មហាសេដ្ឋីហុងកុង លី កាស៊ីង៖ «មិនមែនខ្ញុំសំណាងទេ តែខ្ញុំប្រឹងធ្វើការខ្លាំងណាស់ ដើម្បីសម្រេចគោលដៅដែលខ្ញុំកំណត់»
«មិនមែនខ្ញុំសំណាងទេ តែខ្ញុំប្រឹងធ្វើការខ្លាំងដើម្បីសម្រេចគោលដៅដែលខ្ញុំកំណត់»។នេះ ជាការលើកឡើងរបស់មហាសេដ្ឋីហុងកុង លោក លី កាស៊ីង(Li Ka Shing)។ ក្នុងន័យនេះលោកចង់គូសបញ្ជាក់ថា ភាពជោគជ័យរបស់លោកបច្ចុប្បន្ននេះ (ក្លាយជាកំពូលអ្នកមាននៅហុងកុង) មិនមែនកើតឡើងដោយសារតែសំណាងនោះទេ តែមកពីការប្រឹងប្រែងធ្វើការយ៉ាងអស់ពីលទ្ធភាព។
ទម្រាំជោគជ័យក្នុងជីវិត លោក លី កាស៊ីង(Li Ka Shing)បានតស៊ូក្នុងជីវិតជាអ្នកក្រតោកយ៉ាកខ្លាំង ប៉ុន្តែលោកមិនដែលអស់សង្ឃឹមនោះឡើយ ហើយតែងប្រឹងប្រែងធ្វើការសឹងរកពេលសម្រាកគ្មាន រហូតជោគជ័យធំធេងក្នុងជីវិត។ អ៊ីចឹងហើយ ក្នុងនាមជាមនុស្សមិនត្រូវពឹងលើសំណាង ឬ ដេកស៊ីប្រេងសំណាងនោះទេ តែត្រូវតែប្រឹងប្រែងធ្វើការឲ្យអស់ពីលទ្ធភាព ដើម្បីរំដោះខ្លួនចេញពីពិភពខ្មៅងងឹត។ បើអ្នកនៅតែក្រ ហើយព្យាយាមបន្ទោសលើប្រេងសំណាងនោះ គឺមិនមែនជាដំណោះស្រាយនោះឡើយ តែត្រូវពិនិត្យមើលសកម្មភាពខ្លួនឡើងវិញ ថាបានខិតខំគ្រប់គ្រាន់ហើយឬនៅ។ បើប្រឹងប្រែងហើយ នៅតែមិនជោគជ័យ គឺ ត្រូវរកឲ្យឃើញថា មកពីមូលហេតុអ្វី៕
ដោយ៖ រតនា វិចិត្រ
