មិន​ប្រាកដ​ថា​ភាព​ជោគជ័យ​នៅ​កន្លែង​ធ្វើការ មាន​អត្ថន័យ​ពេញលេញ​គ្រប់គ្រាន់​នឹង​ជា​តម្លៃ​តំណាង​ពី​ភាព​ជោគជ័យ​ពិត​ប្រាកដ​ទាំងមូល​ក្នុង​ជីវិត​របស់​អ្នក​នោះ​ឡើយ។ អ្នក​អាច​សម្រេច​គម្រោងការ​ដ៏​ធំ​មួយ​បាន​ជោគជ័យ​ហើយ មាន​ប្រាក់​ចាយ​មិន​ខ្វះ​ហើយ ប៉ុន្តែ​នៅ​ពេល​អ្នក​ឈាន​ជើង​ដើរ​ចូល​ក្នុង​ផ្ទះ​ពេល​ណា បែរ​ជា​មាន​អារម្មណ៍​ថា​ក្នុង​ផ្ទះ​ហាក់​ដូចជា​គ្មាន​វិញ្ញាណ​នៃ​ភាព​កក់ក្ដៅ​និង​ក្ដី​ស្រឡាញ់​ទាល់តែ​សោះ។

មក​ដល់​ដំណាក់កាល​នេះ តើ​ជោគជ័យ​នៃ​ទ្រព្យសម្បត្តិ​តែ​ម្យ៉ាង​ពិត​នឹង​អាច​ផ្ដល់​ឲ្យ​អ្នក​នូវ​សេចក្ដី​សុខ​បាន​នៅ​ក្នុង​ជីវិត​មែន​ឬ ? តើ​អ្នក​ប្រាកដ​ចិត្ត​ឬ​អត់​ថា​ខ្លួនឯង​បាន​ផ្ដល់​ភាព​សំខាន់​ទៅលើ​រឿង​ដែល​ពិតជា​សំខាន់​មែន​នោះ ? ភាព​ម៉ត់ចត់​ចំពោះ​ការងារ​ពិត​នឹង​នាំ​អ្នក​ទៅ​រក​ភាព​ជោគជ័យ ប៉ុន្តែ​ការ​ផ្ដល់​ភាព​ម៉ត់ចត់​របស់​អ្នក ភាព​សំខាន់​របស់​អ្នក និង​ក្ដី​ស្រឡាញ់​ការ​យកចិត្តទុកដាក់​ចំពោះ​ទំនាក់ទំនង​ជាមួយ​មនុស្ស​ជាទី​ស្រឡាញ់​កាន់តែ​សំខាន់​លើស​ពី​នេះ​ទៅ​ទៀត។ ពុំ​នោះ​ទេ ប្រសិន​បើ​អ្នក​យល់​ថា​មាន​លុយ​ទើប​មាន​សេចក្ដី​សុខ នោះ​ជោគជ័យ​ដែល​អ្នក​ទទួល​បាន​នឹង​គ្រាន់តែ​ជា​ជោគជ័យ​ដែល​មាន​ប្រហោង​តែ​ប៉ុណ្ណោះ ព្រោះ​បើ​អ្នក​មិន​បាន​ផ្ដល់​និង​មិន​បាន​ទទួល​ក្ដី​ស្រឡាញ់​ពី​អ្នកដទៃ អ្នក​នឹង​គ្មាន​ក្ដី​សុខ​ពិត​ប្រាកដ​ឡើយ។

បើ​និយាយ​ពី​បច្ចេកវិទ្យា​ដ៏​ឆ្លាត​វៃ នរណា​ក៏​ស្គាល់​ពី​មហាសេដ្ឋី Bill Gates​ដែរ។ ឯ​ខាង​ផ្នែក​វិនិយោគ​ដ៏​ល្បីល្បាញ​ឯណោះ​វិញ មហាសេដ្ឋី Warren Buffett​ក៏​តែងតែ​ជា​បុគ្គល​ម្នាក់​ដែល​ត្រូវ​បាន​គេ​រំលឹក​ពី​ភាព​អស្ចារ្យ​និង​គតិបណ្ឌិត​ល្អៗ​ពី​លោក​ដូច​គ្នា​ដែរ។ ពួកគេ​ទាំងពីរ​មិន​ត្រឹមតែ​ពូកែ​រក​លុយ​នោះ​ទេ តែ​ជោគជ័យ​ដែល​ពួកគេ​មាន​គឺជា​ជោគជ័យ​ដែល​មនុស្ស​មាន​ត្រឹមតែ​ជោគជ័យ​នៅ​កន្លែង​ការងារ​តែ​បែរជា​មាន​ទំនាស់​ជាមួយ​អ្នក​ផ្ទះ​ទាំងឡាយ​តែង​ប្រាថ្នា​ចង់​បាន។ នៅ​ក្នុង​កម្មវិធី​សំណួរ​ចម្លើយ​របស់Reddit លោក Bill Gates​ត្រូវ​បាន​គេ​សួរ​ថា តើ​គាត់​មាន​ការ​យល់ឃើញ​បែប​ណា​ចំពោះ​ភាព​ជោគជ័យ ?

លោក​បាន​ឆ្លើយ​តប​ទៅវិញ​ដោយ​រំលឹក​ពី​សម្ដី​មិត្តភ័ក្ដិ​ដ៏​ជំនិត​របស់​គាត់​ថា "Warren Buffettតែង​និយាយ​ថា​កម្រិត​របស់​វា​ស្ថិត​នៅ​ត្រង់​ថា​តើ​មនុស្ស​ស្និទ្ធស្នាល​នឹង​អ្នក​ពួកគេ​សប្បាយ​រីករាយ​និង​ស្រឡាញ់​អ្នក​ឬ​អត់"។ ស្ថាបនិក​ក្រុមហ៊ុន Microsoft​រូប​នេះ មិន​ថា​រវល់​មមាញឹក​នឹង​ការងារ​ប៉ុណ្ណា​នោះ​ទេ គាត់​តែងតែ​ឆ្លៀត​ឱកាស​ចំណាយ​ពេល​ជាមួយ​ក្រុម​គ្រួសារ ភរិយា និង​កូនៗ​ជាទី​ស្រឡាញ់​របស់​គាត់​ជានិច្ច។ ដោយ​ឆ្លៀត​ពេល​ជូន​កូនៗ​ទៅ​សាលា គាត់​អាច​យក​ពេលវេលា​នេះ​ជជែក​សួរ​នាំ​ពី​ពួកគេ ដែល​គាត់​តែង​ចាត់​ទុក​វា​ជា​ពេលវេលា​ដ៏​មាន​តម្លៃ​បំផុត​សម្រាប់​ខ្លួន​ជា​ឪពុក។

ក្រៅ​ពី​សមាជិក​គ្រួសារ លោក​ក៏​បាន​ផ្ដល់​ភាព​សំខាន់​ជា​ខ្លាំង​ទៅលើ​កាតព្វកិច្ច​របស់​លោក​ក្នុង​ក្រុមហ៊ុន Microsoft ព្រោះ​ថា​វា​គឺជា​ឱកាស​សម្រាប់​លោក​ក្នុង​ការ​រួម​ចំណែក​ធ្វើ​បដិវត្តន៍software ដើម្បី​ជំរុញ​ភាព​អស្ចារ្យ​របស់​មនុស្សលោក​ផង​ដែរ៕

ប្រែសម្រួល៖ ស្រីពៅ

ប្រភព៖ www.cnbc.com