មានគំនិតរកស៊ីល្អហើយ តែអ្នកត្រូវសួរខ្លួនឯងសំណួរទាំងនេះសិនមុននឹងបើកដំណើរការ
ពេលចង់បើកការរកស៊ីមួយដោយខ្លួនឯង វាមានរឿងច្រើនណាស់ដែលអ្នកគួរតែខ្វាយខ្វល់ ដូចជាហិរញ្ញវត្ថុ ច្បាប់ និងសំណួរជាច្រើនថែមទៀត។ តើអ្នកបានលុយមកពីណាសម្រាប់ដំណើរការអាជីវកម្មនេះ? តើនរណាជាដៃគូប្រកួតប្រជែងអ្នក? ហើយខាងក្រោមនេះគឺជាសំណួរបន្ថែមទៀត ដែលអ្នកគួរសួរខ្លួនឯង មុននឹងដំណើរការការរកស៊ី៖
១) តើអ្នកមានទំនួលខុសត្រូវលើអ្វីខ្លះ?៖ អ្នកមិនមែនទទួលខុសត្រូវសម្រាប់ខ្លួនឯងប៉ុណ្ណោះទេ តែក្រុមហ៊ុនទាំងមូលតែម្ដង។ វារួមបញ្ចូលបុគ្គលិក ក្រុមគ្រួសារបុគ្គលិក អ្នកវិនិយោគទុន អ្នកចូលហ៊ុន អតិថិជន និងសហគមន៍ដែលអ្នកកំពុងធ្វើជំនួញនោះទៀត។
២) តើអ្នកនឹងពលីអ្វីខ្លះដើម្បីឲ្យការងារនោះដំណើរការ?៖ អាជីវកម្មដែលទើបនឹងចាប់ផ្ដើមគឺពិតជាទាមទារការពលីច្រើនណាស់។ ក្នុងនោះមាន ពលីតាំងពីម៉ោងសម្រាក កម្លាំង ការចូលចិត្ត ចំណងមិត្តភាព ចំណង ស្នេហា និងពេលវេលាផ្ទាល់ខ្លួនទៀត។ ដូចនេះត្រូវត្រៀមខ្លួនឲ្យហើយ ក្នុងការពលី ដើម្បីទទួលបានជោគជ័យមកវិញ។
៣) តើអ្នកអាចសម្រេចចិត្តបានពេលខ្លួនកំពុងមានសម្ពាធទេ?៖ ពេលបើកអាជីវកម្ម អ្នកនឹងជួបរឿងរ៉ាវជាច្រើនដែលអ្នកនឹងនឹកស្មានមិនដល់។ អ្នកនឹងសម្រេចរាល់កិច្ចការទាំងអស់ ហើយអ្នកត្រូវប្រាកដនឹងវាឲ្យមែនទែន។ ក្នុងនោះមានរឿងជួលបុគ្គលិក ចំណាយ ចំណូល ទីផ្សារ លក់ និង បច្ចេកទេសនានាទៀត៕
ប្រែសម្រួល៖ ព្រំ សុវណ្ណកណ្ណិកា ប្រភព៖ entrepreneur
