មេរៀនដ៏មានតម្លៃ៤ចំណុចដែលអ្នកអាចរៀនសូត្រពីសៀវភៅ «អ្នកមានបំផុតនៅបាប៊ីឡូន»
អក្សរសាស្ត្របែបបុរាណដ៏ល្បីឈ្មោះមួយក្បាល មានចំណងជើងថា "អ្នកមានបំផុតនៅបាប៊ីឡូន" (The Richest Man in Babylon) ត្រូវបាននិពន្ធឡើងដោយអ្នកនិពន្ធ លោក George Samuel Clason គឺជាប្រភេទរឿងនិទានខ្លីមួយ ដែលមានគោលដៅផ្ដល់តម្លៃអប់រំពាក់ព័ន្ធនឹងចំណេះដឹងអំពីហិរញ្ញវត្ថុ ដែលត្រូវបានតម្កល់ទុក និងប្រើជាគោលការណ៍ដឹកនាំ ប្រៀបដូចជាក្បួនតម្រាសម្រាប់សាងភាពមានបាននាសម័យកាលបុរាណនៃទឹកដីបាប៊ីឡូន ដែលមានប្រវត្តិសាស្ត្រធ្លាប់ជាទឹកដីដ៏អច្ឆរិយ និងពោរពេញដោយឥទ្ធិពលបំផុតមួយ។
សៀវភៅដែលបានចេញផ្សាយជាផ្លូវការក្នុងឆ្នាំ១៩២៦នេះ ក៏ត្រូវបានប្រែសម្រួលជាភាសាខ្មែរយើង ហើយអ្នកក៏អាចរកបានតាមបណ្ណាគារផងដែរ។ តើតាមរយៈសៀវភៅដែលបង្កប់នូវគំនិតអប់រំដ៏ពិសេសអស្ចារ្យនេះ អ្នកអាចរៀនបានអ្វីខ្លះពីវាដើម្បីប្រែក្លាយជីវិតរបស់ខ្លួនឲ្យមានស្ថិរភាពហិរញ្ញវត្ថុបាន ?
១) ចំណាយលើខ្លួនឯងមុនគេបង្អស់
ហេតុអ្វីមនុស្សមួយចំនួន តែងជាប់ខ្លួនរត់នៅក្នុងរង្វង់វិលជុំនៃប្រាក់ចំណូលដែលខ្លួនទទួលបានជារៀងរាល់ខែ និងមិនអាចស្វែងរកផ្លូវចេញពីរង្វង់នោះបាន ? បុគ្គលប្រភេទនេះ បើទោះជាមានប្រាក់សម្រាប់ចាយវាយប៉ុណ្ណា ក៏ប្រាក់ទាំងនោះហាក់ដូចជាមិនគ្រប់គ្រាន់សម្រាប់បំពេញតម្រូវការរបស់គេដែរ ក៏ព្រោះតែហេតុផលម្យ៉ាងគឺពួកគេមិនមានទម្លាប់សន្សំប្រាក់របស់ខ្លួន ឬមិនចំណាយលើខ្លួនឯងមុននោះឯង ដែលបានកាត់ផ្ដាច់ពួកគេពីភាពមានបាននោះ។ នៅក្នុងខ្លឹមសារនៃសៀវភៅ "អ្នកមានបំផុតនៅបាប៊ីឡូន" ឬ The Richest Man in Babylon បានផ្ដល់ដំបូន្មានថា យ៉ាងហោចណាស់ក៏អ្នកត្រូវសន្សំប្រាក់១ភាគ១០ ឬស្មើនឹង១០ភាគរយនៃចំនួនប្រាក់ដែលអ្នករកបានជាប្រចាំខែជារៀងរាល់ខែនោះដែរ មិនថាប្រាក់ចំណូលនោះតិចតួចប៉ុណ្ណាក៏ដោយ។
២) ត្រូវចំណាយក្រោមចំណូលដែលអ្នកទទួលបាន
បន្ទាប់ពីអ្នកយក១០ភាគរយនៃប្រាក់ចំណូលរបស់អ្នក ទៅចំណាយលើខ្លួនឯងជាមុនហើយ ៩០ភាគរយទៀតដែលនៅសល់គឺប្រាកដជាការចំណាយឲ្យអ្នកដទៃដើម្បីដោះដូរសេចក្ដីត្រូវការរបស់អ្នកហើយ។ ប៉ុន្តែនេះមិនមែនបានន័យថា អ្នកត្រូវចំណាយ៩០ភាគរយទាំងអស់ដែលនៅសេសសល់នោះឡើយ។ រាល់ពេលចំណាយ អ្នកត្រូវបែងចែកឲ្យដាច់រវាង អ្វីដែលអ្នកត្រូវការ និងអ្វីដែលអ្នកចង់បាន។ ម្យ៉ាងទៀត បើទោះជាប្រាក់ចំណូលរបស់អ្នកកើនក៏ដោយ ការចំណាយមិនត្រូវបង្កើនដោយអារម្មណ៍រំជើបរំជួលទៅតាមចំណូលដែលកើននោះឡើយ ផ្ទុយទៅវិញអ្នកគួរតែយកប្រាក់ទៅបង្កើតប្រាក់បន្តទៀតដោយការបណ្ដាក់ទុន។
៣) ប្រើប្រាក់ឲ្យធ្វើការឲ្យអ្នក
មុននឹងប្រើប្រាស់ប្រាក់ដែលនៅសេសសល់ធ្វើការឲ្យអ្នកតាមរយៈការបណ្ដាក់ទុន អ្នកត្រូវឆ្លើយនឹងសំណួរទាំងនេះទៅកាន់ខ្លួនឯងជាមុនសិនថា តើពេលនេះអ្នកមានទ្រព្យសម្បត្តិប៉ុន្មាន ? ជម្រះបំណុលអស់ឫនៅ ? មានប្រាក់សន្សំសមល្មមឫអត់ ? ចុះប្រាក់បម្រុងសម្រាប់ជួយអ្នកក្នុងគ្រាអាសន្នជាយថាហេតុវិញ ? ការប្រើប្រាស់ប្រាក់ដើម្បីបណ្ដាក់ទុន មិនមែនចេះតែធ្វើឡើងផ្ដេសផ្ដាសតាមតែចិត្តនឹកឃើញចង់ស្រូបទាញភាពមានបាននោះឡើយ ចំណុចដ៏សំខាន់និងជាមូលដ្ឋានគ្រឹះអំពីការវិនិយោគទុន គឺជាការយល់ដឹងយ៉ាងច្បាស់អំពីអ្វីដែលខ្លួនកំពុងធ្វើ ឬវិនិយោគ។ លើសពីនេះ អ្នកត្រូវចេះប្រមើលមើលឃើញពីលទ្ធផលដកដែលអាចកើតឡើងទាំងឡាយ ព្រមទាំងត្រូវមានយុទ្ធសាស្ត្រការពារសម្រាប់រកច្រកចេញនូវរាល់គ្រោះអាសន្នផងដែរ។
៤) វិនិយោគទៅលើខ្លួនឯង
ចំណេះដឹងផ្នែកហិរញ្ញវត្ថុ គឺជាគ្រាប់ពូជដ៏សំខាន់មិនអាចខ្វះបានសម្រាប់អ្នកចង់សាងភាពមានបានរបស់ខ្លួន។ ចំណេះដឹងផ្នែកហិរញ្ញវត្ថុ ឆ្លើយនឹងសំណួរថា តើអ្នកកំពុងប្រើប្រាស់ប្រាក់របស់ខ្លួនក្នុងពេលឥឡូវនេះយ៉ាងដូចម្ដេច ? ការចំណាយប្រាក់ទៅលើចំណេះដឹងមិនដែលជារឿងដែលខាតបង់ឥតប្រយោជន៍នោះឡើយ ទោះជាវាមិនផ្ដល់ផលឲ្យអ្នកក្នុងពេលនេះ តែវានឹងផ្ដល់ផ្លែផ្កាឲ្យអ្នកក្នុងពេលក្រោយ ដែលជាការវិនិយោគលើខ្លួនឯងក្នុងរយៈពេលវែងដ៏មានតម្លៃបំផុតមួយ។ មិនថាជាការអានសៀវភៅ រៀនតាមអនឡាញ និងស្វែងរកបទពិសោធន៍ជាក់ស្ដែងក្នុងពិភពខាងក្រៅនោះទេ ទាំងនេះសុទ្ធតែជាស្ពានចម្លងអ្នកទៅរកភាពមានបានយ៉ាងពិតប្រាកដហើយ៕
ប្រែសម្រួល៖ ស្រីពៅ
ប្រភព៖ www.enlight8.com
