ដើមទុននៃគំនិត៣ចំណុច ដែលជាគ្រោងឆ្អឹងនៃការចាប់ផ្ដើមអាជីវកម្មមួយដោយជោគជ័យ
មុននឹងចាប់ផ្ដើមបង្កើតអាជីវកម្មមួយឡើង តើចំណុចសំខាន់ជាមូលដ្ឋានអ្វីខ្លះដែលអ្នកតែងតម្រង់ត្របាញ់ឆ្ពោះការគិតរបស់អ្នកទៅលើ ? អ្នកនឹងតែងតែកត់សម្គាល់ឃើញចំពោះរាល់បុគ្គលដែលមានបំណងក្លាយខ្លួនជាសហគ្រិននាពេលអនាគតទាំងឡាយ ព្យាយាមប្រមូលទិន្នន័យ ព័ត៌មាននិងចំណេះដឹងឲ្យបានទូលំទូលាយ ទាក់ទិននឹងការចាប់ផ្ដើមជំនួញមួយឲ្យបានជោគជ័យពីបណ្ដាអ្នកជើងចាស់មានបទពិសោធន៍ក្រាស់ក្រែល ប្រឡូកនៅក្នុងវិស័យនេះអស់ជាច្រើនឆ្នាំ ក៏ដើម្បីព្យាយាមបញ្ចៀសពីកំហុសឆ្គងដែលនាំទៅរកការខូចខាតធនធាន ពេលវេលា ព្រមទាំងសម្ពន្ធភាពជាមួយដៃគូសហការជំនួញ និងកាន់តែធ្ងន់ធ្ងរគឺក្ស័យធននេះឯង។
ចុះប្រសិនជាមានអ្នកជំនាញធ្វើការសិក្សាដកពិសោធន៍ស៊ីជម្រៅទៅលើការចាប់ផ្ដើមអាជីវកម្មនេះឲ្យទទួលបានភាពជោគជ័យគឺ លោក Paul Graham ដែលជាសហស្ថាបនិករបស់ក្រុមហ៊ុន Y Combinator ជាក្រុមហ៊ុនដែលជួយអាជីវកម្មថ្មោងថ្មីពន្លឿនភាពរីកចម្រើនរបស់ខ្លួន បានផ្ដល់ជាគ្រោងឆ្អឹង៣សំខាន់ៗដែលអាចផ្ដល់លំនឹងដ៏រឹងមាំមួយសម្រាប់អាជីវកម្មរបស់អ្នក តើដើមទុននៃគំនិតអាជីវកម្មនេះ នឹងមានឥទ្ធិពលដល់ជោគវាសនាអាជីវកម្មរបស់អ្នកនាពេលអនាគតយ៉ាងដូចម្ដេចទៅវិញ ? ជាដំបូងទាល់តែអ្នកសាកពិចារណានិងវិភាគទៅលើគ្រឹះសំខាន់ៗទាំង៣ចំណុចខាងក្រោមនេះសិន៖
១) ចាប់ផ្ដើមជាមួយមនុស្សដ៏ត្រឹមត្រូវ៖ តើមនុស្សបែបណាដែលចាត់ទុកថាជាមនុស្សដ៏ត្រឹមត្រូវ ស័ក្ដិសមក្នុងការរួមដំណើរជាមួយអ្នកទៅកាន់បេសកកម្មរួមគ្នាបាន ? មានអត្តចរិត២យ៉ាងដែលជួយបង្ហាញអ្នកឲ្យអាចសម្គាល់បានថាម្នាក់ណាជាដៃគូដ៏ត្រឹមត្រូវ ក្នុងការចាប់ផ្ដើមអាជីវកម្មជាមួយអ្នក នោះគឺសមត្ថភាពរបស់ពួកគេក្នុងការដោះស្រាយបញ្ហា និងសម្រេចចិត្តក្នុងកិច្ចការផ្សេងៗបានដោយឯករាជ្យ និងមួយទៀតគឺជាការប្ដេជ្ញាចិត្តតស៊ូរើបម្រះចេញពីគំនាបសង្កត់នៃឧបសគ្គ។ ដូច្នេះតើអ្វីជាត្រីវិស័យសម្រាប់ចង្អុលបង្ហាញឲ្យឃើញពីគុណតម្លៃនៃអត្តចរិតទាំងនេះនៅក្នុងមនុស្សម្នាក់ៗ ? នោះគឺជាបទពិសោធន៍ពីអតីតកាលរបស់គេនេះហើយ។ តាមដាននិងសង្កេតមើលថា តើកន្លងមកពួកគេមានគុណសម្បត្តិទាំង២យ៉ាងនេះ ក្នុងការដោះស្រាយបញ្ហាជីវិតរបស់ខ្លួនពួកគេផ្ទាល់ទេ ?
២) ធ្វើនូវអ្វីដែលមនុស្សចង់បាន៖ សហគ្រិនថ្មោងថ្មីភាគច្រើនតែងតម្រង់ត្របាញ់ឆ្ពោះការគិតរបស់ពួកគេទៅលើ "គំនិតផ្ដួចផ្ដើមដ៏អស្ចារ្យ" ក្នុងការចាប់ផ្ដើមអាជីវកម្មរបស់ខ្លួន។ យ៉ាងណាមិញ គំនិតផ្ដួចផ្ដើមរបស់ពួកគេ បើគោលដៅនៃគំនិតនោះមិនអាចយកមកប្រើប្រាស់ដើម្បីដោះស្រាយបញ្ហារបស់មនុស្សកំពុងជួបប្រទះបានឲ្យមានដំណើរការណ៍ទៅមុខរួចទេ ទោះជាវាប្រកបដោយភាពច្នៃប្រឌិតក៏ដោយ គំនិតនេះពិតជាមិនសំខាន់ ហើយក៏មិនអស្ចារ្យអ្វីដែរ។ ឃ្លាមួយបានលើកឡើងថា៖ "អ្នកលក់គ្មានវិជ្ជាជីវៈលក់ផលិតផល ចំណែកអ្នកលក់អាជីព គេលក់ដំណោះស្រាយ"។ ចាប់ផ្ដើមអាជីវកម្មអ្នកដោយស្វែងរកឲ្យឃើញនូវបញ្ហាដែលកើតឡើងនៅក្នុងសង្គមអ្នក រួចដាក់ចិត្តដាក់កាយដោះស្រាយបញ្ហានោះ។
៣) ចំណាយលុយឲ្យបានកាន់តែតិចតាមតែអាចធ្វើទៅបាន៖ ត្រង់នេះគឺចង់សំដៅឲ្យអ្នកត្រូវមានស្មារតីប្រុងប្រយ័ត្នជានិច្ចចំពោះរាល់ការចំណាយ ដើម្បីចៀសវាងពីបញ្ហាតាមតែអាចទៅរួចនេះឯង។ បើអ្នកចំណាយដោយមានសតិប្រុងប្រយ័ត្ន គិតគូរនិងថ្លឹងថ្លែងឲ្យបានច្រើនជ្រុង នោះអ្នកនឹងសេសសល់ធនធានច្រើនល្មមសម្រាប់អាចគាំពារអ្នកដោះស្រាយជាមួយបញ្ហាផ្សេងៗ ដែលនឹងកើតឡើងដោយមិនបានគ្រោងទុក និងអាចឲ្យអ្នកប្រើប្រាស់លុយទាំងនោះទៅចំណាយលើអ្វីដែលសំខាន់ពិតប្រាកដសម្រាប់ទ្រទ្រង់អាជីវកម្មអ្នកឲ្យមានជីវិតរស់រានបាន៕
ប្រែសម្រួល៖ ស្រីពៅ ប្រភព៖ medium
