សញ្ញាបញ្ជាក់ថា «បុគ្គលិកស្នូលរបស់អ្នកមានបំណងចង់ចាកចេញពីអ្នកហើយ»!
ក្នុងនាមជាអ្នកគ្រប់គ្រង អ្នកប្រាកដជាដឹងច្បាស់ថាបុគ្គលិកណាខ្លះជាបុគ្គលិកស្នូល ហើយពួកគេមានតួនាទី និងបំពេញការងារដូចម្ដេចខ្លះហើយ។ តែបើអ្នក ចាប់ផ្ដើមឃើញលទ្ធផលការងាររបស់ពួកគេ មិនសកម្ម ដូចមុន ពួកគេប្រហែលជាលែងចង់ធ្វើការជាមួយអ្នកតទៅទៀតក៏ថាបាន។
១) ពួកគេលែងចង់ទទួលបានឱកាសការងារថ្មីៗហើយ៖ បើបុគ្គលិកនៅមានអារម្មណ៍ចង់ធ្វើការងារ ពួកគេតែងតែធ្វើការយ៉ាងសកម្ម ហើយចង់ទទួលបានឱកាសការងារថ្មីៗ ដែលថៅកែបានដាក់ឲ្យ។ តែបើថៅកែបានផ្ដល់ការងារថ្មីៗជាច្រើនហើយគ្មានអ្នកណាចាប់អារម្មណ៍សួរនាំនោះ វាជាសញ្ញាមួយបង្ហាញថា គេអស់ចិត្តចង់ធ្វើការជាមួយអ្នកតទៅទៀតហើយ។
២) ពួកគេធ្វើការគឺសម្រាប់តែមួយថ្ងៃៗប៉ុណ្ណោះ៖ បុគ្គលិកនីមួយៗ តែងតែធ្វើការដោយគិតវែងឆ្ងាយ តទៅមុខទៀត។ ពួកគេខំធ្វើការឲ្យអស់ពីចិត្ត ដើម្បីឲ្យថៅកែបានឃើញហើយឡើងតំណែងឲ្យនៅថ្ងៃមុខទៀត។ តែបើបុគ្គលិកមួយធ្វើការ មួយថ្ងៃគិតតែមួយថ្ងៃវិញ ពួកគេប្រហែលជាលែងមានបំណងចង់រួមរស់ជាមួយក្រុមហ៊ុននោះយូរទៀតហើយ ព្រោះអីគេធ្វើការដោយមិនបានគិតពីថ្ងៃអនាគតផងហ្នឹង។
៣) ពួកគេលែងចង់បញ្ចេញមតិផ្ទាល់ខ្លួនអ្វីទាំងអស់៖ បុគ្គលិកដែលមានទឹកចិត្តចង់ធ្វើការ គឺតែងតែក្លាហាន ហ៊ានអះអាងនិងគាំទ្រគំនិតរបស់ខ្លួនឯងគ្រប់ពេល។ តែបើដល់ពេលមួយដែលគេលែងនិយាយអ្វីទាំងអស់ គេលែងចង់នៅក្រុមហ៊ុននោះទៀតហើយ។
៤) ពួកគេបានផ្លាស់ប្ដូរអាកប្បកិរិយា៖ អាកប្បកិរិយាមនុស្សគឺងាយសម្គាល់ណាស់។ បើបុគ្គលិកម្នាក់បានផ្លាស់ប្ដូរអាកប្បកិរិយាហើយនោះ គេប្រាកដជាមានរឿងអ្វីលាក់ក្នុងចិត្តហើយ។ គេអាចមិនពេញចិត្តនឹងការងារ អាចបាក់ទឹកចិត្ត អាចជួបបញ្ហាច្រើនពេក អាចមកបីសម្ពាធការងារក៏ថាបាន៕
ប្រែសម្រួល៖ ព្រំ សុវណ្ណកណ្ណិកា ប្រភព៖ forbes
