Shahrukh Khan តារាភាពយន្តកំពូលឥណ្ឌា៖ «វិប្បដិសារីដ៏ធំបំផុតរបស់ខ្ញុំនោះ គឺនៅពេលដែលកាន់តែល្បី ខ្ញុំកាន់តែនឹកម្ដាយខ្ញុំខ្លាំង»
«វិប្បដិសារីដ៏ធំបំផុតរបស់ខ្ញុំនោះ គឺនៅពេលដែលកាន់តែល្បី ខ្ញុំកាន់តែនឹកម្ដាយខ្ញុំខ្លាំង។ នេះជាសម្ដីរបស់លោក Shahrukh Khan ដែលជាតារាភាពយន្តBollywoodរបស់ឥណ្ឌា ដែលបាននិយាយនៅក្នុងការថ្លែងសន្ទរកថានៅសាកលវិទ្យាល័យYale របស់អាមេរិក ដោយរៀបរាប់ពីជីវិតក៏កម្សត់របស់ខ្លួនមុនពេលក្លាយជាតារាភាពយន្តដ៏ជោគជ័យម្នាក់។
Shahrukh Khan បច្ចុប្បន្នមានវ័យ៥១ឆ្នាំបានរៀបរាប់ថា កាលពីក្មេងលោកឃើញតែភាពបរាជ័យរាប់មិនអស់ ព្រោះគ្រួសាររបស់លោកគឺមានជីវភាពលំបាកខ្លាំង ដូច្នេះហើយដោយសារតែភាពភ័យខ្លាចចំពោះការបន្តនៅស្ថានភាពដ៏ខ្មៅងងឹតបែបនោះហើយ ទើបជំរុញឲ្យមានការខិតខំប្រែងប្រែងខ្លាំងរហូតជោគជ័យដល់បច្ចុប្បន្ន។ ប៉ុន្តែអ្វីដែលធ្វើឲ្យលោកមានអារម្មណ៍ថា ឈឺចាប់ និង មានវិប្បដិសារីបំផុតក្នុងជីវិតនោះដោយសារតែ ម្ដាយរបស់លោកបានស្លាប់មុនពេលខ្លួនក្លាយជាតារាភាពយន្តដ៏ល្បីនៅឥណ្ឌា ដែលមានឱកាសសម្ដែងដំបូងៗដោយសារតែអ្នកដឹកនាំខ្វះតួសម្ដែង។ អ៊ីចឹងហើយ ពីមួយដំណាក់កាលទៅមួយដំណាក់កាលនៃភាពល្បីល្បាញរបស់លោក គឺតែងធ្វើឲ្យលោកនឹកឃើញទៅដល់ម្ដាយ ដែលបានរស់នៅក្នុងស្ថានភាពក្រីក្រតោកយ៉ាកខ្លាំង ហើយគ្មានឱកាសសោយសុខនៅពេលតារាភាពយន្តរូបនេះ មានលុយ និង ទ្រព្យច្រើន និង ល្បីល្បាញខ្លាំងនៅឥណ្ឌា៕
ដោយ៖ រតនា វិចិត្រ
