សុភាសិត ចំនួន១០ របស់ក្រិក ដែលបង្កប់ទៅដោយគតិជ្រាលជ្រៅ
ក្រិកមានសុភាសិតមួយថា «មនុស្សគឺជាអ្នកវាស់វែងនូវរាល់អ្វីៗទាំងអស់។» សម្ដីនេះបង្កប់នូវអត្ថន័យថាអ្វីៗអាស្រ័យនៅលើការគិតរបស់មនុស្សប៉ុណ្ណោះ។ គ្មានអ្វីមួយដែលនៅដាច់ដោយឡែកតែឯងនោះទេ។ អ្វីៗអាចកើតឡើងបានដោយអាស្រ័យគ្នាទៅវិញទៅមក។ ប្រៀបដូចជាពាក្យមួយដែលទាល់តែត្រូវការបរិបទទើបអាចបង្ហាញពីអត្ថន័យរបស់វាជាក់លាក់បាន បើមានតែវាតែឯង នោះអ្នកស្ដាប់ឬអ្នកអានមិនអាចដឹងថាយើងចង់និយាយពីអ្វីនោះទេ។ អ្នកថាមនុស្សនេះមិនស្អាត ការដែលអ្នកដឹងថាគាត់មិនស្អាត ទាល់តែអ្នកធ្លាប់ឃើញមនុស្សដែលស្អាតជាងគាត់។ អ្វីៗទាំងអស់ បើយើងមិនយកវាមកវាស់វែងនិងប្រៀបធៀបគ្នានោះទេ នោះវាក៏មិនមានអត្ថន័យអ្វីនោះដែរ។ វាគ្រាន់តែជាវា ទៅតាមធម្មជាតិរបស់វា។
ខាងក្រោមនេះគឺជាសុភាសិតចំនួន១០របស់ក្រិក ដែលបង្កប់ទៅដោយគតិជ្រាលជ្រៅ:
១) «ការបោកបញ្ឆោតដ៏ធ្ងន់ធ្ងរបំផុតគឺជាបោកបញ្ឆោតខ្លួនឯង។»
២) «រឿងដែលពិបាកបំផុតនៅក្នុងជីវិតគឺជាការយល់ពីខ្លួនឯង។»
៣) «មនុស្សគឺជាអ្នកវាស់វែងនូវរាល់អ្វីៗទាំងអស់។»
៤) «ជីវិតគឺជាការពន្លាចេញ ហើយបើកាលណាយើងកាន់តែធ្វើដំណើរ នោះយើងនឹងយល់ពីការពិតបានកាន់តែច្រើន។ យល់ពីអ្វីដែលនៅចំពោះមុខទ្វាររបស់យើង គឺជាការត្រៀមខ្លួនដ៏ល្អបំផុតក្នុងការយល់ពីអ្វីដែលនៅខាងមុខយើង។»
៥) «កុំបំផ្លាញនូវអ្វីដែលអ្នកមានដោយការចង់បានអ្វីដែលអ្នកមិនមាន។»
៦) «គ្មានអ្វីមួយនៅក្នុងរឿងរ៉ាវរបស់មនុស្សដែលមានតម្លៃនឹងមានចិត្តជ្រួលច្របល់អន្ទះសាខ្លាំងនោះឡើយ។»
៧) «ថាមពលនៃចិត្តគឺជាថាមពលនៃជីវិត។»
៨) «បញ្ញាពិតប្រាកដមករកយើងម្នាក់ៗនៅពេលយើងចាប់ផ្ដើមដឹងថាតើយើងយល់តិចតួចប៉ុណ្ណាពីជីវិត ពីខ្លួនឯង និងពិភពលោកនៅជុំវិញខ្លួនយើង។»
៩) «ភាពរីករាយនៅក្នុងការងារនាំមកនូវភាពល្អឥតខ្ចោះនៅក្នុងកិច្ចការ។»
១០) «ទុក្ខវេទនាក្លាយជាស្រស់ស្អាតនៅពេលមនុស្សម្នាក់អត់ធន់នឹងគ្រោះជាមួយនឹងភាពរីករាយ ដែលមិនមែនតាមរយៈការមិនមានសតិដឹងអ្វីនោះទេ តែតាមរយៈភាពអស្ចារ្យនៃចិត្ត។»
ដោយ៖ ស្រីពៅ
