Rob Glibert៖ «បុគ្គលបរាជ័យ មើលឃើញតែពីទណ្ឌកម្មនៅពេលបរាជ័យ ចំណែកបុគ្គលជោគជ័យមើលឃើញតែពីរង្វាន់នៅពេលជោគជ័យ»
«បុគ្គលបរាជ័យ មើលឃើញតែពីទណ្ឌកម្មនៅពេលបរាជ័យ ចំណែកបុគ្គលជោគជ័យមើលឃើញតែពីរង្វាន់នៅពេលជោគជ័យ»។ នេះជាគតិរបស់លោកRob Glibert ជាអ្នកនិពន្ធ និង ជាអ្នកជំនាញផ្នែកលើកទឹកចិត្តរបស់អាមេរិក ដែលក្នុងន័យនេះ ចង់បញ្ជាក់ថា ការគិត និង យល់ឃើញចំពោះរឿងអ្វីមួយគឺជារឿងសំខាន់ មានន័យថាបើគិតឃើញតែពីបញ្ហា នោះអ្នកនឹងជួបតែពីបញ្ហា តែបើគិតឃើញតែពីដំណោះស្រាយ និង សមិទ្ធផលនៅពេលសម្រេចកិច្ចការណាមួយនោះ អ្នកនឹងមានសង្ឃឹមខ្ពស់ ក្នុងការទទួលជោគជ័យ។
ការគិត គឺពិតជាសំខាន់ ព្រោះមនុស្សជោគជ័យ ឬ បរាជ័យសុទ្ធតែផ្ដើមចេញពីការគិតរបស់ខ្លួនម្នាក់ៗ។ មនុស្សដែលគិតឃើញតែពីបញ្ហា និង រឿងអាក្រក់ ឬគិតថា ទៅមិនរួចទេ ព្រោះដោយយោងលើហេតុផលមួយ ពីរ បី បួន គឺប្រាកដណាស់ថា នឹងទៅមិនរួច ហើយខួរក្បាលនោះ នឹងកាន់តែស្មុគឡើងៗ។ គេអាចនិយាយបានម្យ៉ាងទៀតថា មិនទាន់ចូលប្រកួតផង គិតថា ខ្លួនឯងទៅមិនរួចទៅហើយ។
ប៉ុន្តែសម្រាប់មនុស្សដែលមានផ្នត់គំនិតជោគជ័យវិញ គិតខុសពីនេះដាច់។ ពួកគេមិនបដិសេធទេ បញ្ហាផ្សេងៗមិនងាយនឹងដោះស្រាយបាន ហើយខ្លួនក៏មិនអាចជោគជ័យដោយស្រួលៗដែរ ប៉ុន្តែបើមិនសាក ក៏មិនដឹង ដូច្នេះហើយមិនថា វាពិបាកប៉ុណ្ណានោះទេ គឺ ត្រូវតែព្យាយាមធ្វើឲ្យបាន ព្រោះពិបាកមុន តែងស្រណុកក្រោយ។ ការគិត និង ចេញសកម្មភាពបែបនេះ មិនយូរមិនឆាប់ប្រាកដជា ជោគជ័យ។ បើទោះបីជា បរាជ័យ ក៏វានឹងក្លាយជាមេរៀន ឬ គ្រាប់ពូជដ៏មានប្រយោជន៍សម្រាប់ភាពជោគជ័យទៅថ្ងៃក្រោយដែរ។ ត្រូវចាំថា ជោគជ័យធំ ក៏ត្រូវការព្យាយាម និងសកម្មភាពក្នុងលក្ខណៈទ្រង់ទ្រាយធំដែរ៕
ដោយ៖ រតនា វិចិត្រ
