ហេតុអ្វីមនុស្សម្នាក់ៗ ចូលចិត្តការពន្យារពេលម៉្លេះ
ការពន្យារពេលតែងតែកើតមានឡើងចំពោះមនុស្យគ្រប់គ្នា តែមនុស្យខ្ជិលភាគច្រើនចូលចិត្តពន្យារពេលច្រើនជាងអ្នកដែលមិនខ្ជិល។ តើមានមូលហេតុសំខាន់ៗ អ្វីបានជាគេចូលចិត្តការពន្យារពេល? តើធ្វើយ៉ាងណាដើម្បីបញ្ឈប់ការពន្យារពេលតទៅទៀត?
១) ចង់ធ្វើឲ្យល្អឥតខ្ចោះពេក៖ កាលដែលអ្នកគិតច្រើន ដើម្បីចង់បានអ្វីមួយដែលល្អឥតខ្ចោះពេក វាអាចជាបញ្ហាសម្រាប់អ្នក។ អ្នកដែលចង់បានអ្វីល្អឥតខ្ចោះ ពួកគេមិនសូវហ៊ានក្នុងការចាប់ផ្ដើមឡើយ។ ពេលខ្លះពួកគេ អាចជាប់គាំងធ្វើអ្វីលែងចេញពាក់កណ្ដាលទី ដោយសារតែមិនហ៊ានដើរទៅមុខ។ យោបល់ខ្លះៗ ដើម្បីបញ្ឈប់ការពន្យារពេលទៀតគឺ អ្នកត្រូវស្គាល់ឲ្យច្បាស់ពីបំណងនៃការងារអ្នក បន្ទាប់មក កំណត់ពេលជាក់លាក់ណាមួយដើម្បីធ្វើវាឲ្យបានទាន់ពេល។
២) ចេះតែស្រមៃតែមិនចេះធ្វើ៖ នេះគឺសម្រាប់មនុស្សដែលចូលចិត្តស្រមើស្រមៃ តែមិនដែលអនុវត្ត។ ពួកគេមានភាពឆ្នៃប្រឌិតពិតមែន តែការអនុវត្តការងារគឺពិបាកណាស់ស្រាប់ពួកគេ។ យោបល់ខ្លះៗ ដើម្បីបញ្ឈប់ការពន្យារពេលទៀតគឺ ព្យាយាមបែងចែកការស្រមើស្រមៃអ្នក ឲ្យទៅជាផ្នែកតូចៗ បន្ទាប់មកចាប់ផ្ដើមអនុវត្ត វាម្ដងមួយៗទៅ។
៣) មិនចង់បង្កើតកំហុស៖ នេះជាប្រភេទមនុស្សដែល មិនហ៊ានធ្វើអ្វីសោះ ព្រោះតែខ្លាចខុស។ ពួកគេសុខចិត្ត នៅផ្ទះ ក៏មិនចង់ឲ្យអ្នកដទៃ ចោទប្រកាន់ថាពួកគេខុសដែរ។ យោបល់ខ្លះៗ ដើម្បីបញ្ឈប់ការពន្យារពេលទៀតគឺ កុំព្យាយាមគិតពីកំហុសដែលអ្នកនឹងមាន អ្នកគួរតែធ្វើអ្វីដែលអ្នកគួរធ្វើឲ្យអស់ពីសមត្ថភាពសិនទៅ។
៤) ចង់ធ្វើមួយថ្ងៃមុន Deadline មកដល់៖ មនុស្សប្រភេទនេះ គឺ តែងតែមានអារម្មណ៍ថាចង់ធ្វើ ពេលដែល Deadline មកដល់។ យោបល់ខ្លះៗ ដើម្បីបញ្ឈប់ការពន្យារពេលទៀតគឺ ត្រូវគិតថា ការងារដែលអ្នកធ្វើប្រញាប់ៗ គឺមិនល្អ សោះឡើយ បើធៀបនឹងការងារ ដែលអ្នកចំណាយពេលធ្វើយូរ។ ដូចនេះអ្នកគួររៀនកែទម្លាប់នេះចេញ៕
ប្រែសម្រួល៖ ព្រំ សុវណ្ណកណ្ណិកា ប្រភព៖ lifehack
