លោកSoichiro Honda ស្ថាបនិកក្រុមហ៊ុន Honda៖ «ខ្ញុំមិនត្រូវការសញ្ញាប័ត្រទេ ខ្ញុំត្រូវការតែចំណេះដឹងប៉ុណ្ណោះ»
«ខ្ញុំមិនត្រូវការសញ្ញាប័ត្រទេ ខ្ញុំត្រូវការតែចំណេះដឹងប៉ុណ្ណោះ»។នេះជាសម្ដីប្រកបដោយគតិរបស់លោក Soichiro Honda ដែលជាស្ថាបនិករបស់ក្រុមហ៊ុន Honda និង ជាអតីតឧស្សាហករដ៏ល្បីល្បាញរបស់ជប៉ុន។ ក្នុងន័យនេះ លោកចង់បញ្ជាក់ថា ចំណេះដឹងពិតប្រាកដ គឺវាមានតម្លៃលើសពីសញ្ញាប័ត្រ។
សញ្ញាប័ត្រគឺជាលិខិតមួយដែលបញ្ជាក់ថា អ្នកបានបញ្ចប់ការសិក្សា ក្រោយពីការតស៊ូ និង ខិតខំរៀនសូត្រអស់រយៈពេលជាយូរមក។ ប៉ុន្តែមិនមែនមនុស្សគ្រប់គ្នាដែលមានសញ្ញាប័ត្រនោះ សុទ្ធតែជោគជ័យក្នុងជីវិតការងារនោះទេ ជាពិសេសមនុស្សដែលមានតែសញ្ញាប័ត្រ តែគ្មានសញ្ញាធ្វើឬ ចំណេះដឹងពិតប្រាកដដែលអាចយកទៅប្រើឲ្យចេញជាប្រយោជន៍។ ដូច្នេះហើយ បានជាលោក Soichiro Honda ផ្ដល់តម្លៃលើចំណេះដឹងដែលប្រើប្រាស់ជាប្រយោជន៍ ជាជាងសញ្ញាប័ត្រ ព្រោះសញ្ញាប័ត្រនោះ នឹងក្លាយជាក្រដាសមួយសន្លឹកដែលគ្មានន័យ ប្រសិនបើគ្មានចំណេះដឹងពិត ឬ អាចប្រើចំណេះឲ្យចេញជាប្រយោជន៍សម្រាប់ការរស់នៅប្រចាំថ្ងៃបាន។ អ៊ីចឹងហើយ ត្រូវប្រាកដថា ដើម្បីទទួលជោគជ័យក្នុងជីវិត គឺអ្នកត្រូវមានចំណេះដឹងពិតប្រាកដ មិនមែនបង្អួតតែសញ្ញាប័ត្រនោះទេ៕
ដោយ៖ រតនា វិចិត្ត
