ថ្មីៗ​នេះ​ Dell ទើប​ប្រកាស​ចេញ​កុំព្យូទ័រ​យួរដៃ​ស៊េរី​ថ្មី​ចុងក្រោយ​របស់​ខ្លួន​ទៀត​ហើយ ទៅ​លើ​សែស្រឡាយ XPS ​ដែល​ជា Dell XPS 13 ​ត្រូវ​បាន​បង្កើន​សមត្ថភាព Hardware ខ្ពស់​ជាង​មុន។ ក្រុមហ៊ុន​កុំព្យូទ័រ​របស់​អាមេរិក​នេះ នឹង​តាំង​បង្ហាញ​សមិទ្ធផល​ថ្មីៗ​របស់​ខ្លួន រួម​ទាំង XPS 13 ថ្មី​នេះ នៅ​ក្នុង​ព្រឹត្តិការណ៍ CES 2018 ​សប្ដាហ៍​ក្រោយ។ https://youtu.be/XChLUIP8kDw Dell XPS 13 ​នឹង​មាន​ជម្រើស​ប្រព័ន្ធ​ប្រតិបត្តិការ​ដូច​ជា Windows និង Linux អាស្រ័យ​តាម​តម្រូវការ​របស់​អតិថិជន ដែល​ជំនាន់ Windows នឹង​មាន​លក់​ក្នុង​តម្លៃ ៩៩៩,៩៩ដុល្លារ ខណៈ​ជំនាន់ Linux តម្លៃ ៩៤៩,៩៩ដុល្លារ។ XPS 13 គឺ​ជា​កុំព្យូទ័រ​ឡេបថប​ស៊េរី​ខ្ពស់​របស់ Dell ដែល​ត្រូវ​បាន​ឌីហ្សាញ​រូបរាង​ស្ដើង​ទាន់សម័យ មាន​អេក្រង់ InfinityEdge ពោល​គឺ​មាន​គែម​ស្ដើង ទាន់សម័យ​អម​ដោយ​ទំហំ​អេក្រង់ ១៣អ៊ីញ។ វា​មាន​កម្រិត​ស្ដើង​ជាង​មុន ៣០% ពោល​គឺ​ស្ដើង​ជាង​មុន ៣,៤មិល្លីម៉ែត្រ ហើយ​ក៏​ស្រាល​ជាង​មុន​ត្រឹម ២,៧ផោន។ វា​ដំណើរការ​ដោយ Windows 10 ​ហើយ​បំពាក់​ដោយ CPU ​ប្រភេទ Quad Core ជំនាន់​ចុងក្រោយ​គឺ​ទី៨ អម​ដោយ​អង្គ​ផ្ទុក​ទិន្នន័យ​ប្រភេទ SSD ទំហំ​ដល់ 1TB។ XPS 13 ថ្មី​នេះ អាច​កាន់​ថ្ម​បាន​រយៈពេល​ដល់ ២០ម៉ោង​ស្ថិត​ក្នុង​ការ​កំណត់​បង្ហាញ​កម្រិត FHD ​ហើយ​ប្រើ​បាន​រយៈពេល ១១ម៉ោង សម្រាប់​កម្រិត UHD។ ក្រៅពី​រូបរាង​ឌីហ្សាញ តូច​ជាង​មុន ស្រាល​ជាង​មុន​ហើយ​នោះ គេ​ក៏​ថែមទាំង​បាន​បន្ថែម​សមត្ថភាព​ដំណើរការ​របស់​វា​ខ្លាំង​ជាង​មុន​គុណ​នឹង​២ គឺ 2x ​ប្រៀបធៀប​នឹង XPS 13 ស៊េរី​ឆ្នាំ២០១៥ ដែល​អាច​មាន​ឈ្មោះ​ជា Laptop ​១៣អ៊ីញ​សមត្ថភាព​ខ្លាំង​ជាង​គេ​លើ​ពិភពលោក។ ពេល​នេះ XPS 13 ​ជំនាន់​ចុងក្រោយ​នេះ មាន​ដាក់​លក់​លើ​ទីផ្សារ​ហើយ៕ ដោយ៖ រឹទ្ធិរាជ ប្រភព៖ Dell