ក្រុមហ៊ុន Xiaomi ​កាលពី​ខែ​ធ្នូ​ឆ្នាំ​មុន បាន​លើកឡើង​ថា Mi 7 នឹង​ត្រូវ​ប្រកាស​ចេញ​ក្នុង​ព្រឹត្តិការណ៍ MWC 2018 ដើម​ឆ្នាំ​ថ្មី​នេះ បំពាក់​មក​ជាមួយ​ឈីប Snapdragon 845 ​ប៉ុន្តែ​បើ​តាម​របាយការណ៍​ខ្លះ​បាន​អះអាង​ថា វា​នឹង​ត្រូវ​គេ​ដាក់​ឈ្មោះ​ឱ្យ​ជា Xiaomi Mi 2s ​ទៅ​វិញ។

ខណៈ​វា​ត្រឹមតែ​ជា​រូប screenshot លេច​ឡើង​នៅ​លើ​គេហទំព័រ playfuldroid នោះ យើង​សង្កេត​ឃើញ ផ្ទាំង​រូប​នោះ​មាន​បញ្ជាក់​នូវ​លក្ខណៈ​សម្បត្តិ​លំអិត​បាន​ច្រើន​ទៅ​លើ​ស្មាតហ្វូន​គែម​អេក្រង់​ស្ដើង​នេះ។ ក្នុង​នោះ​ឃើញ​មាន RAM 8GB, កម្លាំង​ថ្ម 4480mAh ​ដែល​ត្រូវ​បាន​បង្កើន​បន្ថែម​ពី​លើ​ថ្ម​របស់ Mi 6 ដែល​មាន​ត្រឹម 3350mAh។ លក្ខណៈ​សម្បត្តិ​ផ្សេង​ទៀត​របស់​វា ត្រូវ​គេ​រំពឹង​ថា នឹង​បំពាក់​ឈីប Snapdragon 845, កាមេរ៉ា​ភ្លោះ dual camera (16MP+16MP) ​និង​អេក្រង់ ៥,៦អ៊ីញ​កម្រិត FullHD+ និង​មាន​ទំហំ​ផ្ទុក 128GB។ បើ​តាម screenshot ​បែកធ្លាយ​ខាង​លើ​បង្ហាញ​ថា ស្មាតហ្វូន​ថ្មី​របស់​ក្រុមហ៊ុន​ចិន​នេះ​ក្រាល​ដោយ​ផ្ទៃ MIUIs 8.1.30x ៕ ​ដោយ៖ រឹទ្ធិរាជ ប្រភព៖ playfuldroid