Lenovo ​ក៏​ជា​ក្រុមហ៊ុន​មួយ​ក្នុង​ចំណោម​បណ្ដា​ក្រុមហ៊ុន​បច្ចេកវិទ្យា​ធំៗ ដែល​មាន​វត្តមាន​នៅ​ក្នុង​ពិព័រណ៍ IFA ឆ្នាំ២០១៧ នេះ​ដែរ។ ខែ​កញ្ញា​នេះ ជា​ពេលវេលា​ដ៏​រំភើប និង​ទាក់ទាញ​សាធារណជន​ឱ្យ​មាន​ការ​ចាប់អារម្មណ៍​មក​លើ​ផលិតផល​ថ្មីៗ​ទាំង​កុំព្យូទ័រ និង​ស្មាតហ្វូន​ស៊េរី​ថ្មីៗ និង​ទំនើបៗ។ ក្នុង​នោះ Lenovo បាន​ដាក់​បង្ហាញ​កុំព្យូទ័រ​យួរដៃ​ស៊េរី​ថ្មី ម៉ូដែល Yoga 920 ដ៏​ទំនើប​ផង​ដែរ។ Yoga 920 ​មាន​អេក្រង់​ទំហំ ១៣,៩អ៊ីញ​អេក្រង់ 4K display ​ហើយ​បំពាក់​ដោយ​បន្ទះ​ឈីប​ជំនាន់​ចុងក្រោយ​របស់ Intel គឺ 4-core Intel Core i7 ជំនាន់​ទី៨។

ក្រឡេក​មើល​រូបរាង​ឌីហ្សាញ​លើ Yoga 920 គឺ​ពិត​ជា​ពិសេស ស្ដើង ទាន់សម័យ ព្រម​ទាំង​អាច​ឱ្យ​គេ​ប្រើប្រាស់​ក្នុង​ទម្រង់​ជា​ថេប្លេត​បាន​ថែមទៀត ដោយសារ​វា​ត្រូវ​បាន​រចនា​ភ្ជាប់​ដោយ​អេក្រង់​អាច​បត់​បាន​មុំ ៣៦០ដឺក្រេ​បាន។ Yoga 920 មាន​កម្រាស់​ត្រឹម ១៣,៩៥មម​ប៉ុណ្ណោះ។ ខាង​ក្រោម​នេះ ជា​លក្ខណៈ​សម្បត្តិ​លំអិត​មាន​នៅ​លើ Yoga 920៖

Yoga 920 ជា​Laptop ​ប្រើ touchscreen ​អេក្រង់​ទំហំ ១៣,៩អ៊ីញ មាន​គែម​អេក្រង់​បញ្ឈរ​ស្ដើង​ត្រឹម ៥មម។ អេក្រង់ IPS touchscreen ​អាច​បត់​បាន​ក្នុង​មុំ ៣៦០ដឹក្រេ ងាយស្រួល​ប្រើ​ក្នុង​ទម្រង់​ថេប្លេត​បាន​ផង​ដែរ។ តួ​របស់​វា​ផលិត​ពី​អាលុយមីញ៉ូម គុណភាព​ខ្ពស់។ វា​ក៏​បាន​ភ្ជាប់​មក​ជាមួយ​ប៊ិច Lenovo Active Pen 2 ដែល​អាច​ប្រើ​សម្រាប់​ការងារ​សិល្បៈ​គំនូរ​បាន​ងាយស្រួល។ អេក្រង់​ Yoga 920 មាន​កម្រិត 1080 ​មាន​កម្លាំង​ថ្ម​ប្រើ​បាន​រយៈពេល ១០,៨ម៉ោង ទៅ ១៥,៥ម៉ោង ហើយ​មាន​ទម្ងន់ ១,៣៧គីឡូក្រាម៕

 ​

​ដោយ៖ រឹទ្ធិរាជ ប្រភព៖  ubergizmo, lenovo