មេរៀនជីវិតទាំង ៩ របស់លោកLi Ka Sing មហាសេដ្ឋីហុងកុង ជួយផ្លាស់ប្ដូរជីវិតអាជីវកម្មរបស់អ្នកឱ្យកាន់តែជោគជ័យ
បច្ចុប្បន្នលោកលីកាសិង (Li Ka Sing) គឺជាមហាសេដ្ឋីដែលមានទ្រព្យសម្បត្តិច្រើនជាងគេបំផុតនៅហុង កុង ដោយបច្ចុប្បន្នលោកមានទ្រព្យសម្បត្តិសរុបប្រមាណ ៣៣.៧ ពាន់លានដុល្លារ (ប៊ីលលានដុល្លារ)។
ងាកទៅមើលប្រវត្តិរបស់លោកបន្តិច លោកលីកាសិង និងក្រុមគ្រួសារបានភៀសខ្លួនទៅរស់នៅក្នុងទឹកដីហុង កុងកំឡុងពេលសង្គ្រាមរវាងចិន និងជប៉ុន។ បន្ទាប់ពីទៅដល់ទឹកដីហុងកុងមិនបានប៉ុន្មានផង ឪពុករបស់លោកក៏បានលាចាកលោកទៅ។ លោក លីកាសិង បានសម្រេចចិត្តបោះបង់ការសិក្សានៅពេលដែលលោកមានអាយុត្រឹមតែ ១២ឆ្នាំប៉ុណ្ណោះ ដើម្បីតស៊ូជំនះភាពលំបាកលំបិនដោយលោក បានចូលធ្វើការនៅក្នុងរោងចក្រផលិតនាឡិកាស្បែកមួយកន្លែង។ បន្ទាប់មកនៅអាយុ ១៤ឆ្នាំ លោកក៏បានចូលបម្រើការពេញម៉ោង នៅក្រុមហ៊ុនផលិតប្លាស្ទិកមួយកន្លែង។ ក្រោយមកលោកបានចាប់ផ្ដើមជំនួញរកស៊ីផលិតតុក្កតាជ័រ និងរបស់របរប្រើប្រាស់ប្រចាំថ្ងៃធ្វើពីជ័រជាដើម។ បច្ចុប្បន្ន លោកលីកាសិង គឺជាសហគ្រិនជោគជ័យ និងជាមនុស្សដ៏មានឥទ្ធិពលមួយរូបផងដែរនៅក្នុងតំបន់អាស៊ី។ ដូចនេះហើយទើប BizKhmer សូមលើកយកដំបូន្មានល្អៗមួយចំនួនរបស់លោកក្នុងការដាស់តឿន និងគិតពិចារណាទាំងអស់គ្នា៖
១) ត្រូវហ៊ានចំណាយលុយប៉ាវបាយដល់មនុស្សដែលមានចំណេះដឹងច្រើនជាងអ្នក អ្នកត្រូវចងចាំថា អ្នកត្រូវតែហ៊ានចំណាយលុយប៉ាវ ថ្លៃបាយថ្ងៃត្រង់ចំពោះមនុស្សដែលមានចំណេះដឹង បទពិសោធន៍ច្រើនជាងអ្នក ដែលមានលុយច្រើនជាងអ្នក ឬក៏មនុស្សដែលធ្លាប់ជួយអ្នកជាដើម។ អ្នកត្រូវហ៊ានធ្វើបែបនេះជារៀងរាល់ខែ។ បន្ទាប់ពីរយៈពេលមួយឆ្នាំ មនុស្សទាំងនោះនឹងបញ្ចូលចំណេះដឹងថ្មីៗ និងផ្ដល់ជាប្រយោជន៍ជាច្រើនដល់អ្នកដោយនឹកស្មានមិនដល់។ ភាពល្បីល្បាញ ឥទ្ធិពល និងគុណតម្លៃទាំងនេះហើយដែលអ្នកនឹងទទួលបានមកវិញ។ បន្ថែមពីនេះទៀត អ្នកនឹងទទួលបានគុណប្រយោជន៍មួយទៀតគឺអ្នកត្រូវគេស្គាល់ថាជាមនុស្សដែលមានសមានចិត្តល្អ និងចេះខ្វល់ខ្វាយពីអ្នកដ៏ទៃ។
២) ធ្វើខ្លួនជាមនុស្សញៀននឹងការអានសៀវភៅ នៅពេលអ្នកទិញសៀវភៅ អ្នកត្រូវអានដោយយកចិត្តទុកដាក់ ហើយរៀនពីមេរៀន និងយុទ្ធសាស្ត្រផ្សេងៗដែលមានក្នុងសៀវភៅទាំងនោះ។ បន្ទាប់ពីអ្នកបានអានសៀវភៅទាំងនោះហើយ អ្នកត្រូវចេះមានគំនិត យមមកបម្លែងហើយចែករំលែកទៅកាន់អ្នកដ៏ទៃនៅជុំវិញអ្នក ពីព្រោះថាការចែករំលែកគឺពិតជាជួយឲ្យអ្នកក្លាយជាមនុស្សដែលអ្នកដ៏ទៃជឿទុកចិត្ត និងអាចបង្កើនចំណេះដឹងរបស់អ្នកបានកាន់តែច្រើនផងដែរ។
៣) រៀនលក់ វាជារឿងល្អបើអ្នកអាចស្វែងរកការងារផ្នែកលក់ក្រៅម៉ោងបាន។ ការងារផ្នែកលក់គឺពិតជាមានភាពពិបាក តែវានឹងជួយអ្នកឲ្យមាន ហើយវាគឺជាជំនាញ និងសិល្បៈដ៏សំខាន់ ន់ដែលអ្នកអាចប្រើប្រាស់ក្នុងអាជីពការងាររបស់អ្នកបាន។ និយោជកដែលជោគជ័យភាគច្រើនសុទ្ធតែមានជំនាញលក់។ ពួកគេមានសមត្ថភាពលក់ក្ដីសុបិននិងចក្ខុវិស័យរបស់ពួកគេ។ នៅពេលដែលអ្នកកំពុងរៀនលក់ អ្នកប្រាកដជាបានដឹងថា តើអ្វីទៅជាការលក់ និងអ្វីដែលមិនមែនជាការលក់។ អ្នកត្រូវចេះអង្កេតតាមដានពីទំនោរទីផ្សារ ព្រោះថាវានឹងជួយដល់អ្នកពេលដែលអ្នកមានអាជីវកម្មផ្ទាល់ខ្លួន និងអ្នកអាចធ្វើការកំណត់សម្គាល់ពីឱកាសទីផ្សារនៃផលិតផលរបស់អ្នកក្នុងពេលអនាគតថែមទៀតផង។
៤) កុំទិញសំលៀកបំពាក់ដែលអ្នកមិនមានលទ្ធភាពទិញ ព្យាយាមចំណាយតិច ទៅលើសំលៀកបំពាក់របស់អ្នកដោយកុំចាយហួសមាឌ ឬហួសប្រមាណ។ តែអ្នកអាចទិញវាប៉ុណ្ណាក៏បាន តាមតែអ្នកចង់នៅពេលដែលអ្នកក្លាយជាអ្នកមានមានប្រាក់ចាយមិនគ្រប់គ្រាន់ហើយ។ ត្រូវចេះសន្សំលុយ ហើយជាជាងទិញកាដូរឲ្យមនុស្សជាទីស្រលាញ់របស់អ្នក អ្នកត្រូវប្រាប់ពីហេតុផល ពីគម្រោង និងផែនការហិរញ្ញវត្ថុរបស់អ្នកក្នុងពេលអនាគត។ ប្រាប់ពួកគេពីការខិតខំប្រឹងប្រែង គោលដៅ និងក្ដីសុបិនដែលអ្នកចង់សម្រេចក្នុងពេលអនាគត។
៥) រៀនពីអ្នកដទៃតាមរយៈការជួយពួកគេ និយោជកជាច្រើនកំពុងត្រូវការជំនួយពីអ្នក។ ដូចនេះ អ្នកអាចផ្ដល់ជំនួយដល់ពួកគេតាមរយៈការធ្វើការងារក្រៅម៉ោងជាដើម។ វានឹងជួយសំលៀងមហិច្ឆតា ឆន្ទៈ និងជំនាញរបស់អ្នកឲ្យកាន់តែមុតស្រួចជាងមុន។ អ្នកនឹងចាប់ផ្ដើមបង្ហាញពីទេពកោសល្យរបស់អ្នក ហើយអ្នកនឹងកាន់តែខិតជិតដល់គោលដៅហិរញ្ញវត្ថុរបស់អ្នកកាន់តែឆាប់។
៦) ចាប់ផ្ដើមរៀបចំគម្រោង ជីវិតអ្នក គឺអ្នកអាចរៀបចំ និងកែច្នៃបាន។ អាជីពរបស់អ្នក អ្នកក៏អាចរៀបចំផែនការបានផងដែរ។ អ្នកគួរតែចាប់ផ្ដើមរៀបចំផែនការឥឡូវនេះភ្លាមទៅ។ នៅពេលដែលអ្នកនៅក្រ អ្នកចំណាយពេលនៅក្នុងផ្ទះតិចជាងនៅក្រៅផ្ទះ។ ប៉ុន្តែ នៅពេលដែលអ្នកកាន់តែមាន អ្នកនឹងចំណាយពេលនៅក្នុងផ្ទះកាន់តែច្រើន ហើយមិនសូវចំណាយពេលទៅខាងក្រៅផ្ទះទេ។ នេះហើយគឺជាសិល្បះនៃការរស់នៅរបស់មនុស្ស។ នៅពេលអ្នកមិនទាន់មាន អ្នកគួរតែរៀនចំណាយលុយទៅលើអ្នកដទៃ ប៉ុន្តែនៅពេលអ្នកមាន អ្នកនឹងចំណាយមកលើខ្លួនអ្នកវិញ។ វាជារឿងដែលគួរឲ្យសោកស្ដាយដោយសារតែមានមនុស្សជាច្រើនគឺធ្វើផ្ទុយទៅវិញ។
៧) កុំឲ្យភាពអាត្មានិយមគ្រប់គ្រងអ្នកបានឱ្យសោះ នៅពេលដែលអ្នកនៅក្រ អ្នកត្រូវព្យាយាមធ្វើទង្វើល្អៗដល់អ្នកដទៃជុំវិញអ្នក។ តែនៅពេលដែលអ្នកក្លាយជាអ្នកមានហើយ អ្នកនឹងបានរៀនពីរបៀបដែលអ្នកដទៃធ្វើល្អលើអ្នកជាមិនខាន។ អ្នកក៏ត្រូវរៀនប្រព្រឹត្តរឿងល្អៗលើខ្លួនអ្នកឲ្យបានច្រើនផងដែរ។ នៅពេលអ្នកក្រ អ្នកត្រូវហ៊ានលះបង់ខ្លួនរបស់អ្នកឲ្យអ្នកដទៃទាញយកប្រយោជន៍ពីអ្នក ក៏ប៉ុន្តែនៅពេលដែលអ្នកក្លាយជាអ្នកមាន អ្នកត្រូវថែខ្លួនឲ្យល្អ កុំឲ្យនរណាម្នាក់ប្រើប្រាស់អ្នកដើម្បីទាញយកប្រយោជន៍ពីអ្នកឲ្យសោះ។ ទាំងនេះគឺជាផ្នែកតូចៗនៃជីវិតដែលមនុស្សគ្រប់គ្នាមិនសូវបានដឹង។
៨) កុំប្រើប្រាស់ទឹកលុយរបស់អ្នកទៅលើអ្នកដទៃក្នុងផ្លូវមិនល្អ នៅពេលដែលអ្នកនៅក្រ អ្នកត្រូវហ៊ានចំណាយលុយខ្លះ ដូចនេះហើយធ្វើឲ្យអ្នកដទៃមើលឃើញពីសន្ដានចិត្តរបស់អ្នក។ តែពេលដែលអ្នកមាន កុំបង្ហាញឬព្យាយាមអួតដាក់អ្នកដទៃពេក អ្នកគួរតែរៀនចំណាយលុយទៅលើខ្លួនអ្នកវិញ។ នៅពេលក្រ ត្រូវរៀនធ្វើចិត្តល្អបន្តិច តែពេលមាន កុំចាយវាយខ្ជះខ្ជាយពេក។ ជីវិតរបស់អ្នករត់ដូចកង់រទះ រត់ចុះរត់ឡើងទើបដល់គោលដៅសំខាន់។
៩) រៀនដាក់វិន័យលើខ្លួនឯង នៅពេលដែលអ្នកនៅក្មេង អ្នកគ្មានកំហុសទេ។ អ្នកកុំខ្លាចក្រឲ្យសោះ។ អ្នកត្រូវដឹងពីការវិនិយោគលើខ្លួនអ្នក ហើយរៀនបង្កើនចំណេះដឹង និងកេរ្តិ៍ឈ្មោះរបស់អ្នក។ អ្នកត្រូវដឹងថាអ្វីដែលមានសារៈសំខាន់សម្រាប់អ្នក ហើយអ្វីដែលអ្នកត្រូវវិនិយោគលើ។ នេះគឺជាវិន័យដ៏ល្អមួយដល់ខ្លួនអ្នក។ ព្យាយាមចំណាយលុយតិចទៅលើសម្លៀកបំពាក់ កាត់បន្ថយការញ៉ាំបាយក្រៅ។ ប្រសិនបើអ្នកចង់ញ៉ាំខាងក្រៅ អ្នកត្រូវដឹងពីការចាយវាយរបស់អ្នក។ ហើយនៅពេលអ្នកប៉ាវបាយនរណាម្នាក់ អ្នកត្រូវដឹងថាអ្នកនោះជាមនុស្សដែលមានសុបិនធំជាងអ្នក និងជាមនុស្សដែលខិតខំធ្វើប្រឹងប្រែង តស៊ូជាងអ្នក។ ដូចនេះ អ្នកនឹងបានរៀនច្រើនពីពួកគេ៕
ដោយ៖ លង់ វណ្ណៈ ប្រភព៖ nextshark.com
