មុខតំណែងនឹងមិនធ្វើឲ្យអ្នកក្លាយជាអ្នកដឹកនាំគេនោះទេ តែជាសកម្មភាពទាំង៥យ៉ាងនេះទៅវិញទេ
តាមផ្នត់គំនិតជាទូទៅរបស់មនុស្សភាគច្រើនយល់ថា ដរាបណាអ្នកមានមុខតំណែងឈ្មោះថាជាអ្នកដឹកនាំ នោះអ្នកគឺត្រូវតែមានសិទ្ធិអំណាចគ្រប់បែបយ៉ាង គ្រប់គ្រង និងបញ្ជាអ្នកនៅក្រោមបង្គាប់ទៅតាមចិត្តរបស់អ្នក។
នេះគឺជាការយល់ខុសដ៏ធំរបស់ពួកគេទៅលើអត្ថន័យនៃអ្នកដឹកនាំពិតប្រាកដ មុខតំណែងរបស់ពួកគេនឹងមិនបញ្ជាក់ថាពួកគេជាអ្នកដឹកនាំនោះទេ តែជាសកម្មភាព ការប្រព្រឹត្ត ទង្វើ និងឥរិយាបថរបស់ពួកគេចំពោះអ្នកក្រោមបង្គាប់របស់ខ្លួនទៅវិញទេ។ បុគ្គលម្នាក់អាចឆ្លុះបញ្ចាំងបានថាជាអ្នកដឹកនាំពិតមែន ឬអត់ គឺអាស្រ័យទៅលើគុណសម្បត្តិនៃសកម្មភាពទាំង៥យ៉ាងខាងក្រោមនេះដែលមាននៅក្នុងខ្លួនពួកគេ៖
១) ឲ្យតម្លៃចំពោះរាល់ទំនាក់ទំនងរបស់ពួកគេ៖ មិនថាជាអ្នកនិយាយទៅកាន់អ្នកបោសសម្អាត ឬដៃគូសហការដែលមានមុខតំណែងទាបជាងអ្នកនោះទេ អ្វីដែលសំខាន់មិនស្ថិតនៅត្រង់ថាតើ ពួកគេមានមុខតំណែងអ្វីនោះទេ ព្រោះថានៅពីក្រោយមុខតំណែងទាំងនោះ គឺជា"មនុស្ស"ដែលនៅចាំទទួលខុសត្រូវលើតួនាទីរបស់ខ្លួន ហើយទោះជាយ៉ាងណាក៏ដោយ ពួកគេទាំងនោះប្រៀបដូចជាសមាជិកគ្រួសាររបស់អ្នកដែលមានគោលដៅត្រូវសម្រេចរួមគ្នាតែមួយដូច្នោះ។ ហេតុនេះវិធីដែលអ្នកជ្រើសរើសធ្វើទំនាក់ទំនងជាមួយពួកគេគឺជារឿងដ៏សំខាន់បំផុត។
២) ខ្នះខ្នែងជួយសមាជិកក្រុមរបស់អ្នកចំពោះភាពរីកចម្រើនរបស់ពួកគេ៖ ការគិតគូរពីភាពរីកចម្រើនរបស់សមាជិកក្រុម និងខ្នះខ្នែងជួយពួកគេតាមរយៈការបើកឱកាសឲ្យមានវគ្គបណ្ដុះបណ្ដាលសំខាន់ៗផ្សេងៗ ឬជាឱកាសសម្រាប់ការអភិវឌ្ឍខ្លួនណាមួយ សកម្មភាពទាំងនេះនឹងជួយពួកគេក្នុងការពង្រឹងពង្រីកនូវចំណេះដឹង និងជំនាញរបស់ខ្លួន។ មិនតែប៉ុណ្ណោះ អ្នកក៏អាចបំផុសសក្ដានុពលពួកគេដោយបន្ថែមនូវការទទួលខុសត្រូវទៅលើកិច្ចការធំៗផងដែរ។
៣) ចែករំលែកនូវភាពជោគជ័យរបស់អ្នកទៅកាន់ពួកគេ៖ អ្នកនឹងមិនអាចសម្រេចការងារមួយឲ្យទទួលបានភាពជោគជ័យនោះឡើយ បើសិនជាអ្នកពុំមានជំនួយពីការខិតខំប្រឹងប្រែងរបស់ពួកគេនោះ។ ដូច្នេះអ្នកត្រូវផ្ដល់តម្លៃដល់ពួកគេឲ្យទទួលបាននូវកិត្តិយសពីភាពជោគជ័យ នៅពេលនោះពួកគេនឹងមានកម្លាំងចិត្តខិតខំធ្វើការសម្រាប់ភាពជោគជ័យដែលមានរួមគ្នាជាបន្តទៅទៀត។
៤) យកការទទួលខុសត្រូវទៅលើកំហុសខុសឆ្គងទាំងឡាយដាក់នៅលើស្មាខ្លួនឯង៖ តម្លៃនៃភាពជាអ្នកដឹកនាំរបស់អ្នក គឺអាចបញ្ជាក់តាមរយៈភាពមានទំនួលខុសត្រូវរបស់អ្នកក្នុងនាមជាអ្នកដឹកនាំ នៅពេលមានកំហុសណាមួយដែលបង្អាក់ផែនការមិនឲ្យសម្រេចទៅតាមការរំពឹងទុក។ អ្នកមិនត្រូវគិតតែពីខ្លួនឯង មានភាពអាត្មានិយម ហើយបន្ទោសអ្នកក្នុងក្រុមនូវកំហុស និងការបរាជ័យនោះឡើយ។ ម្យ៉ាងទៀត ប្រសិនជាអ្នកមានមតិស្ថាបនាសម្រាប់កែសម្រួលការបំពេញកិច្ចការរបស់នរណាម្នាក់ អ្នកគួរតែជ្រើសរើសនិយាយជាមួយពួកគេជាលក្ខណៈឯកជនទើបជាការល្អបំផុត។
៥) ធ្វើជាមនុស្សដែលមានតម្លៃមួយរូប៖ អត្ថន័យនៃភាពជាអ្នកដឹកនាំ មិនមែនផ្ដោតសំខាន់ទៅលើសមត្ថភាពតែម្យ៉ាងនោះទេ តែផ្ដោតសំខាន់ទៅលើការរស់នៅដែលប្រកាន់ខ្ជាប់នូវតម្លៃប្រចាំខ្លួន។ អ្នកត្រូវធ្វើជាអ្នកដឹកនាំម្នាក់ដែលពួកគេអាចទុកចិត្ត និងស័ក្ដិសមសម្រាប់ពួកគេក្នុងការផ្ដល់នូវការគោរពដល់អ្នក។ អ្វីដែលអ្នកមិនត្រូវភ្លេចក្នុងមួយជីវិតនេះគឺ "ការងាររបស់អ្នក អាចផ្ដល់ឲ្យអ្នកនូវសិទ្ធិអំណាច តែទង្វើរបស់អ្នកទើបធ្វើឲ្យអ្នកទទួលបាននូវការគោរពមួយពិតប្រាកដ"៕
ប្រភព៖ success ប្រែសម្រួល៖ ស្រីពៅ
