អ្នកនិពន្ធបារាំងVictor Hugo៖ «ទោះបីជារាត្រីដ៏ខ្មៅងងឹតយ៉ាងណាក៏គង់នឹងបញ្ចប់ ហើយព្រះអាទិត្យនឹងរះឡើង»
«ទោះបីជារាត្រីដ៏ខ្មៅងងឹតយ៉ាងណាក៏គង់នឹងបញ្ចប់ ហើយព្រះអាទិត្យនឹងរះឡើង»។នេះជាគតិរបស់អ្នកនិពន្ធបារាំង លោក Victor Hugo ដែលក្នុងន័យនេះចង់បញ្ជាក់ថា វាគ្មានអ្វីដែលគង់វង្សជារៀងរហូតនោះទេ ជាពិសេសបញ្ហាដ៏ស្មុគស្មាញរបស់អ្នក នឹងត្រូវបញ្ចប់ ហើយរឿងល្អនឹងកើតឡើង។
មនុស្សម្នាក់ៗ សុទ្ធតែមានការលំបាក ឧបសគ្គ និង បញ្ហារាប់មិនអស់ ដែលបញ្ហាទាំងនេះហើយបានធ្វើឲ្យមនុស្សមួយចំនួន មានអារម្មណ៍ក្រៀមក្រំនិងបាក់ទឹកចិត្តខ្លាំង រហូតមើលឃើញពិភពលោកទាំងមូលថា ជាពិភពដ៏ខ្មៅងងឹត។ ការគិតបែបនេះ គឺគ្មានអ្វីក្រៅតែពីទាញខ្លួនឯងឲ្យធ្លាក់ចូលក្នុងស្ថានភាពកាន់តែលំបាកជាងមុននោះទេ។
ប៉ុន្តែបើយើងគិតក្នុងន័យវិជ្ជមានវិញ នោះយើងនឹងឃើញថា បញ្ហាទាំងនោះគឺគ្រាន់តែជាផ្នែកមួយនៃជីវិតប៉ុណ្ណោះ ព្រោះបើមានថ្ងៃប្រាកដជាមានយប់មិនខាន (ជាបែបបទធម្មជាតិ) ហើយឲ្យតែយើងព្យាយាមធ្វើអ្វីដែលល្អៗឲ្យអស់ពីលទ្ធភាព នោះរឿងអាក្រក់នឹងរសាត់បាត់មិនខាន ដែលវាប្រៀបដូចជា រាត្រីដ៏អាប់អួនិង ខ្មៅងងឹត ដែលត្រូវបញ្ចប់ ដោយជំនួសមកវិញនូវ ពន្លឺព្រះអាទិត្យដ៏មានរស្មីវិញមិនខាន។ ដូច្នេះមិនថា មានរឿងអ្វីកើតឡើងនោះទេ ជីវិតត្រូវតែមានសង្ឃឹមជានិច្ច ដរាបណាអ្នកគិតថាជីវិតមានតម្លៃ ហើយជីវិតនឹងមានរស្មី៕
ដោយ៖ រតនា វិចិត្រ
