (Share contact)
ប្រសិនអ្នកចង់ share បញ្ជី contact ជាមួយ friend ថ្មីៗនៅលើ Skype អ្នកមិនបាច់បញ្ចូល Skype ID ក៏បាន ដូច្នេះ friend របស់អ្នក នឹងអាចស្វែងរកវាបានងាយស្រួល។ ចូលទៅ Contacts List រួច select យកមនុស្សម្នាក់ ឬក្រុមមួយ ដែលអ្នកចង់ share ហើយចាប់ទម្លាក់ (drag and drop) ចូលទៅ Chat Window។
៥) ប្ដូរឈ្មោះបញ្ជីទំនាក់ទំនង (Rename contact)
ប្រសិនឈ្មោះ friend នៅលើ Skype មានច្រើនសុទ្ធតែដូចៗគ្នា គឺអាចធ្វើឲ្យអ្នកមានការច្រឡំគ្នាក៏ថាបាន។ អ្នកអាចកែឈ្មោះដោយ Rename លើឈ្មោះពួកគេ ធ្វើយ៉ាងណាដើម្បីឱ្យអ្នកងាយស្រួលកត់ចំណាំដោយខ្លួនអ្នក។ ដើម្បីប្ដូរឈ្មោះ សូមជ្រើសរើសឈ្មោះ contact ដែលអ្នកចង់ប្ដូរ រួចរើសយក “Rename …” ឬអ្នកក៏អាចប្ដូរនៅត្រង់ Chat window តាមរូប noatepad con ដែលស្ថិតនៅត្រង់ contact name ក៏បាន។
៦) កែសារចុងក្រោយរបស់អ្នកដែលទើបបានផ្ញើទៅកាន់ friend (Quickly edit your last message)
ប្រសិនអ្នកចង់កែសារចុងក្រោយដែលអ្នកច្រឡំផ្ញើទៅ អ្នកអាចកែកុន (edit) សារនោះឡើងវិញបាន ដោយចុច right-click នៅលើសារនោះ រួចជ្រើសរើស “Edit message”។ អ្នកក៏អាចលុបសារនោះចេញពីប្រអប់ chat តែម្ដងក៏បាន។
៧) លុបប្រវត្តិ (Clear history)
ដើម្បីលុប History ត្រូវចូលទៅ Tools → Options → Privacy → Privacy Settings ហើយស្វែងរកប៊ូតុង “Clear history”។ អ្នកក៏អាចកំណត់កាលវិភាគឱ្យកម្មវិធីលុប history ចេញដោយស្វ័យប្រវត្តិបានផងដែរ។
៨) ចាកចេញពីបទសន្ទនា (Leave conversation) ជាមួយនរណាម្នាក់
ការ active Skype conversation មួយចំនួនអាចមានប្រយោជន៍ ហើយខ្លះទៀតក៏បែរទៅជាអាចរំខានដល់អ្នកទៅវិញ។ ដូច្នេះអ្នកអាចចាកចេញពីបទសន្ទនាជាមួយនរណាដែលរំខានអ្នកបានគឺប្រើមុខងារ “Leave conversation”។ បញ្ជាក់មុខងារនេះអាចដំណើរការបានតែចំពោះបទសន្ទនាណាដែលមានមនុស្សលើសពី២នាក់ឡើងទៅ។
៩) លាក់នូវសារក្រើនរំលឹក (Hide all notification)
មានអារម្មណ៍ថាធុញនឹងសារក្រើនរំលឹក (notification) របស់ Skype លោតចេញមកញឹកញាប់នៅពេលនរណាម្នាក់ online ឬ offline មែនទេ? អ្នកអាចបិទបានទេតើ គឺចូលទៅ Tools → Options → Notifications។
១០) ស្វែងរកតួអក្សរ ឬពាក្យនៅក្នុង chat
ដើម្បីស្វែងរកតួអក្សរ ឬពាក្យនៅក្នុង chat អ្នកអាចចុច Ctr+F រួចស្វែងរកដោយវាយបញ្ចូលពាក្យដែលអ្នកចង់ search ជាការស្រេច។
នៅមានមុខងារពិសេសអ្វីទៀត ដែលអ្នកស្គាល់ទេ?
