អ្នកគួរតែមានមិត្តភ័ក្ដិប្រភេទទាំងនេះក្នុងជីវិតរបស់អ្នក
ជាការពិតណាស់ មនុស្សយើងរាល់គ្នាត្រូវការមិត្តភ័ក្ដិដែលអាចរួមសុខរួមទុក្ខជាមួយគ្នា ប៉ុន្តែមិត្តល្អពិតជាមិនងាយរកបានឡយ។ ប្រសិនជាអ្នកមានមិត្តភ័ក្ដិប្រភេទខាងក្រោមនេះនោះជីវិតរបស់អ្នកនឹងពោរពេញទៅដោយភាពរីករាយនិងមានន័យ៖
១) មិត្តភ័ក្ដិដែលស្មោះត្រង់៖ ពេលខ្លះ អ្នកប្រហែលជាត្រូវការមិត្តភ័ក្ដិដែលស្មោះត្រង់ម្នាក់ដែលមិនចេះវាយតម្លៃឬនិយាយអាក្រក់ពីអ្នកឡើយ ឃើញល្អថាល្អ ឃើញអាក្រក់ថាអាក្រក់នៅចំពោះមុខរបស់អ្នកតែម្តង។ មិត្តភ័ក្ដិប្រភេទនេះគឺជាមិត្តដែលដឹងពីចំណុចល្អនិងចំណុចអាក្រក់របស់អ្នក តែគេនៅតែស្រឡាញ់អ្នក។
២) មិត្តភ័ក្ដិដែលមិនចេះខ្លាច៖ យើងរស់នៅក្នុងពិភពលោកមួយដែលពោរពេញទៅកន្លែងដើរលេងជាច្រើន។ ប៉ុន្តែ មនុស្សជាច្រើនមានភាពភ័យខ្លាច មិនហ៊ានក្នុងការធ្វើអ្វីថ្មីទេ។ យើងទាំងអស់គ្នាសុទ្ធតែត្រូវការមិត្តភ័ក្ដិផ្សងព្រេងម្នាក់ដែលជួយជំរុញយើងធ្វើអ្វីថ្មី ណែនាំយើងទៅកន្លែងថ្មីឬគំនិតថ្មី។ល។
៣) មិត្តភ័ក្ដិដែលទៀងត្រង់៖ ក្នុងឆាកជីវិតរបស់យើង ពេលខ្លះយើងត្រូវការស្តាប់ពាក្យពិតទោះបីជាវាល្វីងជូរចត់។ មិត្តភ័ក្ដិត្រូវការភាពស្មោះត្រង់និងទៀងត្រង់នឹងគ្នា។ ហើយជួយគ្នានិងផ្តល់យោបល់ឲ្យគ្នាពេលមានបញ្ហាកើតឡើង។ ប្រសិនជាអ្នករកឃើញមិត្តភ័ក្ដិប្រភេទនេះ កុំប្រលែងគេឲ្យសោះ។ មនុស្សប្រភេទនេះពិបាករកខ្លាំងណាស់។
៤) មិត្តភ័ក្ដិដែលឆ្លាត៖ ប្រសិនជាអ្នកមានមិត្តភ័ក្ដិដែលឆ្លាតឬជះឥទ្ធិពលដល់អ្នកឬមនុស្សដែលអនុវត្តទស្សនៈរបស់ពួកគេ អ្នកជាមនុស្សដែលសំណាងជាទីបំផុត។ យើងសុទ្ធតែត្រូវការមិត្តភ័ក្ដិម្នាក់ដែលជួយជំរុញយើងឲ្យដើរទៅមុខដោយមិនបំបាត់ទឹកចិត្តយើងឡើយ។
ប្រែសម្រួល៖ អុឹង មុយយូ ប្រភព៖ www.lifehack.org
