សូក្រាត (Socrates)អ្នកប្រាជ្ញរបស់ក្រិក៖ «ធម្មជាតិផ្ដល់ឲ្យយើង ត្រចៀកពីរ ភ្នែកពីរ ប៉ុន្តែអណ្ដាតតែមួយទេ»
«ធម្មជាតិផ្ដល់ឲ្យយើង ត្រចៀកពីរ ភ្នែកពីរ ប៉ុន្តែអណ្ដាតតែមួយទេ ដូច្នេះយើងគួរតែស្ដាប់ និង មើលច្រើនជាងនិយាយ»។ នេះជាសម្ដីរបស់ សូក្រាត (Socrates)អ្នកប្រាជ្ញរបស់ក្រិក ដែលចង់បញ្ជាក់ថា មនុស្សត្រូវតែស្ដាប់ និង មើលឲ្យច្រើនជាងនិយាយ ព្រោះថា ធម្មជាតិផ្តល់ឲ្យយើងនូវត្រចៀកពីរ និង ភ្នែកពីរ ចំណែកមាត់គឺតែមួយប៉ុណ្ណោះ។
បញ្ហាជាច្រើនបានកើតឡើង ព្រោះតែមនុស្សចូលចិត្តតែនិយាយ តែមិនព្រមស្ដាប់ ឬ ស្ដាប់តិចតួចប៉ុណ្ណោះ អ៊ីចឹងហើយបានជានិយាយទៅ ស្ដាប់គ្នាមិនដែលបានសោះ ហើយអ្វីដែលធ្វើនោះគឺព្យាយាមយកតែត្រូវ ហើយមិនដែលចេះខុស។វាជារឿងធម្មតាទេ នៅពេលអ្នកមិនទាន់យល់ច្បាស់ពីអ្វីមួយផង ហើយព្យាយាមនិយាយបាត់ទៅហើយ អ៊ីចឹងហើយនាំឲ្យនិយាយទៅមិនដឹងក្បាលមិនដឹងកន្ទុយ បន្ទាប់មកគឺមានតែជម្លោះ ឬ ការខ្វែងគំនិតគ្នាកើតឡើង។ ប្រសិនបើអ្នកជាមនុស្សដែលចូលចិត្តស្ដាប់ ជាងនិយាយ ឬ ស្ដាប់យ៉ាងយកចិត្តទុកដាក់មុននឹងនិយាយនោះ ដៃគូពិភាក្សា ឬ ជជែកជាមួយអ្នក នឹងមានអារម្មណ៍ថា ទទួលបានការគោរព ហើយគេក៏គោរពអ្នកវិញដែរ។ ដូច្នេះហើយនាំឲ្យការជជែក ឬ ពិភាក្សានោះដំណើរការទៅយ៉ាងល្អ៕
ដោយ៖ រតនា វិចិត្រ
