មេរៀន ៣យ៉ាងដែលអ្នកជំនួញវិស័យ IT អាចរៀនសូត្របានពីលោក Marc Benioff នាយកប្រតិបត្តិ Salesforce
លោក Marc Benioff គឺជាប្រធានក្រុមហ៊ុនដ៏មានឈ្មោះបោះសំឡេងមួយរូបដែលផ្ដល់សេវាកម្មផ្នែក Cloud Services គឺ Salesforce។ លោកត្រូវបានទស្សនាវដ្ដី Forbes ឱ្យតម្លៃថា ជាអ្នកឈានមុខងារខាងផ្នែកគំនិតច្នៃប្រឌិត (Top Innovator) ប្រចាំទស្សវត្សរ៍។ ប្រសិនអ្នកជា អ្នកជាជំនួញក្នុងវិស័យបច្ចេកវិទ្យា ខាងក្រោមនេះជាអ្វីដែលអ្នកអាចរៀនបានពីសហគ្រិនជោគជ័យរូបនេះ៖
១) ត្រូវមានកម្លាំងចិត្តចំពោះអ្វីដែលអ្នកធ្វើ៖ ប្រសិនជាស្ដាប់ការនិយាយ ឬថ្លែងជាសាធារណៈរបស់លោក Benioff លោកអ្នកនឹងដឹងថា លោកពិតជាមានអារម្មណ៍រីករាយមែនទែនចំពោះក្រុមហ៊ុនរបស់លោក Salesforce។ អ្វីដែលគាត់ធ្វើបទបង្ហាញ គឺមិនត្រឹមតែបង្ហាញពីកម្លាំងចិត្តដើរទៅមុខប៉ុណ្ណោះទេ ប៉ុន្តែបញ្ហាប្រឈមដែលអ្នកស្ដាប់អាចយកជាមេរៀន និងបទពិសោធន៍ក្នុងជីវិតបានទៀតផង។ អ្វីដែលសំខាន់គឺត្រូវមានកម្លាំងចិត្តក្នុងការធ្វើអ្វីដែលអ្នកត្រូវធ្វើ។
២) ខិតខំស្វែងរកគំនិតថ្មីៗ៖ ការស្វែងរកអ្វីដែលថ្មីៗគឺពិតជាសំខាន់បំផុតព្រោះថា មានការកើតឡើងជារៀងរាល់ថ្ងៃក្នុងវិស័យបច្ចេកវិទ្យា។ អ្វីដែលអ្នកអាចប្រកួតប្រជែងជាមួយដៃគូប្រកួតបាន និងជាពិសេសដើម្បីយកឈ្នះគូប្រកួតបានលុះត្រាតែអ្នកមានគំនិតថ្មីៗ។ បើមិនដូច្នេះហើយ អ្នកត្រូវបរាជ័យជាមិនខាត។ ជាឧទាហរណ៍ក្រុមហ៊ុន Salesforce បានបង្ហាញបច្ចេកវិទ្យាថ្មីៗជានិច្ច ពោលគឺបន្ទាប់ពីមួយទៅមួយ ដើម្បីបំពេញបានតាមតម្រូវការរបស់អ្នកប្រើប្រាស់។
៣) សំឡឹងមើលហួសពីទីផ្សាររបស់អ្នក៖ បច្ចេកវិទ្យា គឺអ្វីដែលអ្នកជួយសម្រួកដល់ប្រតិបត្តិការនៅក្នុងក្រុមហ៊ុន និងផ្ដល់នូវដំណោះស្រាយដល់អ្នកប្រើប្រាស់។ ទស្សនៈវិស័យមួយបានលើកថា៖«របៀបក្នុងការធ្វើជំនួញ គឺធ្វើឲ្យពិភពលោកកាន់តែប្រសើរឡើង»។ ដូច្នេះហើយ អ្នកត្រូវផ្តោតសំខាន់ទៅលើគុណភាព ហើយមើលឱ្យឃើញពីតំបន់ដែលអ្នកត្រូវដើរ ឱ្យហួសពីព្រំដែនរបស់អ្នក៕
ប្រែសម្រួល៖ អុឹង មុយយូ
